വാഷിംഗ്ടൺ: ഡൊണാൾഡ് ട്രംപിന്റെ 2020 ലെ തിരഞ്ഞെടുപ്പ് പരാജയം മറികടക്കാൻ ഗൂഢാലോചന നടത്തിയതിന് ഫെഡറൽ ഗ്രാൻഡ് ജൂറി നാല് കേസുകളിൽ കുറ്റം ചുമത്തി. 2024 ൽ വൈറ്റ് ഹൗസ് തിരിച്ചുപിടിക്കാൻ ശ്രമിക്കുന്ന മുൻ യുഎസ് പ്രസിഡന്റിനെതിരെ ഈ വർഷം മൂന്നാമത്തെ ക്രിമിനൽ കുറ്റമാണ് ഇപ്പോള്‍ ചുമത്തിയിരിക്കുന്നത്.
2021 ജനുവരിയിൽ യുഎസ് പ്രസിഡന്റായ ഡമോക്രാറ്റ് ജോ ബൈഡനോടുള്ള തന്റെ തോൽവി എങ്ങനെ മറികടക്കാൻ ട്രംപ് ശ്രമിച്ചുവെന്നതിന് ട്രംപിന്റെ ഏറ്റവും അടുത്ത ചില കൂട്ടാളികളിൽ നിന്ന് മാസങ്ങളോളം ഗ്രാൻഡ് ജൂറി സാക്ഷ്യം കേട്ടതിന് ശേഷമാണ് 45 പേജുള്ള കുറ്റപത്രം ജസ്റ്റിസ് ഡിപ്പാർട്ട്‌മെന്റ് പ്രത്യേക അഭിഭാഷകൻ ജാക്ക് സ്മിത്ത് സമർപ്പിച്ചത്.
77 കാരനായ ട്രംപിനെതിരെ അമേരിക്കയെ കബളിപ്പിക്കാൻ ഗൂഢാലോചന, സാക്ഷികളെ നിശ്ശബ്ദരാക്കല്‍, പൗരന്മാരുടെ അവകാശങ്ങൾക്കെതിരായ ഗൂഢാലോചന, ഔദ്യോഗിക നടപടി തടസ്സപ്പെടുത്തൽ, തടസ്സപ്പെടുത്താനുള്ള ശ്രമം എന്നീ കുറ്റങ്ങളാണ് ചുമത്തിയിരിക്കുന്നത്.
തിരഞ്ഞെടുപ്പ് ദിവസം (നവംബർ 3) മുതൽ ജനുവരി 20 ന് വൈറ്റ് ഹൗസ് വിട്ട ദിവസം വരെ രണ്ട് മാസത്തിലധികം കാലയളവിൽ ട്രംപിന്റെ പ്രവർത്തനങ്ങളുമായി ഈ ആരോപണങ്ങൾ ബന്ധപ്പെട്ടിരിക്കുന്നു.
2020 ലെ തിരഞ്ഞെടുപ്പ് അട്ടിമറിക്കാനുള്ള ഗൂഢാലോചന 2021 ജനുവരി 6 ന് യുഎസ് ക്യാപിറ്റോളില്‍ ട്രംപിന്റെ അനുയായികൾ നടത്തിയ ശാരീരിക ആക്രമണത്തിൽ കലാശിച്ചു. ബൈഡന്റെ വിജയം സാക്ഷ്യപ്പെടുത്താൻ കോൺഗ്രസ് യോഗം ചേർന്നുകൊണ്ടിരിക്കേയായിരുന്നു ക്യാപിറ്റോളിലെ കലാപം.
“തിരഞ്ഞെടുപ്പില്‍ പരാജയപ്പെട്ടെങ്കിലും അധികാരത്തിൽ തുടരാൻ എതിര്‍കക്ഷി തീരുമാനിക്കുകയായിരുന്നു. അതിനാൽ, 2020 നവംബർ 3-ലെ തിരഞ്ഞെടുപ്പ് ദിവസത്തിന് ശേഷം രണ്ട് മാസത്തിലേറെയായി, തെരഞ്ഞെടുപ്പിൽ ഫല നിർണ്ണയ തട്ടിപ്പ് നടന്നിട്ടുണ്ടെന്നും യഥാർത്ഥത്തിൽ താൻ വിജയിച്ചുവെന്നും എതിര്‍കക്ഷി കള്ളം പ്രചരിപ്പിച്ചു. ഈ അവകാശവാദങ്ങൾ തെറ്റായിരുന്നു. അവ തെറ്റാണെന്ന് എതിര്‍കക്ഷിക്ക് അറിയാമായിരുന്നു,” കുറ്റപത്രത്തിൽ പറയുന്നു.
