ചൈനയുടെ വളർച്ചയും അമേരിക്കയുടെ മാറുന്ന സമീപനവും ആഗോള ശക്തിസമവാക്യങ്ങളെ പുനർനിർവചിക്കുന്നുവെന്ന് വിദേശകാര്യ മന്ത്രി; ഇന്ത്യയുൾപ്പെടെയുള്ള രാജ്യങ്ങളുടെ സ്വാശ്രയത്വവും പുതിയ കൂട്ടുകെട്ടുകളും നിർണായകം
ബെർലിൻ: ആഗോള രാഷ്ട്രീയക്രമം അതിവേഗം മാറുകയാണെന്നും അമേരിക്കയും ചൈനയും തമ്മിലുള്ള ശക്തമായ മത്സരം പുതിയ ലോകക്രമത്തിന്റെ പ്രധാന ചാലകശക്തിയായി മാറിയിരിക്കുകയാണെന്നും വിദേശകാര്യ മന്ത്രി എസ്. ജയ്ശങ്കർ. ചൈനയുടെ വർധിച്ചുവരുന്ന സാമ്പത്തിക-രാഷ്ട്രീയ സ്വാധീനത്തിനൊപ്പം അമേരിക്കയുടെ സമീപനത്തിലും വലിയ മാറ്റമാണ് പ്രകടമാകുന്നതെന്ന് അദ്ദേഹം ചൂണ്ടിക്കാട്ടി.
ജർമ്മനിയിൽ നടന്ന 62-ാമത് മ്യൂണിക്ക് സുരക്ഷാ സമ്മേളനത്തിൽ സംസാരിക്കുകയായിരുന്നു ജയ്ശങ്കർ. നിലവിലെ ആഗോള സാഹചര്യത്തെ പ്രധാനമായും മൂന്ന് ഘടകങ്ങളാണ് സ്വാധീനിക്കുന്നതെന്ന് അദ്ദേഹം പറഞ്ഞു. യുഎസ്–ചൈന മത്സരം, ഇന്ത്യ ഉൾപ്പെടെയുള്ള വളർന്നുവരുന്ന രാജ്യങ്ങളുടെ വർധിച്ച ആത്മവിശ്വാസവും സ്വാശ്രയത്വവും, അപകടസാധ്യത കുറയ്ക്കാൻ രാജ്യങ്ങൾ രൂപീകരിക്കുന്ന പുതിയ പങ്കാളിത്തങ്ങൾ എന്നിവയാണ് അവ.
അമേരിക്ക വലിയൊരു പരിവർത്തനത്തിലൂടെയാണ് കടന്നുപോകുന്നതെന്നും അത് അവരുടെ സ്വന്തം നയപരമായ തിരഞ്ഞെടുപ്പുകളുടെ ഫലമാണെന്നും ജയ്ശങ്കർ വിലയിരുത്തി. ആഗോള വിഷയങ്ങളിൽ വാഷിങ്ടൺ സ്വീകരിക്കുന്ന പുതിയ സമീപനം അന്താരാഷ്ട്ര ശക്തിസമവാക്യത്തിലും പ്രതിഫലിക്കുന്നുണ്ടെന്ന് അദ്ദേഹം വ്യക്തമാക്കി.
ലോകക്രമത്തിലെ രണ്ടാമത്തെ പ്രധാന മാറ്റം ചൈനയുടെ ഉയർച്ചയാണെന്ന് ജയ്ശങ്കർ പറഞ്ഞു. ആഗോള ഉൽപ്പാദനത്തിൽ ചൈനയുടെ പങ്ക് ഏകദേശം മൂന്നിലൊന്നിലേക്ക് എത്തിയതോടെ ആ സാമ്പത്തിക കരുത്ത് രാഷ്ട്രീയ സ്വാധീനമായും മാറുകയാണെന്ന് അദ്ദേഹം ചൂണ്ടിക്കാട്ടി.
ചൈനയ്ക്ക് സ്വന്തം സ്ഥാനത്തെയും പ്രാധാന്യത്തെയും കുറിച്ച് വ്യക്തമായ കാഴ്ചപ്പാടുണ്ട്. ആ ആത്മവിശ്വാസവും സാമ്പത്തിക കരുത്തും രാജ്യത്തിന്റെ വിദേശനയത്തിലും ആഗോള ഇടപെടലുകളിലും ശക്തമായി പ്രതിഫലിക്കുന്നുവെന്നും ജയ്ശങ്കർ പറഞ്ഞു.
