തിരുവനന്തപുരം: സംസ്ഥാനത്ത് രൂക്ഷമായിക്കൊണ്ടിരിക്കുന്ന വൈദ്യുതി പ്രതിസന്ധിക്ക് പരിഹാരം കണ്ടെത്താൻ കേരള സംസ്ഥാന വൈദ്യുതി ബോർഡ് (കെഎസ്ഇബി) ഉത്തരേന്ത്യൻ സംസ്ഥാനങ്ങളിൽ നിന്ന് വൈദ്യുതി ലഭ്യമാക്കാനുള്ള നടപടികൾ ആരംഭിച്ചു. ഇതിന്റെ ഭാഗമായി കെഎസ്ഇബി ഡയറക്ടർമാർ നാളെ ഉത്തരേന്ത്യയിലേക്ക് തിരിക്കുമെന്നാണ് റിപ്പോർട്ട്. മഹാരാഷ്ട്ര, ഉത്തർപ്രദേശ്, പഞ്ചാബ്, ബീഹാർ തുടങ്ങിയ സംസ്ഥാനങ്ങളിലെ ബന്ധപ്പെട്ട ഉദ്യോഗസ്ഥരുമായി സംഘം ചർച്ച നടത്തും.
ഞായറാഴ്ച രാവിലെ ചേർന്ന കെഎസ്ഇബിയുടെ ഉന്നതതല യോഗത്തിലാണ് മറ്റ് സംസ്ഥാനങ്ങളുമായി നേരിട്ട് ചർച്ച നടത്തി വൈദ്യുതി ലഭ്യത ഉറപ്പാക്കാൻ തീരുമാനിച്ചത്. നിലവിലെ പ്രതിസന്ധി മറികടക്കുന്നതിനായി അടിയന്തര നടപടികൾ സ്വീകരിക്കാനും യോഗത്തിൽ ധാരണയായി.
അതേസമയം, സംസ്ഥാനത്തെ വൈദ്യുതി പ്രതിസന്ധിക്ക് ഒറ്റ രാത്രികൊണ്ട് പരിഹാരം കാണാൻ കഴിയില്ലെന്ന് കെഎസ്ഇബി ചെയർമാനും മാനേജിംഗ് ഡയറക്ടറുമായ എം.ജി. രാജമാണിക്യം വ്യക്തമാക്കി. ഒരു മാധ്യമത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. നിലവിലെ സാഹചര്യത്തിൽ വൈദ്യുതി ഉപയോഗത്തിൽ ഉപഭോക്താക്കൾ നിയന്ത്രണം പാലിക്കുന്നത് ഏറെ നിർണായകമാണെന്നും അദ്ദേഹം ചൂണ്ടിക്കാട്ടി.
എൽ നിനോ പ്രതിഭാസത്തെ തുടർന്നുണ്ടായ മഴക്കുറവും അസാധാരണമായ താപനില വർധനയും സംസ്ഥാനത്തെ വൈദ്യുതി ഉപഭോഗം കുത്തനെ ഉയരാൻ കാരണമായെന്നാണ് വിലയിരുത്തൽ. സാധാരണ മൺസൂൺ കാലത്ത് ഏകദേശം 4,000 മെഗാവാട്ടായിരുന്ന പീക്ക് വൈദ്യുതി ആവശ്യകത ഈ വർഷം 4,800 മുതൽ 5,000 മെഗാവാട്ട് വരെയായി ഉയർന്നു.
കഴിഞ്ഞ വ്യാഴാഴ്ച സംസ്ഥാനത്തെ പീക്ക് വൈദ്യുതി ആവശ്യകത റെക്കോർഡ് നിരക്കായ 5,400 മെഗാവാട്ടിലെത്തി. എന്നാൽ ആ സമയത്ത് ലഭ്യമായിരുന്നത് 4,200 മെഗാവാട്ട് വൈദ്യുതി മാത്രമായിരുന്നുവെന്ന് രാജമാണിക്യം വ്യക്തമാക്കി. കഴിഞ്ഞ വർഷം സെപ്റ്റംബറിൽ സംസ്ഥാനത്തെ ശരാശരി ആവശ്യകത 4,224 മെഗാവാട്ട് മാത്രമായിരുന്നു.
കേരളത്തിന്റെ പ്രധാന ആഭ്യന്തര വൈദ്യുതി സ്രോതസ്സായ ജലവൈദ്യുത പദ്ധതികളിൽ നിന്ന് പരമാവധി 1,750 മെഗാവാട്ട് മാത്രമാണ് ഉൽപാദിപ്പിക്കാൻ കഴിയുന്നത്. എന്നാൽ സംസ്ഥാനത്തെ നിലവിലെ ആവശ്യകത ഇതിനെക്കാൾ ഏറെ കൂടുതലാണ്. ഇടുക്കി പദ്ധതിക്ക് ശേഷം സമാനമായ മറ്റൊരു വലിയ വൈദ്യുതി പദ്ധതി യാഥാർഥ്യമാക്കാൻ കേരളത്തിന് കഴിഞ്ഞിട്ടില്ലെന്നും അദ്ദേഹം ചൂണ്ടിക്കാട്ടി.
വൈദ്യുതി നിയന്ത്രണങ്ങൾ ഒഴിവാക്കാൻ പൊതുജനങ്ങളുടെ സഹകരണം അനിവാര്യമാണെന്നും കെഎസ്ഇബി വ്യക്തമാക്കി. പ്രത്യേകിച്ച് വൈകുന്നേരം 7 മണി മുതൽ അർധരാത്രി വരെയുള്ള പീക്ക് സമയത്ത് വൈദ്യുതി ഉപയോഗം പരമാവധി കുറയ്ക്കാൻ ഉപഭോക്താക്കൾ സ്വമേധയാ തയ്യാറാകണമെന്ന് രാജമാണിക്യം അഭ്യർത്ഥിച്ചു.
