ന്യൂഡൽഹി: മൊഹാലിയിലെ പഞ്ചാബ് പോലീസ് ഇന്റലിജൻസ് ആസ്ഥാനത്ത് മെയ് 9 ന് നടന്ന ആർപിജി ആക്രമണവുമായി ബന്ധപ്പെട്ട് തിരയുന്ന ഒരാൾ ഉൾപ്പെടെ രണ്ട് തീവ്രവാദികളെ ഡൽഹി പോലീസിന്റെ സ്‌പെഷ്യൽ സെൽ പിടികൂടിയതായി ഒരു ഉദ്യോഗസ്ഥൻ അറിയിച്ചു.
“ആഗസ്റ്റ് 4 ന് ഹരിയാനയിൽ ഇംപ്രൊവൈസ്ഡ് എക്‌സ്‌പ്ലോസീവ് ഉപകരണം (ഐഇഡി) കണ്ടെടുത്തതുമായി ബന്ധപ്പെട്ട് പിടികൂടിയവരില്‍ ഒരാള്‍ അർഷ്ദീപ് സിംഗ് എന്നയാളാണെന്ന് പോലീസ് പറഞ്ഞു. ഇയാളാണ് ആർപിജി ആക്രമണങ്ങളുടെ സൂത്രധാരൻ. ഫൈസാബാദ് സ്വദേശിയാണ് ഇയാള്‍. കാനഡ ആസ്ഥാനമായുള്ള ലഖ്ബീർ ലാൻഡയുമായും പാക്കിസ്താന്‍ ആസ്ഥാനമായുള്ള ഹർവീന്ദർ സിംഗ് റിന്ഡയുമായും ഇയാള്‍ നേരിട്ട് ബന്ധപ്പെട്ടിട്ടുണ്ട്. പിടികൂടിയവരില്‍ ഒരാള്‍ക്ക് പ്രായപൂര്‍ത്തിയാകാത്തതിനാല്‍ പേര് വെളിപ്പെടുത്തിയിട്ടില്ല.
കുരുക്ഷേത്ര ജില്ലയിലെ ഷഹാബാദ് നഗരത്തിന് സമീപം ഹരിയാന പോലീസിന്റെ പ്രത്യേക ദൗത്യസേന 1.3 കിലോഗ്രാം ആർഡിഎക്സ് നിറച്ച ഐഇഡി കണ്ടെടുത്തു.
ഈ വർഷം മെയ് 9 ന് പഞ്ചാബിലെ മൊഹാലിയിലുള്ള സംസ്ഥാന ഇന്റലിജൻസ് ആസ്ഥാനത്താണ് ആർപിജി ആക്രമണം നടന്നത്.