താൻ തെറ്റൊന്നും ചെയ്തിട്ടില്ലെന്നും, തനിക്കെതിരായ ആരോപണങ്ങൾ രാഷ്ട്രീയ പ്രേരിതമാണെന്നും ട്രംപ് തന്റെ അനുയായികൾക്ക് നൽകിയ പ്രസ്താവനയിൽ പറഞ്ഞു. 2020ലെ തിരഞ്ഞെടുപ്പിന് ശേഷം താൻ തെറ്റായ ഒരു നിർദ്ദേശവും നല്‍കിയിട്ടില്ലെന്നും അദ്ദേഹം പറഞ്ഞു.
ഡിസ്ട്രിക്റ്റ് ഓഫ് കൊളംബിയയിലെ പൗരന്മാരുടെ ഒരു ഗ്രാൻഡ് ജൂറിയാണ് കുറ്റപത്രം പുറപ്പെടുവിച്ചത്. കൂടാതെ, ചുമത്തിയ കുറ്റകൃത്യങ്ങൾ വിശദമായി പ്രതിപാദിച്ചിട്ടുമുണ്ട്. 2021 ജനുവരി 6-ന് യുഎസ് ക്യാപിറ്റോളില്‍ നടന്ന കലാപത്തെ ചുറ്റിപ്പറ്റിയുള്ള സംഭവങ്ങളെക്കുറിച്ചുള്ള അന്വേഷണ റിപ്പോര്‍ട്ടും ഇതിന് സാധുത നല്‍കുന്നു.
“2021 ജനുവരി 6 ന് നമ്മുടെ രാജ്യത്തിന്റെ തലസ്ഥാനത്തിന് നേരെയുണ്ടായ ആക്രമണം അമേരിക്കൻ ജനാധിപത്യത്തിന് നേരെയുള്ള അഭൂതപൂർവമായ ആക്രമണമായിരുന്നു. കുറ്റപത്രത്തിൽ വിവരിച്ചതുപോലെ, അത് നുണകളാൽ കത്തിജ്വലിച്ചു,” പ്രത്യേക അഭിഭാഷകൻ സ്മിത്ത് പറഞ്ഞു.
ട്രംപിന്റെ അഭിപ്രായസ്വാതന്ത്ര്യത്തിനുള്ള അവകാശത്തെ കുറ്റപത്രം സ്ഥിരീകരിക്കുമ്പോൾ, മുൻ പ്രസിഡന്റ് “നിയമപരമായ വോട്ടുകൾ കുറയ്ക്കുന്നതിനും തിരഞ്ഞെടുപ്പ് ഫലങ്ങൾ അട്ടിമറിക്കുന്നതിനുമുള്ള നിയമവിരുദ്ധമായ മാർഗങ്ങൾ പിന്തുടർന്നു” എന്ന് അത് അവകാശപ്പെടുന്നു.
ഡിപ്പാർട്ട്‌മെന്റ് ഓഫ് ജസ്റ്റിസ് പുറത്തുവിട്ട കുറ്റപത്രം അനുസരിച്ച്, മുൻ പ്രസിഡന്റിനെതിരെ “സത്യസന്ധതയില്ലായ്മ, വഞ്ചന, എന്നിവ ഉപയോഗിച്ച് പ്രസിഡന്റ് തിരഞ്ഞെടുപ്പിന്റെ ഫലങ്ങൾ ശേഖരിക്കുന്നതിനും എണ്ണുന്നതിനും സാക്ഷ്യപ്പെടുത്തുന്നതിനുമുള്ള രാജ്യത്തിന്റെ പ്രക്രിയയെ തടസ്സപ്പെടുത്തിക്കൊണ്ട് യുഎസിനെ വഞ്ചിക്കാനുള്ള ഗൂഢാലോചന കുറ്റം ചുമത്തിയിട്ടുണ്ട്.
2021 ജനുവരി 6-ന് തിരഞ്ഞെടുപ്പ് ഫലങ്ങൾ സാക്ഷ്യപ്പെടുത്തിയ കോൺഗ്രസ് നടപടിയെ തടസ്സപ്പെടുത്താനുള്ള ഗൂഢാലോചനയാണ് രണ്ടാമത്തെ കണക്ക്. ഫെഡറൽ പ്രോസിക്യൂട്ടർമാർ അദ്ദേഹത്തിനെതിരെ “വോട്ട് ചെയ്യാനുള്ള അവകാശത്തിനും ആ വോട്ട് എണ്ണുന്നതിനും എതിരായ ഗൂഢാലോചന” ആരോപിച്ചു.
