ആലുവ: റെയിൽവേ സ്റ്റേഷന് സമീപം കാൽനടക്കാരനായ 28 കാരനെ രണ്ടംഗ സംഘം ക്രൂരമായി ആക്രമിച്ച് കനാലിലേക്ക് തള്ളിയതായി പരാതി. ഞായറാഴ്ച പുലർച്ചെ 3.30 ഓടെയായിരുന്നു സംഭവം. കോടനാട് സ്വദേശിയായ ജോഫിൻ ജിജുവിനാണ് ആക്രമണത്തിൽ ഗുരുതരമായി പരിക്കേറ്റത്. മൂന്ന് വാരിയെല്ലുകൾക്കും വലതുകൈയ്ക്കും ഒടിവേറ്റിട്ടുണ്ട്.
ഒരു വിവാഹച്ചടങ്ങിൽ പങ്കെടുക്കുന്നതിനായി യാത്ര ചെയ്യുന്നതിനിടെയാണ് ജോഫിൻ ആക്രമണത്തിനിരയായത്. ഗൂഗിൾ മാപ്പിന്റെ സഹായത്തോടെ മെട്രോ സ്റ്റേഷനിൽ നിന്ന് റെയിൽവേ സ്റ്റേഷനിലേക്ക് നടന്നു പോകുന്നതിനിടെ അജ്ഞാതരായ രണ്ടുപേർ ജോഫിനെ തടഞ്ഞുനിർത്തി ആക്രമിക്കുകയായിരുന്നു.
ആദ്യം കല്ലുകൊണ്ട് തലയിൽ ഇടിച്ച് ജോഫിനെ നിലത്തുവീഴ്ത്തിയെന്നാണ് പരാതി. രക്ഷപ്പെടാൻ ശ്രമിച്ചെങ്കിലും അക്രമികൾ പിന്തുടർന്ന് വീണ്ടും മർദിച്ചു. തുടർന്ന് കഴുത്തിലുണ്ടായിരുന്ന സ്വര്ണ്ണച്ചെയിന് പിടിച്ചുപറിക്കുകയും കൈവശമുണ്ടായിരുന്ന പണം അപഹരിക്കുകയും ചെയ്തു. പണവും സ്വർണവും കവർച്ച ചെയ്യുകയെന്ന ലക്ഷ്യത്തോടെയായിരിക്കാം ആക്രമണമെന്നാണ് പ്രാഥമിക സംശയം.
മർദനത്തിന് ശേഷം ജോഫിനെ സമീപത്തെ കിടങ്ങിലെ ചെളിയിലൂടെ വലിച്ചിഴച്ച് കനാലിലേക്ക് തള്ളിയതായും പരാതിയുണ്ട്. ഗുരുതരമായി പരിക്കേറ്റിട്ടും അവിടെനിന്ന് രക്ഷപ്പെട്ട ജോഫിൻ സഹായം തേടി പോലീസ് സ്റ്റേഷനിലെത്തി.
പോലീസ് ഉടൻ തന്നെ അദ്ദേഹത്തെ ആശുപത്രിയിലെത്തിച്ചു. പരിക്കുകൾ ഗുരുതരമാണെന്ന് കണ്ടെത്തിയതിനെ തുടർന്ന് പിന്നീട് കോലഞ്ചേരി മെഡിക്കൽ മിഷൻ ആശുപത്രിയിലെ ഐസിയുവിലേക്ക് മാറ്റി. അടിയന്തര ശസ്ത്രക്രിയ ആവശ്യമായി വന്നേക്കാമെന്ന് ഡോക്ടർമാർ അറിയിച്ചതായാണ് വിവരം.
അക്രമികളെ കണ്ടാൽ തിരിച്ചറിയാൻ കഴിയുമെന്ന് ജോഫിൻ പോലീസിനോട് വ്യക്തമാക്കിയിട്ടുണ്ട്. അദ്ദേഹത്തിന്റെ മൊഴി രേഖപ്പെടുത്തിയ ആലുവ പോലീസ്, പ്രതികളെ തിരിച്ചറിഞ്ഞ് പിടികൂടുന്നതിനുള്ള അന്വേഷണം ഊർജിതമാക്കി.
