വാഷിംഗ്ടണ്‍: ജമ്മു കശ്മീരിലെ പഹൽഗാമിൽ അടുത്തിടെയുണ്ടായ ഭീകരാക്രമണത്തിനുശേഷം ഇന്ത്യയും പാക്കിസ്താനും തമ്മിലുള്ള സംഘർഷം രൂക്ഷമായി. അതിർത്തിയിൽ പാക്കിസ്താന്‍ വെടിനിർത്തൽ കരാർ ലംഘിച്ചതിനെ തുടർന്ന് സ്ഥിതി കൂടുതൽ സംഘർഷഭരിതമായി.
അതേസമയം, ഇന്ത്യയ്ക്ക് സൈനിക സഹായം നൽകാൻ അമേരിക്ക തീരുമാനിച്ചത് പാക്കിസ്താന്റെ ആശങ്കകൾ വർദ്ധിപ്പിച്ചു. ഇന്തോ-പസഫിക് മേഖലയിലെ സമുദ്ര നിരീക്ഷണത്തിനും സുരക്ഷയ്ക്കും ആവശ്യമായ ഉപകരണങ്ങളും സാങ്കേതികവിദ്യകളും ഇന്ത്യയ്ക്ക് വിൽക്കാൻ യുഎസ് സ്റ്റേറ്റ് ഡിപ്പാർട്ട്മെന്റ് അംഗീകാരം നൽകി. ഏകദേശം 131 മില്യൺ ഡോളർ വിലവരും ഈ ഇടപാടിന്.
ഈ കരാർ പ്രകാരം, സി-വിഷൻ സോഫ്റ്റ്‌വെയർ, സാങ്കേതിക പിന്തുണ, പരിശീലനം, സോഫ്റ്റ്‌വെയർ വിശകലനം, മറ്റ് സാമഗ്രികൾ എന്നിവ ഇന്ത്യയ്ക്ക് വിതരണം ചെയ്യും. ഈ സാധ്യതയുള്ള ഇടപാടിനെക്കുറിച്ച് അറിയിക്കുന്നതിന് ആവശ്യമായ എല്ലാ രേഖകളും യുഎസ് പ്രതിരോധ സുരക്ഷാ സഹകരണ ഏജൻസി ഇന്ത്യയ്ക്ക് കൈമാറി. ഈ നീക്കം ഇന്ത്യ-യുഎസ് തന്ത്രപരമായ പങ്കാളിത്തം ശക്തിപ്പെടുത്തുമെന്നും ഇന്തോ-പസഫിക്, ദക്ഷിണേഷ്യ മേഖലകളിൽ സുരക്ഷ നിലനിർത്താൻ ഇന്ത്യയെ സഹായിക്കുമെന്നും യുഎസ് പറയുന്നു.
അതേസമയം, ഇന്ത്യയും പാക്കിസ്താനും സംയമനം പാലിക്കണമെന്ന് അമേരിക്ക അഭ്യർത്ഥിച്ചു. യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഇന്ത്യൻ വിദേശകാര്യ മന്ത്രി എസ്. ജയശങ്കർ പാകിസ്ഥാൻ പ്രധാനമന്ത്രി ഷഹബാസ് ഷെരീഫുമായി പ്രത്യേകം ചർച്ച നടത്തി. പഹൽഗാം ആക്രമണത്തിൽ കൊല്ലപ്പെട്ടവർക്ക് അനുശോചനം അറിയിച്ച റൂബിയോ, ഭീകരതയ്‌ക്കെതിരായ പോരാട്ടത്തിൽ ഇന്ത്യയെ പിന്തുണയ്ക്കുമെന്ന് പ്രതിജ്ഞയെടുത്തു. ആക്രമണത്തിന്റെ അന്വേഷണത്തിൽ പാക്കിസ്താന്‍ സഹകരിക്കണമെന്നും അദ്ദേഹം ആവശ്യപ്പെട്ടു. ആക്രമണത്തിന് ഉത്തരവാദികളായവരെ ശിക്ഷിക്കുക എന്നതാണ് ഇന്ത്യയുടെ മുൻഗണനയെന്നും അവരെ നിയമത്തിന് മുന്നിൽ കൊണ്ടുവരുമെന്നും സംഭാഷണത്തിനിടെ ജയ്ശങ്കർ വ്യക്തമാക്കി.
