സാൻ ഫ്രാൻസിസ്കോ: സ്രാവുകള്‍ നിറഞ്ഞ കടൽമേഖലകളും ശക്തമായ തിരമാലകളും കൊടുങ്കാറ്റുകളും ഉൾപ്പെടെയുള്ള പ്രതിസന്ധികളെ അതിജീവിച്ച് 900 മൈൽ ദൂരമുള്ള സാഹസിക നീന്തൽയാത്ര പൂർത്തിയാക്കി അമേരിക്കൻ നീന്തൽ താരം ചരിത്രനേട്ടം കൈവരിച്ചു. സമുദ്ര സംരക്ഷണത്തിന്റെ പ്രാധാന്യത്തെക്കുറിച്ച് പൊതുജനങ്ങളിൽ അവബോധം സൃഷ്ടിക്കുകയെന്ന ലക്ഷ്യത്തോടെ നടത്തിയ ഈ ദൗത്യത്തിലൂടെയാണ് സാൻ ഫ്രാൻസിസ്കോ സ്വദേശിനിയായ 33 കാരി കാതറിൻ ബ്രീഡ് ശ്രദ്ധേയമായ നേട്ടം സ്വന്തമാക്കിയത്.
കാലിഫോർണിയയുടെ തീരദേശത്തുകൂടി 900 മൈൽ നീന്തിയ ആദ്യ വ്യക്തിയെന്ന നേട്ടമാണ് കാതറിൻ ബ്രീഡ് സ്വന്തമാക്കിയത്. ശാരീരികവും മാനസികവുമായ സഹിഷ്ണുത പരീക്ഷിച്ച ഈ സാഹസികയാത്ര പൂർത്തിയാക്കാൻ 111 ദിവസമാണ് വേണ്ടിവന്നത്.
ജൂലൈ ഒന്നിന് ആരംഭിച്ച നീന്തൽ യാത്ര ഒക്ടോബർ 19ന് അമേരിക്കയുടെയും മെക്സിക്കോയുടെയും സമുദ്രാതിർത്തിയിൽ അവസാനിച്ചു. പ്രതികൂല കാലാവസ്ഥയും സമുദ്രത്തിലെ അപകടസാധ്യതകളും വകവയ്ക്കാതെയാണ് ബ്രീഡ് ലക്ഷ്യസ്ഥാനത്തെത്തിയത്.
യാത്രയ്ക്കിടെ പ്രതിദിനം അഞ്ച് മണിക്കൂർ വരെ നീന്തിയ ബ്രീഡ്, നീന്തിയ ദിവസങ്ങളിൽ ശരാശരി 10.3 മൈൽ ദൂരം പിന്നിട്ടു. ദീർഘദൂര സമുദ്രനീന്തലിന്റെ വെല്ലുവിളികളെ നേരിടാൻ പ്രത്യേക പരിശീലനവും കൃത്യമായ ആസൂത്രണവും ആവശ്യമായിരുന്നു. 52 അടി നീളമുള്ള ബോട്ടിൽ സഞ്ചരിച്ച സഹായസംഘം യാത്രയിലുടനീളം ബ്രീഡിനെ അനുഗമിക്കുകയും ആവശ്യമായ ഭക്ഷണവും മറ്റ് സഹായങ്ങളും ലഭ്യമാക്കുകയും ചെയ്തു.
തുടർച്ചയായ ശാരീരിക അധ്വാനത്തിനിടെ വിശ്രമത്തിനും ആരോഗ്യപരിപാലനത്തിനുമായി 18 ദിവസം നീന്തലിൽനിന്ന് ഇടവേളയെടുത്തു. കഠിനമായ വ്യായാമത്തിലൂടെ നഷ്ടപ്പെടുന്ന ഊർജം വീണ്ടെടുക്കുന്നതിനായി പ്രതിദിനം 6,000 കലോറിയിലധികം ഭക്ഷണം കഴിക്കേണ്ടിവന്നതായും റിപ്പോർട്ടിൽ പറയുന്നു.
സ്രാവുകളുടെ സാന്നിധ്യമുള്ള സമുദ്രഭാഗങ്ങളിലൂടെയുള്ള സഞ്ചാരം യാത്രയിലെ പ്രധാന വെല്ലുവിളികളിലൊന്നായിരുന്നു. ശക്തമായ തിരമാലകളും അപ്രതീക്ഷിത കാലാവസ്ഥാമാറ്റങ്ങളും കൊടുങ്കാറ്റുകളും ദൗത്യത്തെ കൂടുതൽ ദുഷ്കരമാക്കി. എന്നാൽ ജെല്ലിഫിഷുകളുടെ കുത്തോ മറ്റ് ഗുരുതര പരിക്കുകളോ നേരിടാതെ യാത്ര പൂർത്തിയാക്കാൻ ബ്രീഡിന് കഴിഞ്ഞു.
പര്യവേഷണത്തിന്റെ അവസാനഘട്ടത്തിൽ മലിനജലം കലർന്ന കടൽവെള്ളവുമായി സമ്പർക്കമുണ്ടാകുന്നതിലൂടെ അണുബാധയുണ്ടാകാനുള്ള സാധ്യതയും ആശങ്ക സൃഷ്ടിച്ചു. ഇതുമായി ബന്ധപ്പെട്ട ആരോഗ്യപ്രശ്നങ്ങൾ ഒഴിവാക്കുന്നതിനായി ആന്റിബയോട്ടിക്കുകൾ ഉപയോഗിച്ചതായും റിപ്പോർട്ടിൽ വ്യക്തമാക്കുന്നു.
അതേസമയം, വ്യക്തിഗത സാഹസികനേട്ടം സ്വന്തമാക്കുക എന്നതിലുപരി വലിയൊരു പാരിസ്ഥിതിക സന്ദേശം ലോകത്തിന് നൽകുകയെന്നതായിരുന്നു ഈ ദൗത്യത്തിന്റെ പ്രധാന ലക്ഷ്യമെന്ന് ബ്രീഡ് വ്യക്തമാക്കി.
സമുദ്ര മലിനീകരണം, കാലാവസ്ഥാ വ്യതിയാനം, സമുദ്രജീവികളുടെ ആവാസവ്യവസ്ഥ നേരിടുന്ന ഭീഷണികൾ എന്നിവയിലേക്ക് ലോകശ്രദ്ധ ആകർഷിക്കാനാണ് ഈ നീന്തൽയാത്രയിലൂടെ ശ്രമിച്ചതെന്ന് അവർ പറഞ്ഞു. മനുഷ്യന്റെ ഇടപെടലുകൾ മൂലം സമുദ്ര ആവാസവ്യവസ്ഥകൾ കൂടുതൽ ദുർബലമാകുന്ന സാഹചര്യത്തിൽ സമുദ്രസംരക്ഷണത്തിനായി അടിയന്തര നടപടികൾ സ്വീകരിക്കേണ്ടതിന്റെ ആവശ്യകതയും അവർ ചൂണ്ടിക്കാട്ടി.
മനുഷ്യന്റെ അസാധാരണമായ ശാരീരിക സഹിഷ്ണുതയുടെയും മനക്കരുത്തിന്റെയും ഉദാഹരണമായി മാറിയ കാതറിൻ ബ്രീഡിന്റെ 900 മൈൽ നീന്തൽയാത്ര, സമുദ്രങ്ങളെയും സമുദ്രജീവികളെയും സംരക്ഷിക്കേണ്ടതിന്റെ പ്രാധാന്യം ഓർമിപ്പിക്കുന്ന ശക്തമായ സന്ദേശം കൂടിയായി മാറിയിരിക്കുകയാണ്.
