ഓപ്പറേഷൻ സിന്ദൂരിന് കീഴിൽ, ബുധനാഴ്ച രാവിലെ ഇന്ത്യൻ സൈന്യം പാക്കിസ്താനിലേയും പി‌ഒ‌കെയിലെയും തീവ്രവാദ ഒളിത്താവളങ്ങളിൽ കൃത്യമായ ആക്രമണം നടത്തി. ഏറ്റവും പ്രധാനപ്പെട്ട ലക്ഷ്യം ലഷ്കർ-ഇ-തൊയ്ബയുടെ പ്രവർത്തനപരവും പ്രത്യയശാസ്ത്രപരവുമായ കേന്ദ്രമായി കണക്കാക്കപ്പെടുന്ന മുരിദ്കെ ആസ്ഥാനമായുള്ള മർകസ്-ഇ-തൊയ്ബ ആയിരുന്നു.
ന്യൂഡല്‍ഹി: പാക്കിസ്താന്‍, പാക് അധീന കശ്മീര്‍ (പിഒകെ) എന്നിവിടങ്ങളിലായി സ്ഥിതി ചെയ്യുന്ന ഒമ്പത് ഭീകര ഒളിത്താവളങ്ങൾ ലക്ഷ്യമിട്ട് ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിന് ഇന്ത്യ ഉചിതമായ മറുപടി നൽകി. ബുധനാഴ്ച പുലർച്ചെയാണ് ഓപ്പറേഷൻ സിന്ദൂരിന്റെ ഭാഗമായി ഈ നടപടി നടപ്പിലാക്കിയത്. ഇന്ത്യൻ സൈനിക വൃത്തങ്ങൾ ഇതിനെ “കൃത്യവും നിയന്ത്രിതവും പ്രകോപനരഹിതവും” എന്ന് വിശേഷിപ്പിച്ചു. ഈ ആക്രമണത്തിൽ, ലഷ്കർ-ഇ-തൊയ്ബ (എൽഇടി), ജെയ്ഷ്-ഇ-മുഹമ്മദ് തുടങ്ങിയ നിരോധിത സംഘടനകളുടെ ഒളിത്താവളങ്ങൾ നശിപ്പിക്കപ്പെട്ടു.
ഈ ഓപ്പറേഷന്റെ ഏറ്റവും വലിയ ലക്ഷ്യം പാക്കിസ്താനിലെ പഞ്ചാബ് പ്രവിശ്യയിലെ ലാഹോറിനടുത്തുള്ള മുരിദ്കെയിൽ സ്ഥിതി ചെയ്യുന്ന ‘മസ്ജിദ് വാ മർകസ് ത്വയ്ബ’ ആയിരുന്നു. ഭീകരതയുടെ “നഴ്സറി” എന്നറിയപ്പെടുന്ന ലഷ്കർ-ഇ-ത്വയ്ബയുടെ പ്രത്യയശാസ്ത്രപരവും പ്രവർത്തനപരവുമായ ആസ്ഥാനമാണ് ഈ സമുച്ചയം എന്ന് വിശ്വസിക്കപ്പെടുന്നു.
മസ്ജിദ് വാ മർകസ് ഇ ത്വയ്ബ 2000 ത്തിലാണ് സ്ഥാപിതമായത്. റിപ്പോർട്ടുകൾ പ്രകാരം, ഈ സമുച്ചയത്തിന് ഭാഗികമായി ധനസഹായം നൽകിയത് അൽ-ഖ്വയ്ദ തലവൻ ഒസാമ ബിൻ ലാദനായിരുന്നു. ഏകദേശം 1 കോടി രൂപയാണ് (PKR 10 ദശലക്ഷം) ഇതിലേക്ക് സംഭാവന ചെയ്തത്. ഭീകര സംഘടനയായ ലഷ്കർ-ഇ-തൊയ്ബയുടെ തലവനായ ഹാഫിസ് സയീദിന്റെ നേതൃത്വത്തിൽ തീവ്രവാദ പ്രചാരണത്തിന്റെയും പരിശീലനത്തിന്റെയും കേന്ദ്രമായിരുന്നു ഈ സമുച്ചയം. 82 ഏക്കർ വിസ്തൃതിയുള്ള ഈ സ്ഥലത്ത് ഒരു പള്ളി, ഇസ്ലാമിക വിദ്യാഭ്യാസ സ്ഥാപനം, മദ്രസ, റെസിഡൻഷ്യൽ ക്വാർട്ടേഴ്‌സ്, ആയുധ പരിശീലന കേന്ദ്രം, മത മൗലികവാദ വിദ്യാഭ്യാസം, തീവ്രവാദ റിക്രൂട്ട്‌മെന്റ് കേന്ദ്രങ്ങൾ എന്നിവയുണ്ട്.
