മക്ക–മദീന സുരക്ഷയിൽ വിട്ടുവീഴ്ചയില്ല; ‘മക്ക സംയുക്ത പ്രതിരോധ കരാർ’ നടപ്പാക്കിയെന്ന് റിപ്പോർട്ട്, യെമനിൽ ‘ഓപ്പറേഷൻ യെമൻ ഡോൺ’
റിയാദ്: മക്കയെയും മദീനയെയും ലക്ഷ്യമിട്ടുള്ള ആക്രമണശ്രമങ്ങൾ സംബന്ധിച്ച റിപ്പോർട്ടുകൾക്കിടെ യെമൻ സംഘർഷം പുതിയ ഘട്ടത്തിലേക്ക് നീങ്ങുന്നു. ഇറാൻ പിന്തുണയുള്ള ഹൂത്തികൾക്കെതിരെ സൗദി അറേബ്യ സൈനിക നീക്കം ശക്തമാക്കുന്നതിനൊപ്പം തുർക്കിയും പാക്കിസ്താനും സൗദിയുടെ സുരക്ഷയ്ക്ക് പിന്തുണ പ്രഖ്യാപിച്ചതായാണ് റിപ്പോർട്ട്. മൂന്ന് രാജ്യങ്ങളും ‘മക്ക സംയുക്ത പ്രതിരോധ കരാർ’ പ്രാബല്യത്തിൽ കൊണ്ടുവന്നതായും അവകാശപ്പെടുന്നു.
കരാറിന്റെ ഭാഗമായി അംഗരാജ്യങ്ങളിൽ ഏതെങ്കിലും ഒന്നിനെതിരെയുള്ള സായുധ ആക്രമണം മുഴുവൻ അംഗങ്ങൾക്കുമെതിരായ ആക്രമണമായി കണക്കാക്കുമെന്നാണ് റിപ്പോർട്ടുകൾ. ഇതോടെ സൗദിക്കെതിരെയുള്ള ആക്രമണമുണ്ടായാൽ റിയാദിനൊപ്പം അങ്കാറയും ഇസ്ലാമാബാദും പ്രതിരോധ നടപടികളിൽ പങ്കാളികളാകുമെന്ന സൂചനയാണ് പുറത്തുവരുന്നത്.
അതേസമയം, യെമനിൽ ഹൂത്തികൾക്കെതിരായ സൈനിക നടപടികളും ശക്തമാക്കിയിട്ടുണ്ട്. സൗദി നേതൃത്വത്തിലുള്ള സഖ്യസേനയും യെമന്റെ അന്താരാഷ്ട്ര അംഗീകാരമുള്ള സർക്കാരും ചേർന്ന് ‘ഓപ്പറേഷൻ യെമൻ ഡോൺ’ ആരംഭിച്ചതായാണ് വിവരം.
ഹൂത്തികളുടെ നിയന്ത്രണത്തിലുള്ള തലസ്ഥാനമായ സന തിരിച്ചുപിടിക്കുകയും അവരുടെ സൈനിക ആധിപത്യം അവസാനിപ്പിക്കുകയും ചെയ്യുകയാണ് ഓപ്പറേഷന്റെ പ്രധാന ലക്ഷ്യമെന്ന് യെമൻ പ്രസിഡൻഷ്യൽ ലീഡർഷിപ്പ് കൗൺസിൽ തലവൻ റഷാദ് അൽ-അലിമി പ്രഖ്യാപിച്ചതായും റിപ്പോർട്ടുണ്ട്.
സർക്കാർ സേനയ്ക്ക് പിന്തുണയായി വൻതോതിൽ വ്യോമാക്രമണം നടത്തിയെന്നും ഹൂത്തികളുടെ നിരവധി സൈനിക കേന്ദ്രങ്ങൾ ലക്ഷ്യമിട്ടെന്നും സഖ്യസേന അവകാശപ്പെടുന്നു.
മദീനയിലെ പ്രവാചകന്റെ പള്ളിയിലേക്ക് വൈദ്യുതി എത്തിക്കുന്ന വിതരണ കേന്ദ്രം ആക്രമിക്കപ്പെട്ടെന്ന റിപ്പോർട്ടാണ് സംഘർഷം കൂടുതൽ രൂക്ഷമാക്കിയത്. പുണ്യനഗരങ്ങളെ ലക്ഷ്യമിടാനുള്ള ഏതൊരു നീക്കവും അംഗീകരിക്കാനാവില്ലെന്ന കടുത്ത നിലപാടിലാണ് സൗദിയും സഖ്യകക്ഷികളും.
റിയാദിലും ദോഹയിലും നടന്ന ചർച്ചകളിൽ സൗദി അറേബ്യയുടെ ഭൂപ്രദേശിക അഖണ്ഡതയ്ക്കും ദേശീയ സുരക്ഷയ്ക്കുമെതിരായ ഭീഷണി കൂട്ടായ സുരക്ഷയ്ക്കുള്ള ഭീഷണിയായി കണക്കാക്കണമെന്ന നിലപാട് മൂന്ന് രാജ്യങ്ങളും ആവർത്തിച്ചതായാണ് വിവരം.
ദുബാബ്, ബാബ്, ഹാദിദ് തുടങ്ങിയ തന്ത്രപ്രധാന മേഖലകളുടെ നിയന്ത്രണം സൗദി പിന്തുണയുള്ള സേന തിരിച്ചുപിടിച്ചതായും റിപ്പോർട്ടുകളുണ്ട്. ചെങ്കടൽ തീരത്തും ബാബ് അൽ-മന്ദേബ് കടലിടുക്കിന് സമീപവും ഹൂത്തികളുടെ സ്വാധീനം വർധിച്ചതാണ് സൈനിക നീക്കം ശക്തമാക്കാൻ കാരണമായതെന്നാണ് വിലയിരുത്തൽ.
ഏഷ്യയെയും യൂറോപ്പിനെയും ബന്ധിപ്പിക്കുന്ന പ്രധാന സമുദ്രവ്യാപാര പാതകളിലൊന്നാണ് ബാബ് അൽ-മന്ദേബ്. അതിനാൽ ഇവിടെ സംഘർഷം രൂക്ഷമാകുന്നത് യെമനിലോ സൗദിയിലോ മാത്രം ഒതുങ്ങാതെ ആഗോള കപ്പൽഗതാഗതത്തെയും വ്യാപാരത്തെയും ബാധിക്കാനുള്ള സാധ്യതയും തള്ളിക്കളയാനാവില്ല.
ഹൂത്തികൾക്കെതിരായ പോരാട്ടത്തിൽ കൂടുതൽ രാജ്യങ്ങൾ നേരിട്ട് ഇടപെടുന്ന സാഹചര്യമുണ്ടായാൽ യെമൻ യുദ്ധം വിശാലമായ പ്രാദേശിക സംഘർഷമായി മാറുമെന്ന ആശങ്കയും ശക്തമാകുകയാണ്.