ആറ് സഹ-ഗൂഢാലോചനക്കാർ, നാല് അഭിഭാഷകർ, ഒരു പൊളിറ്റിക്കൽ കൺസൾട്ടന്റ്, സിവിൽ വിഷയങ്ങളിൽ പ്രവർത്തിച്ചിരുന്ന ഒരു നീതിന്യായ വകുപ്പ് ഉദ്യോഗസ്ഥൻ എന്നിവരെയാണ് കുറ്റപത്രത്തില്‍ പ്രതിപാദിച്ചിരിക്കുന്നത്.
നിലവിൽ റിപ്പബ്ലിക്കൻ പാർട്ടിയുടെ 2024 നോമിനേഷനിലെ മുൻനിര സ്ഥാനാർത്ഥിയായ ട്രംപിന് ആഗസ്റ്റ് 3 ന് ഫെഡറൽ ഡിസ്ട്രിക്റ്റ് കോടതിയിൽ ഹാജരാകാൻ സമൻസ് അയച്ചിട്ടുണ്ട്. പേരിടാത്ത ആറ് സഹ-ഗൂഢാലോചനക്കാരെയും കുറ്റപത്രത്തിൽ ഉൾപ്പെടുത്തിയിട്ടുണ്ട്, അവരിൽ ഒരാൾ ന്യൂയോര്‍ക്ക് സിറ്റി മുന്‍ മേയര്‍ റൂഡി ഗ്യുലിയാനിയാണെന്ന് വിശ്വസിക്കപ്പെടുന്നു. അദ്ദേഹം ട്രംപിന്റെ ലീഗൽ ടീമിൽ പ്രവർത്തിച്ചിരുന്നു.
വീണ്ടും പ്രസിഡന്റ് സ്ഥാനത്തേക്ക് മത്സരിക്കുന്ന ട്രംപ് തെറ്റ് നിഷേധിച്ചു. സോഷ്യൽ മീഡിയയിൽ അദ്ദേഹം കേസ് “പരിഹാസ്യം” എന്നാണ് വിശേഷിപ്പിച്ചത്.
“നിങ്ങൾക്കറിയാവുന്നതുപോലെ, ഞാൻ ഒരു തെറ്റും ചെയ്തിട്ടില്ല. ‘സമാധാനപരമായി’ പ്രവർത്തിക്കാൻ ഞാൻ അമേരിക്കക്കാരോട് പറഞ്ഞതും അക്രമത്തിന്റെ ഉപയോഗം നിരുത്സാഹപ്പെടുത്തിയതും നന്നായി രേഖപ്പെടുത്തിയിട്ടുണ്ട്. ഇത് തിരഞ്ഞെടുപ്പ് ഇടപെടലിന്റെ നിഗൂഢമായ പ്രവൃത്തിയല്ലാതെ മറ്റൊന്നുമല്ല, വോട്ടെടുപ്പിൽ തകരുമ്പോൾ വക്രനായ ജോയിൽ (ജോ ബൈഡന്‍) നിന്നുള്ള നിരാശയുടെ അവസാന പ്രവൃത്തിയാണ്,” ട്രംപ് നാല് ആരോപണങ്ങൾക്ക് ശേഷം പ്രസ്താവനയിൽ പറഞ്ഞു.
ട്രംപിനെതിരെയുള്ള മൂന്നാമത്തെ കുറ്റാരോപണമാണിത്. എന്നാൽ, 2020 ലെ പ്രസിഡന്റ് തിരഞ്ഞെടുപ്പിന്റെ ഫലങ്ങൾ അട്ടിമറിക്കാനുള്ള അദ്ദേഹത്തിന്റെ ശ്രമങ്ങൾക്ക് യുഎസ് ക്യാപിറ്റോളിൽ അദ്ദേഹത്തിന്റെ അനുയായികൾ നടത്തിയ അക്രമാസക്തമായ കലാപത്തിന് മുന്നോടിയായി അദ്ദേഹം നടത്തിയ ശ്രമങ്ങൾക്ക് ഔപചാരികമായി ഉത്തരവാദിത്തം ഏൽക്കുന്നത് ഇതാദ്യമാണ്.
