പ്രോസ്പർ /ടെക്‌സാസ് : മലയാളികൾ വീണ്ടും ഒരു ഓണത്തെ വരവേൽക്കുകയാണ് അത്തം പത്തു പൊന്നോണം. പ്രവാസ ജീവിതത്തിന് നിർബന്ധിതരായ മലയാളികൾക്ക് അത്തത്തിനു മുൻപേ ഓണം തുടങ്ങും പിന്നെ ഒന്ന് രണ്ട് മാസം ഓണാഘോഷം തന്നെയാണ്. പ്രവർത്തി ദിവസങ്ങൾ ഒഴികെ വെള്ളി, ശനി, ഞായർ ദിവസങ്ങൾ വിവിധ സംഘടനകൾ കൂട്ടായ്മകൾ, സ്നേഹിതർ കുടുംബക്കാർ, തുടങ്ങി നാലുപേർ കൂടുന്നവർ ഒക്കെ ഓണം ആഘോഷിക്കാറുണ്ട്. എല്ലാം ഓണാഘോഷങ്ങളും അതിന്റെ തനിമയോടെ കൊണ്ടാടാൻ എല്ലാ പ്രവാസ സംഘടനകളും ശ്രമിക്കാറുണ്ട്. ആ തനിമ നിലനിർത്തിക്കൊണ്ട് തന്നെ വീണ്ടും ഒരു ഓണത്തെ വരവേൽക്കാൻ പ്രോസ്പർ മലയാളികൾ ഒരുങ്ങുന്നു.
സെപ്റ്റംബർ 3 ഞായറാഴ്ച രാവിലെ 10.30ന് ആർട്ടിഷ്യ കമ്മ്യൂണിറ്റി ഹാളിൽ വച്ച് നടത്തപ്പെടുന്ന ആഘോഷ പരിപാടികൾക്ക് വേണ്ടിയുള്ള ഒരുക്കങ്ങൾ കൺവീനർ ലീനസ് വർഗീസിന്റെ നേതൃത്വത്തിൽ ആരംഭിച്ചു കഴിഞ്ഞു. തിരുവാതിര, ഹാസ്യ കലാപ്രകടനം, പൂക്കളം, കുട്ടികളുടെ പ്രത്യേക കലാപരിപാടികൾ, സിനിമാറ്റിക് ഡാൻസ്, ഗാനമേള തുടങ്ങിയ വിവിധ പരിപാടികൾക്ക് വേണ്ടിയുള്ള തയ്യാറെടുപ്പുകൾ നടന്നുവരുന്നതായി സംഘാടകർ അറിയിച്ചു.
അഞ്ചു ജിബിൻസ്, ഷിജു ജേക്കബ്, സത്യാ വിജയ്, പുണ്യ ജെറി അനുപ്രിയ അജീഷ്, രാകേഷ് ചിറക്കര തുടങ്ങിയവർ വിവിധ പരിപാടികളുടെ കൺവീനറന്മാരായി പ്രവർത്തിച്ചുവരുന്നു. പ്രോസ്പെറും പരിസരപ്രദേശങ്ങളിലും ഉള്ള ഏകദേശം 150 ഓളം മലയാളികൾ പങ്കെടുക്കുന്ന പരിപാടിയിൽ വിഭവസമൃദ്ധമായ ഓണസദ്യ ഏറ്റവും ആകർഷകമാണ്.
കൂടുതൽ വിവരങ്ങൾക്ക്: ലീനസ് വർഗീസ് (917 254 8195), സാമുവൽ യോഹന്നാൻ (214 435 0124).
