പാക്കിസ്താന്‍ ആർമിയുടെ ചീഫ് മീഡിയ ഓഫീസർ മേജർ ജനറൽ അഹമ്മദ് ഷെരീഫ് ചൗധരി, തീവ്രവാദവുമായി ബന്ധപ്പെട്ട ചരിത്രമുള്ള ഒരു കുടുംബത്തിൽ നിന്ന് വരുന്ന വ്യക്തിയാണ്. അദ്ദേഹത്തിന്റെ പിതാവ് ഡോ. സുൽത്താൻ ബഷീറുദ്ദീന്‍ മഹമൂദ്, ഒസാമ ബിൻ ലാദന് ആണവ, ജൈവ ആയുധങ്ങളെക്കുറിച്ചുള്ള വിവരങ്ങൾ നൽകിയ പാക്കിസ്താനിലെ ഉന്നത ആണവ ശാസ്ത്രജ്ഞനായിരുന്നു.
പാക്കിസ്താന്‍ തീവ്രവാദത്തിനെതിരെ പോരാടുന്നുവെന്ന് അവകാശപ്പെടുന്നുണ്ടെങ്കിലും, സൈനിക വക്താവ് മേജർ ജനറൽ അഹമ്മദ് ഷെരീഫ് ചൗധരിയുടെ പേര് ഒസാമ ബിൻ ലാദനുമായും തീവ്രവാദികളുമായും ബന്ധമുണ്ടായിരുന്ന ഒരാളുമായി ബന്ധപ്പെട്ടിരിക്കുന്ന ഞെട്ടിക്കുന്ന വിവരങ്ങളാണ് പുറത്തുവന്നിരിക്കുന്നത്. അഹമ്മദ് ഷെരീഫ് ചൗധരിയുടെ പിതാവ് ഡോ. സുൽത്താൻ ബഷീറുദ്ദീൻ മഹമൂദ് പാക്കിസ്താനിലെ ഉന്നത ആണവ ശാസ്ത്രജ്ഞനായിരുന്നു, ഒസാമ ബിൻ ലാദന് ആണവ, ജൈവ ആയുധങ്ങളെക്കുറിച്ചുള്ള വിവരങ്ങൾ നൽകുന്നതിൽ അദ്ദേഹം പങ്കാളിയായിരുന്നു. ഇന്ന്, പാകിസ്താന്‍ സൈന്യത്തിലെ ഏറ്റവും ഉയർന്ന പദവികളിലിരിക്കുന്ന ഈ മനുഷ്യൻ, തീവ്രവാദത്തിനെതിരായ പോരാട്ടത്തിന്റെ രക്ഷകനായി ഉയർന്നുവരുന്നു. അതേസമയം, അദ്ദേഹത്തിന്റെ കുടുംബ ചരിത്രം വ്യത്യസ്തമായ ഒരു കഥയാണ് പറയുന്നത്.
പാക്കിസ്താന്‍ സൈന്യത്തിന്റെ മാധ്യമ വിഭാഗമായ ഐഎസ്പിആറിന്റെ ഡയറക്ടർ ജനറലാണ് അഹമ്മദ് ഷെരീഫ് ചൗധരി. പാക്കിസ്താനിലെ ഇലക്ട്രിക്കൽ ആൻഡ് മെക്കാനിക്കൽ എഞ്ചിനീയറിംഗ് കോർപ്‌സുമായി ബന്ധപ്പെട്ടിരിക്കുന്ന അദ്ദേഹം അടുത്തിടെയാണ് ഈ സുപ്രധാന തസ്തികയിലേക്ക് നിയമിതനായത്. അതിനുമുമ്പ്, അദ്ദേഹം പാക്കിസ്താന്റെ പ്രതിരോധ ശാസ്ത്ര സാങ്കേതിക സംഘടനയുടെ (ഡെസ്റ്റോ) തലവനായി സേവനമനുഷ്ഠിച്ചിട്ടുണ്ട്. അഹമ്മദിന്റെ കുടുംബചരിത്രവും പാക്കിസ്താനിലെ തീവ്രവാദ ബന്ധങ്ങളുമായി ബന്ധപ്പെട്ടിരിക്കുന്നു. കാരണം, അദ്ദേഹത്തിന്റെ പിതാവ് ഡോ. സുൽത്താൻ ബഷീറുദ്ദീന്‍ മഹമൂദ് ഒസാമ ബിൻ ലാദന് ആണവ, ജൈവ ആയുധങ്ങളെക്കുറിച്ചുള്ള വിവരങ്ങൾ നൽകിയ ചരിത്രമുള്ളതുകൊണ്ട്.