നിരവധി കേസുകളിൽ ട്രംപിനെ അന്വേഷിക്കുന്ന ജസ്റ്റിസ് ഡിപ്പാർട്ട്‌മെന്റ് പ്രത്യേക അഭിഭാഷകന്‍ സ്മിത്തിനെ മുൻ പ്രസിഡന്റ് ആവർത്തിച്ച് വിമർശിച്ചിട്ടുണ്ട്.
ഈ കുറ്റപത്രത്തിൽ ആരോപിക്കപ്പെടുന്ന കുറ്റങ്ങൾ വളരെ ഗൗരവമുള്ളതാണെന്നും നിയമനടപടികളിലൂടെ സമാധാനപരമായും ബാഹ്യ ഇടപെടലുകളില്ലാതെയും കൈകാര്യം ചെയ്യണമെന്ന് മുൻ ഹൗസ് സ്പീക്കർ നാൻസി പെലോസി പറഞ്ഞു.
“എല്ലാ ക്രിമിനൽ പ്രതികളെയും പോലെ മുൻ പ്രസിഡന്റും കുറ്റക്കാരനാണെന്ന് തെളിയുന്നത് വരെ നിരപരാധിയാണ്. യുണൈറ്റഡ് സ്റ്റേറ്റ്സ് ഓഫ് അമേരിക്കയിൽ ആരും നിയമത്തിന് അതീതരല്ലെന്ന് നമ്മുടെ സ്ഥാപകർ വ്യക്തമാക്കിയിട്ടുണ്ട്, അമേരിക്കയുടെ മുൻ പ്രസിഡന്റ് പോലും,” അവർ പറഞ്ഞു.
2021 ജനുവരി 6 ലെ കലാപം അമേരിക്കൻ ചരിത്രത്തിലെ ഏറ്റവും ദുഃഖകരവും കുപ്രസിദ്ധവുമായ ദിവസങ്ങളിലൊന്നായിരുന്നുവെന്ന് സെനറ്റ് മെജോറിറ്റി ലീഡർ ചക്ക് ഷൂമറും ഹൗസ് ഡെമോക്രാറ്റിക് നേതാവ് ഹക്കീം ജെഫ്രീസും പറഞ്ഞു. 2020ലെ തിരഞ്ഞെടുപ്പ് അട്ടിമറിക്കാന്‍ ട്രംപ് വ്യക്തിപരമായി അനുയായികളെ സംഘടിപ്പിക്കുകയും അദ്ദേഹത്തിന്റെ വഞ്ചനാപരമായ വലിയ നുണയ്ക്ക് ആക്കം കൂട്ടുകയും ചെയ്തു എന്ന് അവര്‍ പറഞ്ഞു.
“അമേരിക്കൻ ജനതയുടെ ഇച്ഛയെ അട്ടിമറിക്കാനും സമാധാനപരമായ അധികാര പരിവർത്തനം തടയാനുമുള്ള മാരകമായ ശ്രമത്തിൽ, അമേരിക്കൻ ദേശസ്‌നേഹത്തിന്റെയും ജനാധിപത്യത്തിന്റെയും പ്രതീകവും ഭവനവുമായ നമ്മുടെ രാജ്യത്തിന്റെ ക്യാപിറ്റോള്‍ ആയിരക്കണക്കിന് ക്രൂരരും അക്രമാസക്തരുമായ കലാപകാരികളുടെ ആക്രമണത്തിനിരയായി,” രണ്ട് മുൻനിര ഡെമോക്രാറ്റിക് നേതാക്കൾ പറഞ്ഞു.
രേഖ കൈമാറ്റ കേസില്‍ അറസ്റ്റും പിന്നാലെ ജാമ്യവും : നേരത്തെ ജൂണ്‍ 14ന്, സർക്കാരിന്‍റെ രഹസ്യ രേഖകൾ തെറ്റായി കൈകാര്യം ചെയ്‌തെന്ന ആരോപണവുമായി ബന്ധപ്പെട്ട് അറസ്‌റ്റിലായ ഡൊണാൾഡ് ട്രംപിനെ മിയാമിയിലെ ഫെഡറൽ കോടതി ജാമ്യത്തിൽ വിട്ടിരുന്നു. ജൂണ്‍ 13 ചൊവ്വാഴ്‌ചയായിരുന്നു കുറ്റാരോപിതനായ ട്രംപിനെ അറസ്‌റ്റ് ചെയ്‌ത് കോടതി വിചാരണ ചെയ്‌തത്. എന്നാൽ ട്രംപ് കുറ്റം നിഷേധിക്കുകയാണുണ്ടായത്. പിന്നാലെ കോടതിയില്‍ നിന്ന് ജാമ്യം ലഭിക്കുകയും ചെയ്തു.
