ചെങ്ങന്നൂർ: ദേശീയ സെൻസസ് സ്വയം എണ്ണൽ പ്രക്രിയയിൽ ഹയർ സെക്കൻഡറി എൻഎസ്എസ് യൂണിറ്റുകൾ ശ്രദ്ധേയമായ നേട്ടങ്ങൾ കൈവരിച്ചു. ജില്ലയിലെ ഹയർ സെക്കൻഡറി എൻഎസ്എസ് യൂണിറ്റുകളുടെ നേതൃത്വത്തിൽ മൊത്തം 5,812 വീടുകളിൽ സ്വയം എണ്ണൽ വിജയകരമായി പൂർത്തിയാക്കി.
‘നോട്ട് മീ ബട്ട് യു’ എന്ന സാമൂഹിക സേവന മുദ്രാവാക്യം അടിസ്ഥാനമാക്കി, പൊതുജനങ്ങളുടെ പൂർണ്ണ സഹകരണത്തോടെ വിദ്യാർത്ഥി വളണ്ടിയർമാരാണ് ഈ നേട്ടം കൈവരിച്ചത്. ഡിജിറ്റൽ സെൻസസ് പ്രക്രിയയിൽ പൊതുജനങ്ങളെ ഉൾപ്പെടുത്തുന്നതിൽ എൻഎസ്എസ് യൂണിറ്റുകളുടെ പ്രവർത്തനം മാതൃകാപരമാണ്.
സ്വയം എണ്ണൽ വിജയകരമായി പൂർത്തിയാക്കിയതിന്റെ ഔദ്യോഗിക സർട്ടിഫിക്കറ്റ് ചെങ്ങന്നൂർ മേഖല ഹയർ സെക്കൻഡറി വിദ്യാഭ്യാസ ഡെപ്യൂട്ടി ഡയറക്ടർ കെ. സുധ എഡിഎം ആർ. രാജലക്ഷ്മിക്ക് കളക്ടറേറ്റിൽ നടന്ന ചടങ്ങിൽ കൈമാറി.
ചടങ്ങിൽ എം.ടി.എച്ച്.എസ്.എസ് പ്രിൻസിപ്പൽ ഹേമ മേരി മാത്യു, എൻ.എസ്.എസ് ക്ലസ്റ്റർ കോഓർഡിനേറ്റർ എം.എസ്. സുമ, അരുൺ മോഹൻ, ജില്ലാ കോഓർഡിനേറ്റർ എ. അരുൺ, പ്രോഗ്രാം ഓഫീസർമാരായ സി.കെ. സജി, ബിന്ദുമോൾ, സനിത മോഹൻ, അരവിന്ദ് തുടങ്ങിയവർ പങ്കെടുത്തു.
പിആര്ഡി, കേരള സര്ക്കാര്