പാക്കിസ്താനിലെ ഏറ്റവും സ്വാധീനമുള്ള ആണവ ശാസ്ത്രജ്ഞനായിരുന്ന ഡോ. ബഷീർ മഹമൂദിന്, മൂന്നാമത്തെ ഉയർന്ന സിവിലിയൻ ബഹുമതിയായ സിതാര-ഇ-ഇംതിയാസ് ലഭിച്ചിട്ടുണ്ട്. എന്നാല്‍, അദ്ദേഹം തന്റെ ശാസ്ത്ര ജീവിതം ഉപേക്ഷിച്ച് തീവ്രവാദത്തിന്റെ പാത സ്വീകരിച്ചു. 2000-ൽ, താലിബാനും അൽ-ഖ്വയ്ദയ്ക്കും ധനസഹായവും സാങ്കേതിക പിന്തുണയും നൽകുകയെന്ന ലക്ഷ്യത്തോടെ അദ്ദേഹം ‘ഉമ്മ തമീർ-ഇ-നൗ’ എന്ന പേരിൽ ഒരു സംഘടന സ്ഥാപിച്ചു. അദ്ദേഹത്തിന്റെ സംഘടനയെ അമേരിക്കൻ, യൂറോപ്യൻ രാജ്യങ്ങൾ തീവ്രവാദ സംഘടനകളുമായി ബന്ധമുള്ളതായി കണക്കാക്കിയിരുന്നു.
ഒസാമ ബിൻ ലാദനെ കണ്ടതായും ആണവായുധങ്ങളെക്കുറിച്ചുള്ള വിവരങ്ങൾ നൽകിയതായും വെളിപ്പെടുത്തിയതിനെത്തുടർന്ന് ഐക്യരാഷ്ട്രസഭയും മറ്റ് അന്താരാഷ്ട്ര സംഘടനകളും 2001 ൽ ഡോ. മഹമൂദിനെ അറസ്റ്റ് ചെയ്തു. ആണവായുധങ്ങളുടെ പ്രത്യാഘാതങ്ങളെക്കുറിച്ചും അവയുടെ നിർമ്മാണത്തെക്കുറിച്ചും ബഷീർ മഹമൂദ് ലാദന് വിശദീകരിച്ചു നൽകിയതായി റിപ്പോര്‍ട്ടുകളുണ്ടായിരുന്നു.
ഡോ. മഹ്മൂദ് ആണവായുധങ്ങളുമായി മാത്രമല്ല, വിചിത്രവും അവിശ്വസനീയവുമായ ശാസ്ത്രീയ ആശയങ്ങളുമായും ബന്ധപ്പെട്ടിരുന്നു. തന്റെ ‘മെക്കാനിക്സ് ഓഫ് ദി ഡൂംസ്ഡേ ആൻഡ് ലൈഫ് ആഫ്റ്റർ ഡെത്ത്’ എന്ന പുസ്തകത്തിൽ, ജിന്നുകൾ പ്ലാസ്മ കൊണ്ട് നിർമ്മിച്ച ഊർജ്ജ ഘടകങ്ങളാണെന്നും അവ ഉപയോഗിച്ച് വൈദ്യുതി ഉത്പാദിപ്പിക്കാൻ കഴിയുമെന്നും അദ്ദേഹം അവകാശപ്പെട്ടു. വിചിത്രമായ ആശയങ്ങളെ പിന്തുണച്ചതിനാൽ ഈ പുസ്തകം ധാരാളം വിവാദങ്ങൾക്ക് കാരണമായി.
അഹമ്മദ് ഷെരീഫ് ചൗധരിയുടെ കുടുംബത്തിന്റെ ഭീകരവാദ ചരിത്രം പാകിസ്താന്‍ സൈന്യത്തിന്റെ അവകാശ വാദങ്ങളെയും അവരുടെ ഭീകരവിരുദ്ധ പ്രചാരണത്തെയും കുറിച്ച് ചോദ്യങ്ങൾ ഉയർത്തുന്നു. ഭീകരതയ്‌ക്കെതിരായ പോരാട്ടത്തിൽ തങ്ങളുടെ സൈന്യം പങ്കാളികളാണെന്ന് പാക്കിസ്താന്‍ അവകാശപ്പെടുമ്പോൾ, സ്വന്തം സൈന്യത്തിലെ ഒരു മുതിർന്ന ഉദ്യോഗസ്ഥന് തീവ്രവാദികളെ പിന്തുണച്ച കുടുംബചരിത്രമുള്ള കാര്യം അവര്‍ വിസ്മരിക്കുന്നു.
