വയനാട്: പഹൽഗാമിലെ ഭീകരാക്രമണത്തിന് മറുപടിയായി ഇന്ത്യൻ സർക്കാർ സ്വീകരിക്കുന്ന ഏതൊരു നടപടിയെയും കോൺഗ്രസ് പൂർണ്ണമായി പിന്തുണയ്ക്കുമെന്ന് കോൺഗ്രസ് ജനറൽ സെക്രട്ടറിയും എംപിയുമായ പ്രിയങ്ക ഗാന്ധി ഞായറാഴ്ച പറഞ്ഞു. ഈ നിലപാട് സ്ഥിരീകരിച്ചുകൊണ്ട് കോൺഗ്രസ് വർക്കിംഗ് കമ്മിറ്റി (സിഡബ്ല്യുസി) ഇതിനകം ഒരു പ്രമേയം പാസാക്കിയിട്ടുണ്ടെന്ന് പ്രിയങ്ക പറഞ്ഞു.
പ്രിയങ്ക ഗാന്ധി തന്റെ പാർലമെന്ററി മണ്ഡലമായ വയനാട്ടിൽ രണ്ട് ദിവസത്തെ സന്ദർശനത്തിലാണ്. ഈ സമയത്ത് മാധ്യമങ്ങളോട് സംസാരിച്ച അവര്‍, ആക്രമണത്തിന്റെ പശ്ചാത്തലത്തിൽ കേന്ദ്ര സർക്കാർ വേഗത്തിൽ നടപടിയെടുക്കുമെന്ന് പ്രത്യാശ പ്രകടിപ്പിച്ചു. “കോൺഗ്രസ് പാർട്ടി… ഒരു സിഡബ്ല്യുസി യോഗം ചേർന്നു, ഞങ്ങൾ ഒരു പ്രമേയം പാസാക്കി. സർക്കാർ എന്ത് നടപടി സ്വീകരിക്കാൻ തീരുമാനിച്ചാലും ഞങ്ങൾ പൂർണ്ണമായും അതിനൊപ്പം ഉണ്ടെന്ന് പ്രമേയത്തിൽ പറഞ്ഞിട്ടുണ്ട്. അവർ ഉടൻ നടപടിയെടുക്കുമെന്ന് ഞങ്ങൾ പ്രതീക്ഷിക്കുന്നു,” അവര്‍ പറഞ്ഞു.
പഹൽഗാം ഭീകരാക്രമണത്തിന്റെ പശ്ചാത്തലത്തിൽ അതിർത്തി കടന്നുള്ള ഭീകരതയ്ക്ക് പാക്കിസ്താനെ ശിക്ഷിക്കാൻ കർശനമായി നടപടിയെടുക്കണമെന്ന് കോൺഗ്രസ് വെള്ളിയാഴ്ച കേന്ദ്ര സർക്കാരിനോട് ആവശ്യപ്പെട്ടു. രാജ്യത്തെ ഏറ്റവും കനത്ത സുരക്ഷയുള്ള പ്രദേശങ്ങളിലൊന്നായ പഹല്‍ഗാമില്‍ സുരക്ഷാ, രഹസ്യാന്വേഷണ മേഖലയിലെ “ഗുരുതരമായ വീഴ്ചകൾക്ക്” സമയബന്ധിതമായ ഉത്തരവാദിത്തം ഏറ്റെടുക്കണമെന്നും പ്രതിപക്ഷ പാർട്ടി ആവശ്യപ്പെട്ടു. കോൺഗ്രസ് വർക്കിംഗ് കമ്മിറ്റി (സിഡബ്ല്യുസി) യോഗത്തിൽ പാസാക്കിയ പ്രമേയത്തിലാണ് ഇക്കാര്യം പറഞ്ഞത്.
കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെയുടെ അദ്ധ്യക്ഷതയിൽ ചേർന്ന സിഡബ്ല്യുസി യോഗത്തിൽ മുൻ കോൺഗ്രസ് അദ്ധ്യക്ഷന്മാരായ സോണിയ ഗാന്ധി, രാഹുൽ ഗാന്ധി, കോൺഗ്രസ് ജനറൽ സെക്രട്ടറിമാരായ ജയറാം രമേശ്, കെസി വേണുഗോപാൽ, പ്രിയങ്ക ഗാന്ധി എന്നിവരും മുതിർന്ന നേതാക്കളും പങ്കെടുത്തു.
