ജയ്പൂർ: രാജസ്ഥാനിലെ ജയ്പൂരിൽ കൽവാർ റോഡിലെ മംഗളം സിറ്റിയിൽ നൂഡിൽസ് കഴിച്ചതിനു പിന്നാലെ ഏഴുവയസ്സുകാരി മരിച്ചു. കുട്ടിയുടെ 18 വയസ്സുള്ള മൂത്ത സഹോദരിക്കും ദേഹാസ്വാസ്ഥ്യം അനുഭവപ്പെട്ടു. https://www.malayalamdailynews.com/784464/ പ്രാഥമിക അന്വേഷണത്തിൽ ഭക്ഷ്യവിഷബാധയാണ് സംഭവത്തിന് കാരണമെന്നാണ് പോലീസിന്റെ സംശയം. കർധാനി പോലീസ് സ്ഥലത്തെത്തി അന്വേഷണം ആരംഭിച്ചു. മരിച്ച പെൺകുട്ടിയുടെ മൃതദേഹം പോസ്റ്റ്മോർട്ടത്തിനായി കൻവാട്ടിയ ആശുപത്രി മോർച്ചറിയിലേക്ക് മാറ്റി.
ദൗലത്പുരയിലെ ലക്ഷ്മിനാരായൺപുര സ്വദേശിയായ പരേതനായ ഗംരാജ് കുമാവത്തിന്റെ ഏഴുവയസ്സുകാരിയായ മകൾ പിഹുവാണ് മരിച്ചത്. കുടുംബത്തോടൊപ്പം മംഗളം സിറ്റിയിലായിരുന്നു കുട്ടിയുടെ താമസം. സമീപത്തെ വികാസ് കിരാന സ്റ്റോറിൽനിന്ന് കുട്ടികൾ 60 രൂപ വിലയുള്ള നൂഡിൽസ് പാക്കറ്റ് വാങ്ങിയിരുന്നു.
രാവിലെ 14 വയസ്സുകാരനായ സഹോദരൻ സമർ നൂഡിൽസ് പാകം ചെയ്ത് പകുതി കഴിക്കുകയും ബാക്കി സഹോദരിമാർക്കായി മാറ്റിവയ്ക്കുകയും ചെയ്തു. ഉച്ചയ്ക്കുശേഷം 18 വയസ്സുള്ള ദിവ്യാൻഷിയും ഏഴുവയസ്സുകാരിയായ പിഹുവും ബാക്കിയുണ്ടായിരുന്ന നൂഡിൽസ് കഴിച്ച ശേഷം ഉറങ്ങാൻ പോയി. വൈകുന്നേരം വീട്ടിൽ തിരിച്ചെത്തിയ മാതാവ് മീന ഇരുവരെയും വിളിച്ചുണർത്താൻ ശ്രമിച്ചപ്പോഴാണ് സംഭവം പുറത്തറിയുന്നത്.
ഉറക്കത്തിൽനിന്ന് എഴുന്നേറ്റ ദിവ്യാൻഷി ഛർദ്ദിക്കാൻ തുടങ്ങിയെങ്കിലും പിഹു വിളിച്ചുണർത്തിയിട്ടും പ്രതികരിച്ചില്ല. ഇതോടെ കുടുംബാംഗങ്ങൾ ഇരുവരെയും മംഗളം സിറ്റിക്ക് സമീപത്തെ ആശുപത്രിയിൽ എത്തിച്ചു. പരിശോധനയിൽ പിഹു മരിച്ചതായി ഡോക്ടർമാർ സ്ഥിരീകരിച്ചു. ദിവ്യാൻഷിയെ പ്രാഥമിക ചികിത്സയ്ക്കുശേഷം വീട്ടിലേക്ക് അയച്ചു.
വിവരമറിഞ്ഞ് കർധാനി പോലീസ് സ്റ്റേഷനിലെ അസിസ്റ്റന്റ് സബ് ഇൻസ്പെക്ടർ ധർമ്മേന്ദ്ര യാദവിന്റെ നേതൃത്വത്തിലുള്ള പോലീസ് സംഘം ആശുപത്രിയിലെത്തി. തുടർന്ന് മൃതദേഹം പോസ്റ്റ്മോർട്ടത്തിനായി കൻവാട്ടിയ ആശുപത്രിയിലെ മോർച്ചറിയിലേക്ക് മാറ്റി.
2025 ഫെബ്രുവരിയിലാണ് മീനയെ വിവാഹം കഴിച്ചതെന്ന് കുട്ടിയുടെ രണ്ടാനച്ഛനായ ദിനേശ് കുമാവത് പറഞ്ഞു. പെയിന്റിങ് കോൺട്രാക്ടറായി ജോലി ചെയ്യുന്ന അദ്ദേഹം കുടുംബത്തോടൊപ്പം കൽവാർ റോഡിലാണ് താമസിക്കുന്നത്. സംഭവസമയത്ത് ആശുപത്രിയിൽ ചികിത്സയിലായിരുന്ന മകൻ ഗോവിന്ദിനെ പരിചരിക്കുന്നതിനായി താനും ഭാര്യയും സിദ്ധി വിനായക് ആശുപത്രിയിലായിരുന്നുവെന്ന് ദിനേശ് പറഞ്ഞു. 18 വയസ്സുള്ള ദിവ്യാൻഷി, 17 വയസ്സുള്ള ഗുൽഷൻ, 14 വയസ്സുള്ള സമർ, ഏഴുവയസ്സുകാരിയായ പിഹു എന്നിവർ മാത്രമാണ് വീട്ടിലുണ്ടായിരുന്നത്.
പ്രഥമദൃഷ്ട്യാ ഭക്ഷ്യവിഷബാധയാണ് മരണത്തിന് കാരണമെന്നാണ് സംശയിക്കുന്നതെന്ന് കർധാനി പോലീസ് സ്റ്റേഷൻ ഇൻചാർജ് സവായ് സിംഗ് അറിയിച്ചു. എന്നാൽ, പോസ്റ്റ്മോർട്ടം റിപ്പോർട്ടും തുടർന്നുള്ള അന്വേഷണവും പൂർത്തിയായാൽ മാത്രമേ മരണത്തിന്റെ യഥാർഥ കാരണം വ്യക്തമാകുകയുള്ളൂ.
