ഫ്ലോറിഡ: അയ്യപ്പഭക്തർക്ക് ശബരിമല തീർത്ഥാടനം സുഗമമാക്കുക എന്ന ലക്ഷ്യത്തോടെ കേരള ഹിന്ദൂസ് ഓഫ് നോർത്ത് അമേരിക്ക (KHNA) യും ശബരിമല അയ്യപ്പ സേവാ സമാജവും (SASS) സംയുക്തമായി ആരംഭിച്ച ഒരു വർഷം നീണ്ടുനിൽക്കുന്ന ‘ശബരി യാത്ര’ സേവന പദ്ധതിയുടെ ഭാഗമായി അടുത്ത സൗജന്യ തീർത്ഥയാത്ര ഓഗസ്റ്റ് 17ന് സംഘടിപ്പിക്കുന്നു.
വർക്കലയിലെ ജനാർദ്ദന അയ്യപ്പസ്വാമി ക്ഷേത്രത്തിൽ നിന്ന് വൈകിട്ട് 5.30ന് ആരംഭിക്കുന്ന ഈ യാത്രയിൽ 45 അയ്യപ്പഭക്തർ പങ്കെടുക്കും. യാത്രയ്ക്കാവശ്യമായ വാഹനസൗകര്യം മുതൽ ഭക്ഷണം ഉൾപ്പെടെയുള്ള 45 പേരുടെയും മുഴുവൻ ചെലവും KHNA ഡയറക്ടർ ബോർഡ് അംഗവും ഹൂസ്റ്റണിലെ സജീവ സാമൂഹിക പ്രവർത്തകയുമായ രമണി പിള്ള വഴിപാടായി ഏറ്റെടുത്തിരിക്കുകയാണ്.
ഒരു തീർത്ഥാടകനുപോലും സാമ്പത്തിക ബുദ്ധിമുട്ട് ശബരിമല ദർശനത്തിന് തടസ്സമാകരുതെന്ന സേവനസങ്കൽപ്പമാണ് KHNA–SASS ശബരി യാത്രയുടെ പിന്നിൽ. ഭക്തർക്ക് സൗജന്യ യാത്രയും ഭക്ഷണവും ഉൾപ്പെടെയുള്ള ആവശ്യമായ സൗകര്യങ്ങൾ ഒരുക്കി, പ്രവാസി മലയാളി ഹിന്ദു കുടുംബങ്ങൾക്ക് തങ്ങളുടെ പേരിലോ കുടുംബാംഗങ്ങളുടെ പേരിലോ ഒരു ശബരി യാത്ര വഴിപാടായി സ്പോൺസർ ചെയ്യാനുള്ള അവസരവും പദ്ധതിയിലൂടെ ഒരുക്കുന്നു.
“നാട്ടിൽ നേരിട്ട് എത്തി സേവനം ചെയ്യാൻ കഴിയാത്ത പ്രവാസി കുടുംബങ്ങൾക്ക് ഒരു ബസ് യാത്രയോ, അന്നദാനമോ, ഒരു കൂട്ടം അയ്യപ്പഭക്തരുടെ യാത്രാചെലവോ വഴിപാടായി ഏറ്റെടുക്കാൻ കഴിയുന്ന രീതിയിലാണ് ഈ പദ്ധതി രൂപപ്പെടുത്തിയിരിക്കുന്നത്. ഭക്തിയും സേവനവും ഒരുമിക്കുന്ന ഇത്തരം പ്രവർത്തനങ്ങൾ KHNAയുടെ സാമൂഹിക-ആത്മീയ ദൗത്യത്തിന്റെ പ്രധാന ഭാഗമാണ്,” എന്ന് KHNA പ്രസിഡന്റ് ടി. ഉണ്ണികൃഷ്ണൻ പറഞ്ഞു.
45 അയ്യപ്പഭക്തരുടെ യാത്രയും ഭക്ഷണവും ഉൾപ്പെടെയുള്ള മുഴുവൻ ചെലവും ഏറ്റെടുത്ത രമണി പിള്ളയുടെ സേവനമനോഭാവം മാതൃകാപരമാണെന്നും, അവരുടെ ഈ വഴിപാട് കൂടുതൽ കുടുംബങ്ങൾക്കും അഭ്യുദയകാംക്ഷികൾക്കും പ്രചോദനമാകട്ടെയെന്നും അദ്ദേഹം ആശംസിച്ചു.
ഒരു യാത്രയോടെ അവസാനിക്കുന്ന പദ്ധതിയല്ല ‘ശബരി യാത്ര’. ഒരു വർഷം നീണ്ടുനിൽക്കുന്ന സേവന സംരംഭമായി കൂടുതൽ അയ്യപ്പഭക്തർക്ക് സഹായമെത്തിക്കുകയാണ് ലക്ഷ്യം. ഒരു ബസ് സ്പോൺസർ ചെയ്യാം, ഭക്തർക്കുള്ള ഭക്ഷണം ഏറ്റെടുക്കാം, അല്ലെങ്കിൽ ഒരു യാത്രയുടെ മുഴുവൻ ചെലവും വഴിപാടായി സമർപ്പിക്കാം. വ്യക്തികൾക്കും കുടുംബങ്ങൾക്കും സ്ഥാപനങ്ങൾക്കും സുഹൃദ് കൂട്ടായ്മകൾക്കും ഇതിൽ പങ്കാളികളാകാം.
“ഒരു സംഭാവന എന്നതിലുപരി, അയ്യപ്പഭക്തർക്കായി സമർപ്പിക്കുന്ന ഒരു വഴിപാടും സേവനവുമാണ് ഓരോ സ്പോൺസർഷിപ്പും. കൂടുതൽ പ്രവാസി കുടുംബങ്ങൾ ഈ പുണ്യസംരംഭത്തിന്റെ ഭാഗമാകണം,” എന്ന് KHNA നേതൃത്വം അഭ്യർത്ഥിച്ചു.
കെ.എച്ച്.എൻ.എ ജനറൽ സെക്രട്ടറി സിനു നായർ, ട്രഷറർ അശോക് മേനോൻ, വൈസ് പ്രസിഡന്റ് കെ.വി. സഞ്ജീവ് കുമാർ, ജോയിന്റ് സെക്രട്ടറി ശ്രീകുമാർ ഹരിലാൽ, ജോയിന്റ് ട്രഷറർ അപ്പുക്കുട്ടൻ പിള്ള, ട്രസ്റ്റി ബോർഡ് ചെയർപേഴ്സൺ വനജ നായർ എന്നിവരും രമണി പിള്ളയുടെ സേവനത്തിന് അഭിനന്ദനം അറിയിക്കുകയും കൂടുതൽ കുടുംബങ്ങൾ ഈ ഭക്തിസേവന പദ്ധതിയുടെ ഭാഗമാകണമെന്ന് അഭ്യർത്ഥിക്കുകയും ചെയ്തു.