രാജ്യസുരക്ഷയുമായി ബന്ധപ്പെട്ട കേസിൽ അറസ്‌റ്റിലാകുന്ന ആദ്യ അമേരിക്കന്‍ മുൻ പ്രസിഡന്റ് കൂടിയാണ് ഡോണാൾഡ് ട്രംപ്. ദേശീയ പ്രതിരോധ വിവരങ്ങൾ നിയമവിരുദ്ധമായി കൈവശം വയ്‌ക്കൽ, അന്വേഷണം തടസപ്പെടുത്തൽ, തെളിവ് നശിപ്പിക്കൽ തുടങ്ങി 37 കുറ്റകൃത്യങ്ങളായിരുന്നു ട്രംപിന്റെ പേരിൽ രജിസ്‌റ്റർ ചെയ്‌തിരുന്നത്.
വൈറ്റ് ഹൗസിലെ നിരവധി രഹസ്യ സ്വഭാവമുള്ള രേഖകൾ ട്രംപ് തന്റെ ഫ്ലോറിഡയിലെ വസതിയിലേയ്‌ക്ക് കൊണ്ടുപോയി തെറ്റായി കൈകാര്യം ചെയ്‌തെന്നായിരുന്നു പ്രോസിക്യൂഷൻ ആരോപണം. കഴിഞ്ഞ ഓഗസ്റ്റിൽ ട്രംപിന്റെ വസതിയിൽ നിന്ന് രേഖകൾ കണ്ടെത്തുകയും ചെയ്‌തിരുന്നു. അതേസമയം, ഫെഡറൽ അന്വേഷണം തടസപ്പെടുത്തിയെന്ന കേസിൽ ട്രംപിന്റെ സഹായി വാൾട്ട് നൗട്ടയെയും യുഎസ് നീതിന്യായ വകുപ്പ് അറസ്‌റ്റ് ചെയ്‌തിരുന്നു. ജാമ്യത്തില്‍ ഇറങ്ങിയ ട്രംപിന് ഐക്യദാർഢ്യവുമായി നിരവധി അനുയായികൾ മിയാമിയിലെ ക്യൂബൻ റെസ്റ്റോറന്‍റ് പരിസരത്ത് ഒത്തുകൂടിയതായി മാധ്യമങ്ങൾ റിപ്പോർട്ട് ചെയ്യുകയുണ്ടായി. ക്രിമിനൽ നീതിന്യായ വ്യവസ്ഥയുടെ ന്യായരഹിതമായ ഉപയോഗം എന്നാണ് ട്രംപിനെതിരായ കുറ്റപത്രത്തെ അദ്ദേഹത്തിന്റെ അഭിഭാഷകരിലൊരാൾ വിമർശിച്ചത്. മിയാമി കോടതിക്ക് പുറത്ത് നിന്നുകൊണ്ടായിരുന്നു അഭിഭാഷകന്‍റെ പരാമർശം.
ഇതിനിടെ പോൺ ചലച്ചിത്ര താരം സ്‌റ്റോമി ഡാനിയൽസുമായുള്ള ഹഷ് മണി കേസിലും ഡൊണാള്‍ഡ് ട്രംപിന് ജാമ്യം ലഭിച്ചിരുന്നു. 2016 ൽ പ്രസിഡന്റ് തെരഞ്ഞെടുപ്പ് പ്രചാരണത്തിനിടെ താനുമായുള്ള ബന്ധം മറച്ചുവയ്‌ക്കാൻ സ്‌റ്റോമി ഡാനിയൽസിന് ട്രംപ് പണം നൽകിയെന്നാണ് കേസ്. ഇതില്‍ ട്രംപ് കോടതിയിൽ സ്വയം കീഴടങ്ങാനെത്തുകയും പിന്നീട് അദ്ദേഹത്തിന്റെ അറസ്‌റ്റ് രേഖപ്പെടുത്തുകയുമായിരുന്നു.
തെക്കൻ സംസ്ഥാനമായ ജോർജിയയിൽ, 2020 ലെ തിരഞ്ഞെടുപ്പ് ഫലത്തെ നിയമവിരുദ്ധമായി അട്ടിമറിക്കാൻ ശ്രമിച്ചതിന് ട്രംപിനെതിരെ ഉടൻ കുറ്റം ചുമത്തുമെന്ന് ഒരു പ്രോസിക്യൂട്ടർ സൂചിപ്പിച്ചു.
