‘പുതുയുഗ വഴിയിൽ നാമുയരുന്നു… നാടുണരുന്നു…’ എന്ന സന്ദേശവുമായി രണ്ടാഴ്ച നീളുന്ന പരിപാടികൾ; വിദ്യാഭ്യാസം, തൊഴിൽ, സ്വയംപര്യാപ്തത എന്നിവയ്ക്ക് ഊന്നൽ
കൊച്ചി: സാമൂഹിക നീതിയും തുല്യാവസരവും ഉറപ്പാക്കി പാർശ്വവൽക്കരിക്കപ്പെട്ട ജനവിഭാഗങ്ങളെ സമൂഹത്തിന്റെ മുഖ്യധാരയിലേക്ക് കൂടുതൽ ശക്തമായി കൈപിടിച്ചുയർത്തുകയെന്ന ലക്ഷ്യത്തോടെ സംസ്ഥാനത്ത് ‘സാമൂഹ്യ ഐക്യദാർഢ്യ പക്ഷാചരണം’ സംഘടിപ്പിക്കുന്നു. ഒക്ടോബർ 2 മുതൽ 15 വരെ നീളുന്ന പക്ഷാചരണത്തിന്റെ ഭാഗമായി സംസ്ഥാനത്തുടനീളം വിവിധ ക്ഷേമ, ബോധവത്കരണ, നൈപുണ്യ വികസന പരിപാടികൾ നടക്കും.
സംസ്ഥാന സർക്കാരിന്റെ പട്ടികജാതി-പട്ടികവർഗ്ഗ, പിന്നാക്ക ക്ഷേമ വകുപ്പുകളുടെ ആഭിമുഖ്യത്തിലാണ് ഈ വർഷത്തെ പക്ഷാചരണം സംഘടിപ്പിക്കുന്നത്. ‘പുതുയുഗ വഴിയിൽ നാമുയരുന്നു… നാടുണരുന്നു…’ എന്ന സന്ദേശമാണ് ഇത്തവണത്തെ പരിപാടികൾ മുന്നോട്ടുവയ്ക്കുന്നത്.
പക്ഷാചരണത്തിന്റെ സംസ്ഥാനതല ഉദ്ഘാടനം ഒക്ടോബർ 2ന് രാവിലെ 10ന് എറണാകുളം മഹാരാജാസ് കോളേജ് ഓഡിറ്റോറിയത്തിൽ മുഖ്യമന്ത്രി വി.ഡി. സതീശൻ നിർവഹിക്കും. പട്ടികജാതി-പട്ടികവർഗ്ഗ, പിന്നാക്ക ക്ഷേമ വകുപ്പ് മന്ത്രി കെ.എ. തുളസി ടീച്ചർ ചടങ്ങിൽ അധ്യക്ഷത വഹിക്കും.
മന്ത്രിമാർ, എംപിമാർ, എംഎൽഎമാർ, വിവിധ തദ്ദേശസ്വയംഭരണ സ്ഥാപനങ്ങളിലെ ജനപ്രതിനിധികൾ, വകുപ്പ് ഉദ്യോഗസ്ഥർ തുടങ്ങിയവർ ഉദ്ഘാടന പരിപാടിയിൽ പങ്കെടുക്കും.
പട്ടികജാതി വികസന വകുപ്പിന്റെ നൈപുണ്യ വികസന പദ്ധതിയിലൂടെ തൊഴിൽ നേടിയ ഉദ്യോഗാർഥികൾക്കുള്ള ഓഫർ ലെറ്ററുകളുടെ വിതരണവും ഉദ്ഘാടന ചടങ്ങിന്റെ ഭാഗമായി നടക്കും. ഭക്ഷ്യ-സിവിൽ സപ്ലൈസ് വകുപ്പ് മന്ത്രി അനൂപ് ജേക്കബ് ഓഫർ ലെറ്ററുകൾ വിതരണം ചെയ്യും.
കേരള സംസ്ഥാന പിന്നാക്ക വിഭാഗ വികസന കോർപ്പറേഷന്റെ (KSBCDC) സി.ഡി.എസ് മൈക്രോ ക്രെഡിറ്റ് വായ്പാ വിതരണവും ചടങ്ങിനോടനുബന്ധിച്ച് നടക്കും. ഉന്നതവിദ്യാഭ്യാസ വകുപ്പ് മന്ത്രി റോജി എം. ജോൺ വായ്പാ വിതരണം നിർവഹിക്കും.
2025-26 അധ്യയന വർഷത്തെ ഹയർ സെക്കൻഡറി പരീക്ഷയിൽ മികച്ച വിജയം നേടിയ ഒബിസി വിദ്യാർഥികൾക്കുള്ള പുരസ്കാരങ്ങൾ ഫിഷറീസ്-സാമൂഹ്യനീതി വകുപ്പ് മന്ത്രി വി.ഇ. അബ്ദുൾ ഗഫൂർ വിതരണം ചെയ്യും. വിവിധ മേഖലകളിൽ മികവ് തെളിയിച്ച കലാ-കായിക പ്രതിഭകളെയും ചടങ്ങിൽ ആദരിക്കും.
സമൂഹത്തിൽ വിവിധ കാരണങ്ങളാൽ പാർശ്വവൽക്കരിക്കപ്പെട്ട ജനവിഭാഗങ്ങൾക്ക് ആത്മവിശ്വാസം പകരുകയും വിദ്യാഭ്യാസം, തൊഴിൽ, സംരംഭകത്വം തുടങ്ങിയ മേഖലകളിൽ കൂടുതൽ അവസരങ്ങൾ ലഭ്യമാക്കി സ്വയംപര്യാപ്തരാക്കുകയും ചെയ്യുകയാണ് പക്ഷാചരണത്തിന്റെ പ്രധാന ലക്ഷ്യം.
ക്ഷേമപദ്ധതികളെക്കുറിച്ചുള്ള വിവരങ്ങൾ അർഹരായവരിലേക്ക് എത്തിക്കുക, വിദ്യാഭ്യാസ-തൊഴിൽ അവസരങ്ങളെക്കുറിച്ച് ബോധവത്കരണം നടത്തുക, നൈപുണ്യ വികസനത്തിനും സാമ്പത്തിക ശാക്തീകരണത്തിനും വഴിയൊരുക്കുക തുടങ്ങിയവയ്ക്കും പക്ഷാചരണത്തിൽ പ്രാധാന്യം നൽകും.
രണ്ടാഴ്ച നീളുന്ന പരിപാടികളുടെ ഭാഗമായി വിവിധ ജില്ലകളിൽ ബോധവത്കരണ പരിപാടികൾ, ക്ഷേമപദ്ധതി പരിചയപ്പെടുത്തലുകൾ, നൈപുണ്യ-തൊഴിൽ കേന്ദ്രീകൃത പ്രവർത്തനങ്ങൾ, സാമൂഹിക ശാക്തീകരണ പരിപാടികൾ എന്നിവ സംഘടിപ്പിക്കും. സാമൂഹിക ഐക്യവും തുല്യതയും ശക്തിപ്പെടുത്തുന്നതിനൊപ്പം പിന്നാക്ക-പാർശ്വവൽക്കരിക്കപ്പെട്ട വിഭാഗങ്ങളുടെ സമഗ്ര മുന്നേറ്റത്തിന് കൂടുതൽ ഊർജം നൽകുകയാണ് പക്ഷാചരണത്തിലൂടെ സർക്കാർ ലക്ഷ്യമിടുന്നത്.
