ന്യൂ സിറ്റി, ന്യൂയോർക്ക് — ഓഗസ്റ്റ് 24, 2026: റോക്ക്ലാൻഡ് കൗണ്ടി ലെജിസ്ലേച്ചർ വൈസ് ചെയർ ബഹുമാനപ്പെട്ട ഡോ. ആനി പോൾ വിഭാവനം ചെയ്ത് മുന്നോട്ടുവച്ച പീസ് ഗാർഡന്റെ ശിലാസ്ഥാപനച്ചടങ്ങ് ന്യൂ സിറ്റിയിൽ നടന്നു. മഹാത്മാഗാന്ധിയുടെയും ഡോ. മാർട്ടിൻ ലൂഥർ കിങ് ജൂനിയറിന്റെയും സമാധാനം, അഹിംസ, സമത്വം, നീതി എന്നീ മഹത്തായ ആദർശങ്ങളെ ആദരിക്കുന്ന ചരിത്രപ്രധാനമായ പദ്ധതിയാണിത്.
ന്യൂ സിറ്റിയിലെ അലിസൺ–പാരിസ് കൗണ്ടി ഓഫീസ് കെട്ടിടത്തിനും റോക്ക്ലാൻഡ് കൗണ്ടി കോടതിക്കും ഇടയിലാണ് പീസ് ഗാർഡൻ നിർമിക്കുന്നത്. പീസ് ഗാർഡൻ ഡോ. ആനി പോളിന്റെ സംരംഭമാണ്. ഉദ്യാനത്തിൽ സ്ഥാപിക്കുന്ന മഹാത്മാഗാന്ധിയുടെ പ്രതിമ ഇന്ത്യാ ഗവൺമെന്റ് ന്യൂയോർക്കിലെ ഇന്ത്യൻ കോൺസുലേറ്റ് ജനറൽ മുഖേന സംഭാവന ചെയ്തു. ഡോ. മാർട്ടിൻ ലൂഥർ കിങ് ജൂനിയറിന്റെ പ്രതിമയുമായി ബന്ധപ്പെട്ട പ്രവർത്തനങ്ങൾക്ക് റോക്ക്ലാൻഡ് കൗണ്ടി ലെജിസ്ലേറ്റർ ടോണി എൽ. ഏൾ നേതൃത്വം നൽകുന്നു.
ഡോ. ആനി പോളിന്റെ വിശിഷ്ടമായ പൊതുസേവനയാത്രയിലെ മറ്റൊരു പൊൻതൂവലാണ് ഈ പീസ് ഗാർഡൻ. ന്യൂയോർക്ക് സംസ്ഥാനത്ത് കൗണ്ടി ലെജിസ്ലേറ്ററായി തിരഞ്ഞെടുക്കപ്പെട്ട ആദ്യ ഇന്ത്യൻ-അമേരിക്കൻ വനിതയും അമേരിക്കയിൽ കൗണ്ടി ലെജിസ്ലേറ്റീവ് പദവി വഹിക്കുന്ന ആദ്യ ഇന്ത്യൻ നഴ്സുമായ ഡോ. പോൾ, വിവിധ സമൂഹങ്ങൾക്കിടയിൽ സൗഹൃദത്തിന്റെയും സഹകരണത്തിന്റെയും പാലങ്ങൾ പണിയുന്നതിനായി നിരന്തരം പ്രവർത്തിച്ചുവരുന്നു.
“മഹാത്മാഗാന്ധിയുടെയും ഡോ. മാർട്ടിൻ ലൂഥർ കിങ് ജൂനിയറിന്റെയും ജീവിതസന്ദേശങ്ങൾ വരുംതലമുറകൾക്ക് പകർന്നുനൽകുന്ന ഒരു സ്ഥിരം സ്മാരകമായിരിക്കും ഈ പീസ് ഗാർഡൻ. വ്യത്യസ്ത പശ്ചാത്തലങ്ങളിൽ നിന്നുള്ള ആളുകൾ ഇവിടെ എത്തി സമാധാനം, നീതി, ഐക്യം, അഹിംസ എന്നീ മൂല്യങ്ങളെക്കുറിച്ച് ചിന്തിക്കണമെന്നാണ് എന്റെ ആഗ്രഹം,” ഡോ. ആനി പോൾ പറഞ്ഞു.
പദ്ധതിക്ക് പിന്തുണ നൽകിയ ലെജിസ്ലേച്ചർ ചെയർമാൻ ജേ ഹുഡ് ജൂനിയർ, കൗണ്ടി എക്സിക്യൂട്ടീവ് എഡ് ഡേ, ലെജിസ്ലേറ്റർ ടോണി എൽ. ഏൾ, സഹപ്രവർത്തകരായ ലെജിസ്ലേറ്റർമാർ, കൗണ്ടി ജീവനക്കാർ എന്നിവർക്ക് ഡോ. പോൾ നന്ദി അറിയിച്ചു. മഹാത്മാഗാന്ധിയുടെ പ്രതിമ സംഭാവന ചെയ്ത ഇന്ത്യാ ഗവൺമെന്റിനും ന്യൂയോർക്കിലെ ഇന്ത്യൻ കോൺസുലേറ്റ് ജനറലിനും, പ്രത്യേകിച്ച് കോൺസൽ ജനറൽ അംബാസഡർ ബിനയ എസ്. പ്രധാൻ, കോൺസൽ പിയൂഷ് സിങ്, സിബു നായർ എന്നിവർക്കും അവർ ഹൃദയപൂർവം നന്ദി രേഖപ്പെടുത്തി.
റോക്ക്ലാൻഡ് കൗണ്ടിയിലെ എല്ലാ സമൂഹങ്ങളെയും ഒരുമിപ്പിക്കുന്ന സമാധാനത്തിന്റെയും സൗഹൃദത്തിന്റെയും ശാശ്വത പ്രതീകമായി ഈ പീസ് ഗാർഡൻ നിലകൊള്ളും.
