തിരുവനന്തപുരം: തിരുവനന്തപുരം ഗവണ്മെന്റ് മെഡിക്കൽ കോളേജിൽ വനിതാ ഡോക്ടർക്ക് നേരെയുണ്ടായ ആക്രമണം മെഡിക്കൽ പ്രൊഫഷനിലേക്ക് ഒരുങ്ങുന്ന ഡോക്ടർമാരെ ആശങ്കയിലാഴ്ത്തി. നവംബർ 23 ന് അർദ്ധരാത്രി ഐസിയുവിന് മുന്നിൽ വെച്ച് ഒരു വനിതാ ഡോക്ടറെ രോഗിയുടെ കൂട്ടിരിപ്പുകാരന്‍ അടിവയറ്റില്‍ ചവിട്ടുകയായിരുന്നു. ഒരു കൂട്ടം ആളുകൾ ഡോക്ടറെ വളഞ്ഞു വെച്ചിരിക്കുന്നതും സിസിടിവി ദൃശ്യങ്ങളില്‍ കാണിച്ചു. ആക്രമണത്തിൽ നിന്ന് ഡോക്ടര്‍ ഒരുവിധം രക്ഷപ്പെട്ടെങ്കിലും സംഭവം അവരെ ആകെ തകർത്തു.”ഒരു ന്യൂറോ സർജൻ ആകാനുള്ള എന്റെ ആഗ്രഹം പുനർവിചിന്തനം ചെയ്യുകയാണിപ്പോള്‍. കൂടാതെ, ഒരു ഡോക്ടറുടെ കരിയർ പോലും,” അവരെ ആശുപത്രിയിൽ സന്ദർശിച്ച ഐഎംഎ സംസ്ഥാന പ്രസിഡന്റ് സുൽഫി പറഞ്ഞു.
കേരള മെഡിക്കൽ പോസ്റ്റ് ഗ്രാജ്വേറ്റ് അസോസിയേഷൻ ഡോക്ടറുടെ പ്രശ്നം ഏറ്റെടുക്കുകയും നീതി ആവശ്യപ്പെടുകയും ചെയ്തു. ഇത്തരം ആക്രമണങ്ങൾ ഇനിയും ആവർത്തിക്കുമെന്നും പുതിയൊരു ഇര ഉണ്ടാകുമോയെന്നും അവർ ആശങ്കപ്പെടുന്നു. “സുരക്ഷിത കേന്ദ്രമെന്നു കരുതപ്പെടുന്ന മെഡിക്കൽ കോളേജുകളിൽ ഇത്തരം ആക്രമണങ്ങൾ ഉണ്ടാകുന്നത് അലോസരപ്പെടുത്തുന്നതാണ്. പ്രാക്ടീസ് ചെയ്യാൻ പെരിഫറൽ ആശുപത്രികളിൽ പോയാൽ നമുക്ക് എന്ത് സംഭവിക്കും,” കേരള മെഡിക്കൽ പോസ്റ്റ് ഗ്രാജുവേറ്റ് അസോസിയേഷൻ തിരുവനന്തപുരം യൂണിറ്റ് പ്രസിഡന്റ് ഡോ. റൂവൈസ് പറഞ്ഞു.
അറസ്റ്റിന് സാധ്യതയില്ലെന്നും പ്രതി ജാമ്യം നേടാനുള്ള ശ്രമത്തിലാണെന്നും പോലീസ് ഉദ്യോഗസ്ഥരിൽ നിന്ന് അദ്ദേഹം മനസ്സിലാക്കി. “സർക്കാർ കുറ്റവാളിയെ ഉടൻ അറസ്റ്റ് ചെയ്യുകയും അത്തരം ആക്രമണങ്ങൾ വെച്ചുപൊറുപ്പിക്കില്ലെന്ന് പൊതുജനങ്ങൾക്ക് സന്ദേശം നൽകുകയും ചെയ്യണമായിരുന്നു,” ഡോ റൂവൈസ് പറഞ്ഞു.