ഇന്ത്യൻ രഹസ്യാന്വേഷണ ഏജൻസികളുടെ കണക്കനുസരിച്ച്, 2008 ലെ മുംബൈ ആക്രമണത്തിൽ ഉൾപ്പെട്ട തീവ്രവാദികൾക്കും ഈ മർകസിൽ പരിശീലനം ലഭിച്ചിരുന്നു. പാക്കിസ്താന്‍ രഹസ്യാന്വേഷണ ഏജൻസിയായ ഐഎസ്‌ഐയുടെ മേൽനോട്ടത്തിൽ “ദൗറ-ഇ-റിബ്ബ” എന്ന പേരിൽ ഇന്റലിജൻസ് പരിശീലനം ലഭിച്ച ഭീകരരിൽ അജ്മൽ കസബും ഉണ്ടായിരുന്നു.
എല്ലാ വർഷവും ആയിരത്തിലധികം വിദ്യാർത്ഥികൾ വിവിധ മതപരവും തീവ്രവാദപരവുമായ പരിപാടികൾക്കായി മർകസിൽ ചേരുന്നു. പുരുഷന്മാർക്കായി ‘സൂഫ അക്കാദമി’ എന്ന പേരിൽ ഒരു കേന്ദ്രവും സ്ത്രീകൾക്കായി പ്രത്യേക ബ്രെയിൻ വാഷിംഗ്, റാഡിക്കൽ പരിശീലന കേന്ദ്രങ്ങളും അവർ നടത്തുന്നു. ഇതുമാത്രമല്ല, ലഷ്‌കറിന്റെ മുതിർന്ന നേതൃത്വത്തിനുള്ള പരിശീലന കേന്ദ്രമായും ഈ സ്ഥലം ഉപയോഗിച്ചിട്ടുണ്ട്.
ലഷ്‌കറിന്റെ പ്രോക്സി സംഘടനയായ ദി റെസിസ്റ്റൻസ് ഫ്രണ്ട് ഏറ്റെടുത്ത, ഏപ്രിൽ 22 ന് പഹൽഗാമിലെ ബൈസരൻ പ്രദേശത്ത് 26 നിരപരാധികളായ സാധാരണക്കാർക്ക് ജീവൻ നഷ്ടപ്പെട്ട, ഭീകരാക്രമണത്തിനുള്ള നേരിട്ടുള്ള പ്രതികരണമാണ് മുരിദ്കെയ്‌ക്കെതിരെ സ്വീകരിച്ച നടപടിയെന്ന് ഇന്ത്യ വ്യക്തമാക്കി.
നീതി നടപ്പായി എന്ന് ഇന്ത്യൻ സൈന്യം പുറത്തിറക്കിയ വീഡിയോയിൽ പറയുന്നു. ഈ ഓപ്പറേഷനിലൂടെ ഇന്ത്യ തീവ്രവാദ അടിസ്ഥാന സൗകര്യങ്ങളെ ലക്ഷ്യം വച്ചുള്ള ആക്രമണം മാത്രമല്ല, ലഷ്‌കറിന്റെ ആഗോള ജിഹാദി ശൃംഖലയുടെ നട്ടെല്ലിനെയും
തകര്‍ത്തു.
