വാഷിംഗ്ടണ്‍: ചൈനയെ ചൊടിപ്പിച്ച യുഎസ് ഹൗസ് സ്പീക്കർ നാൻസി പെലോസിയുടെ സന്ദർശനം കഴിഞ്ഞ് 12 ദിവസത്തിന് ശേഷം അമേരിക്കൻ നിയമനിർമ്മാതാക്കളുടെ പ്രതിനിധി സംഘം തായ്‌വാൻ സന്ദർശിക്കുന്നു. യുഎസ്-തായ്‌വാൻ ബന്ധം, പ്രാദേശിക സുരക്ഷ, വ്യാപാരം, നിക്ഷേപം തുടങ്ങിയ വിഷയങ്ങൾ ചർച്ച ചെയ്യാൻ മസാച്യുസെറ്റ്‌സിലെ ഡെമോക്രാറ്റിക് സെനറ്റർ എഡ് മാർക്കിയുടെ നേതൃത്വത്തിലുള്ള അഞ്ചംഗ പ്രതിനിധി സംഘം മുതിർന്ന നേതാക്കളെ കാണുമെന്ന് തായ്‌വാനിലെ അമേരിക്കൻ ഇൻസ്റ്റിറ്റ്യൂട്ട് അറിയിച്ചു. തായ്‌വാനുമായി ഔദ്യോഗിക ബന്ധമില്ലാത്ത യുഎസ് സർക്കാരിനെയാണ് ഇൻസ്റ്റിറ്റ്യൂട്ട് പ്രതിനിധീകരിക്കുന്നത്.
സ്വയം ഭരിക്കുന്ന തായ്‌വാൻ തങ്ങളുടെ പ്രദേശമാണെന്ന് അവകാശപ്പെടുന്ന ചൈന, പെലോസിയുടെ ഓഗസ്റ്റ് 2-ലെ സന്ദർശനത്തിന് മറുപടിയായി മിസൈലുകളും യുദ്ധക്കപ്പലുകളും യുദ്ധവിമാനങ്ങളും തായ്‌വാന് ചുറ്റുമുള്ള കടലിലേക്കും ആകാശത്തേക്കും ദിവസങ്ങളോളം അയച്ചു. തായ്‌വാൻ വിദേശ ഗവൺമെന്റുകളുമായി, പ്രത്യേകിച്ച് പെലോസിയെപ്പോലുള്ള ഒരു ഉന്നത കോൺഗ്രസ് നേതാവുമായി ഔദ്യോഗിക ബന്ധം പുലർത്തുന്നതിനെ ചൈനീസ് സർക്കാർ എതിർക്കുന്നു.
തായ്‌വാൻ തലസ്ഥാനമായ തായ്‌പേയിയിലെ സോംഗ്‌ഷാൻ വിമാനത്താവളത്തിൽ ഞായറാഴ്ച വൈകുന്നേരം 7 മണിക്ക് യുഎസ് സർക്കാർ വിമാനം ഇറങ്ങുന്നതിന്റെ വീഡിയോ ഒരു തായ്‌വാനീസ് ടി വി ചാനലാണ് പുറത്തുവിട്ടത്. അതില്‍ ആരാണെന്ന് സ്ഥിരീകരിച്ചിട്ടില്ലെങ്കിലും, ഏഷ്യയിലേക്കുള്ള യാത്രയുടെ ഭാഗമായി പ്രതിനിധി സംഘം ഞായർ, തിങ്കൾ ദിവസങ്ങളിൽ തായ്‌വാനിൽ ഉണ്ടാകുമെന്ന് പ്രഖ്യാപിച്ചതിന് തൊട്ടുപിന്നാലെയാണ് അമേരിക്കൻ ഇൻസ്റ്റിറ്റ്യൂട്ട് ഹ്രസ്വ പ്രസ്താവന പുറപ്പെടുവിച്ചത്.
അമേരിക്കൻ സമോവയിൽ നിന്നുള്ള പ്രതിനിധിയായ റിപ്പബ്ലിക്കൻ പ്രതിനിധി ഔമുവ അമത കോൾമാൻ റഡെവാഗൻ, കാലിഫോർണിയയിൽ നിന്നുള്ള ഡെമോക്രാറ്റിക് ഹൗസ് അംഗങ്ങളായ ജോൺ ഗാരമെൻഡി, അലൻ ലോവെന്തൽ, വിർജീനിയയിൽ നിന്നുള്ള ഡോൺ ബെയർ എന്നിവരാണ് പ്രതിനിധി സംഘത്തിലെ മറ്റ് അംഗങ്ങൾ.
സൈനികാഭ്യാസം അവസാനിച്ചതിന് ശേഷവും ചൈനീസ് യുദ്ധവിമാനങ്ങൾ ദിവസവും തായ്‌വാൻ കടലിടുക്കിന്റെ മധ്യഭാഗം കടക്കുന്നുണ്ടെന്നും ഞായറാഴ്ച കുറഞ്ഞത് 10 തവണയെങ്കിലും അങ്ങനെ ചെയ്തതായി തായ്‌വാൻ പ്രതിരോധ മന്ത്രാലയം അറിയിച്ചു.
22 ചൈനീസ് സൈനിക വിമാനങ്ങളും ആറ് നാവിക കപ്പലുകളും 10 യുദ്ധവിമാനങ്ങളും തായ്‌വാൻ പരിസരത്ത് ഞായറാഴ്ച വൈകീട്ട് അഞ്ച് മണിയോടെ കണ്ടെത്തിയതായി മന്ത്രാലയം ട്വിറ്റർ അക്കൗണ്ടിൽ അറിയിച്ചു.