ഞായറാഴ്ച വരെ അറസ്റ്റ് ഉണ്ടായില്ലെങ്കിൽ സമരം ശക്തമാക്കാനാണ് കെഎംപിജിഎ ആലോചിക്കുന്നത്. റസിഡന്റ് ഡോക്ടര്‍മാരുടെ സമരത്തിന് പിന്തുണയുമായി ഡോക്ടർമാരുടെ സംഘടന രംഗത്തെത്തി. “ഈ വിഷയത്തിൽ ഞങ്ങൾക്ക് വിദ്യാർത്ഥികളെ വെറുതെ വിടാൻ കഴിയില്ല. ഡ്യൂട്ടി ചെയ്തിരുന്ന ഒരു വനിതയ്ക്ക് നേരെയുണ്ടായ ആക്രമണമായിരുന്നു അത്. ഒരു മുതിർന്ന ഡോക്ടർ ആയിരുന്നെങ്കില്‍ അടിവയറ്റിലേറ്റ ചവിട്ടില്‍ നിന്ന് രക്ഷപ്പെടുമായിരുന്നില്ല,” കേരള ഗവൺമെന്റ് മെഡിക്കൽ കോളേജ് ടീച്ചേഴ്‌സ് അസോസിയേഷൻ (കെജിഎംസിടിഎ) സംസ്ഥാന പ്രസിഡന്റ് ഡോ നിർമൽ ഭാസ്‌കർ പറഞ്ഞു.
ആക്രമണങ്ങൾ തുടർച്ചയായി ആവർത്തിക്കുമ്പോഴും സർക്കാരിൽ നിന്നും സമൂഹത്തിൽ നിന്നും വേണ്ടത്ര പിന്തുണ ലഭിച്ചിക്കുന്നില്ല എന്ന ആശങ്ക ഡോക്ടർമാർ പങ്കുവെക്കുന്നു. ആക്രമണത്തെ അപലപിച്ച് ആരോഗ്യമന്ത്രി വീണാ ജോർജിന്റെ ഫേസ്ബുക്ക് പോസ്റ്റ് അവർ ഗൗരവമായി എടുത്തില്ല.
ഇത്തരം ആക്രമണങ്ങൾ തടയാൻ ബഹുമുഖ സമീപനം ആവശ്യമാണെന്ന് കരുതുന്ന ആരോഗ്യ വിദഗ്ധരുണ്ട്. പെരിഫറൽ ആശുപത്രികൾ ശക്തിപ്പെടുത്തുകയും ജീവനക്കാരെ വർധിപ്പിക്കുകയും മികച്ച സുരക്ഷ നൽകുകയും ചെയ്തുകൊണ്ട് തിരക്ക് കുറയ്ക്കുന്നത് ഇതിൽ ഉൾപ്പെടുന്നു.
“സർക്കാർ ആരോഗ്യ സംവിധാനം ഇക്കാലത്ത് എളുപ്പമുള്ള ലക്ഷ്യമായി മാറിയിരിക്കുന്നു. രോഗിയെ രക്ഷിക്കാൻ കഴിയാതെ വന്നിട്ടും ഒരു പ്രതിഷേധവും ഉരിയാടാതെ ആശുപത്രി ബില്ലുകൾ അടപ്പിക്കുന്ന സ്വകാര്യ ആശുപത്രികളിൽ ഇത്തരം ആക്രമണങ്ങൾ ഉണ്ടാകാറില്ല,” ഐഎംഎ തിരുവനന്തപുരം ബ്രാഞ്ച് സെക്രട്ടറി ഡോ അൽത്താഫ് പറഞ്ഞു. 4,000 കിടക്കകളുള്ള ഒരു സര്‍ക്കാര്‍ മെഡിക്കല്‍ കോളേജ് ആശുപത്രി കൈകാര്യം ചെയ്യാൻ പരിശീലനം ലഭിച്ച അഡ്മിനിസ്ട്രേറ്റീവ് കേഡറുകൾ ഇല്ലെന്ന് അദ്ദേഹം ചൂണ്ടിക്കാട്ടി. അദ്ധ്യാപന ചുമതലയുള്ള പ്രൊഫസർ കൂടിയായ ഒരു സൂപ്രണ്ടാണ് ഇതെല്ലാം കൈകാര്യം ചെയ്യുന്നത്.