യുഎസും ചൈനയും തമ്മിലുള്ള മത്സരം രണ്ട് രാജ്യങ്ങൾക്കിടയിലെ സാധാരണ ശക്തിപോരാട്ടമായി മാത്രം കാണാനാകില്ല. സാമ്പത്തികം, സാങ്കേതികവിദ്യ, വ്യാപാരം തുടങ്ങി വിവിധ മേഖലകളിലെ ശേഷികൾ ഇരുരാജ്യങ്ങളും തന്ത്രപരമായി പ്രയോജനപ്പെടുത്തുകയാണ്.
അതേസമയം, കടുത്ത മത്സരത്തിനിടയിലും യുഎസിനും ചൈനയ്ക്കുമിടയിൽ ആഴത്തിലുള്ള സാമ്പത്തിക പരസ്പരാശ്രിതത്വം തുടരുന്നുണ്ടെന്നതും പുതിയ ലോകക്രമത്തിന്റെ സങ്കീർണത വർധിപ്പിക്കുന്നതായി ജയ്ശങ്കർ ചൂണ്ടിക്കാട്ടി.
ഇന്ത്യ ഉൾപ്പെടെയുള്ള വളർന്നുവരുന്ന രാജ്യങ്ങൾ സ്വന്തം ദേശീയ താൽപ്പര്യങ്ങളെ കൂടുതൽ വ്യക്തമായി തിരിച്ചറിയുകയും തീരുമാനങ്ങളിൽ കൂടുതൽ സ്വാതന്ത്ര്യം തേടുകയും ചെയ്യുന്നുവെന്ന് ജയ്ശങ്കർ പറഞ്ഞു. ഇന്ത്യയിൽ വ്യാപകമായി ഉപയോഗിക്കുന്ന ‘സ്വാശ്രയം’ എന്ന ആശയം പല രാജ്യങ്ങളുടെയും സമീപനത്തിൽ വ്യത്യസ്ത രൂപങ്ങളിൽ പ്രകടമാകുന്നുണ്ടെന്നും അദ്ദേഹം വ്യക്തമാക്കി.
എല്ലാ വിഷയങ്ങളിലും ഒരേ നിലപാട് സ്വീകരിക്കുന്ന രാജ്യങ്ങൾ മാത്രമേ പരസ്പരം സഹകരിക്കാനാകൂ എന്ന പഴയ ധാരണ മാറുകയാണ്. പ്രത്യേക വിഷയങ്ങളിൽ താൽപ്പര്യങ്ങൾ ഒത്തുചേരുന്ന രാജ്യങ്ങൾ അതത് മേഖലകളിൽ ഒന്നിച്ച് പ്രവർത്തിക്കുന്ന പുതിയ മാതൃകയാണ് രൂപപ്പെടുന്നതെന്ന് അദ്ദേഹം പറഞ്ഞു.
ഇന്ത്യ–മിഡിൽ ഈസ്റ്റ്–യൂറോപ്പ് സാമ്പത്തിക ഇടനാഴി, ഇന്റർനാഷണൽ നോർത്ത്–സൗത്ത് ട്രാൻസ്‌പോർട്ട് കോറിഡോർ, നോർത്തേൺ സീ റൂട്ട്, ബ്രിക്‌സ്, ഇന്റർനാഷണൽ സോളാർ അലയൻസ്, കോയലിഷൻ ഫോർ ഡിസാസ്റ്റർ റെസിലിയന്റ് ഇൻഫ്രാസ്ട്രക്ചർ തുടങ്ങിയവയെ ജയ്ശങ്കർ ഉദാഹരണങ്ങളായി ചൂണ്ടിക്കാട്ടി.
പൊതുവായ താൽപ്പര്യങ്ങളും ലക്ഷ്യങ്ങളും മുൻനിർത്തി വ്യത്യസ്ത രാജ്യങ്ങൾ ഒന്നിച്ചുവരുന്ന പ്രവണത ശക്തമാകുകയാണ്. ഇതിലൂടെ രാജ്യങ്ങളുടെ കൂട്ടായ ശബ്ദത്തിനും സ്വാധീനത്തിനും കൂടുതൽ കരുത്ത് ലഭിക്കുന്നുവെന്നും ഈ മാറ്റങ്ങളാണ് പുതിയ ആഗോള ക്രമത്തിന് രൂപം നൽകുന്നതെന്നും ജയ്ശങ്കർ വ്യക്തമാക്കി.
