കൊച്ചി: കളമശ്ശേരി റെയിൽവേ സ്റ്റേഷനിൽ സിഗ്നൽ സംവിധാനങ്ങളുടെ നവീകരണവും അടിസ്ഥാന സൗകര്യ വികസന പ്രവർത്തനങ്ങളും നടക്കുന്നതിനാൽ ഒക്ടോബർ 27 ചൊവ്വാഴ്ച കേരളത്തിലൂടെ സർവീസ് നടത്തുന്ന നിരവധി ട്രെയിനുകൾക്ക് നിയന്ത്രണം ഏർപ്പെടുത്തി. ഇതിന്റെ ഭാഗമായി രണ്ട് വന്ദേ ഭാരത് എക്സ്പ്രസ് സർവീസുകൾ ഭാഗികമായി റദ്ദാക്കുകയും മറ്റ് പ്രധാന ട്രെയിനുകളുടെ സമയക്രമത്തിൽ മാറ്റം വരുത്തുകയും ചെയ്തിട്ടുണ്ട്.
ഒക്ടോബർ 27ന് കെഎസ്ആർ ബെംഗളൂരുവിൽനിന്ന് എറണാകുളം ജംഗ്ഷനിലേക്ക് സർവീസ് നടത്തുന്ന ട്രെയിൻ നമ്പർ 26651 വന്ദേ ഭാരത് എക്സ്പ്രസ് തൃശൂരിൽ യാത്ര അവസാനിപ്പിക്കും. തൃശൂരിനും എറണാകുളം ജംഗ്ഷനും ഇടയിലുള്ള സർവീസ് അന്നേദിവസം റദ്ദാക്കിയിട്ടുണ്ട്.
അതേസമയം, എറണാകുളം ജംഗ്ഷനിൽനിന്ന് കെഎസ്ആർ ബെംഗളൂരുവിലേക്ക് പുറപ്പെടേണ്ട ട്രെയിൻ നമ്പർ 26652 വന്ദേ ഭാരത് എക്സ്പ്രസ് എറണാകുളത്തിന് പകരം തൃശൂരിൽനിന്നായിരിക്കും യാത്ര ആരംഭിക്കുക. പതിവ് സമയക്രമം അനുസരിച്ചായിരിക്കും തൃശൂരിൽനിന്നുള്ള സർവീസ്. എറണാകുളം ജംഗ്ഷനും തൃശൂരിനും ഇടയിലുള്ള യാത്ര പൂർണമായും റദ്ദാക്കിയിട്ടുണ്ട്.
ഇതോടെ എറണാകുളത്തിനും തൃശൂരിനുമിടയിൽ വന്ദേ ഭാരത് സർവീസിനെ ആശ്രയിക്കുന്ന യാത്രക്കാർക്ക് ബദൽ യാത്രാസൗകര്യങ്ങൾ കണ്ടെത്തേണ്ടിവരും.
എറണാകുളം ജംഗ്ഷനിൽനിന്ന് ഹസ്രത്ത് നിസാമുദ്ദീനിലേക്ക് സർവീസ് നടത്തുന്ന ട്രെയിൻ നമ്പർ 12617 മംഗള ലക്ഷദ്വീപ് സൂപ്പർഫാസ്റ്റ് എക്സ്പ്രസിന്റെ പുറപ്പെടുന്ന സമയവും പുനഃക്രമീകരിച്ചിട്ടുണ്ട്.
സാധാരണ ഉച്ചയ്ക്ക് 1.25ന് എറണാകുളം ജംഗ്ഷനിൽനിന്ന് പുറപ്പെടേണ്ട ട്രെയിൻ ഒക്ടോബർ 27ന് ഒന്നര മണിക്കൂർ വൈകി ഉച്ചയ്ക്ക് 2.55നായിരിക്കും യാത്ര ആരംഭിക്കുക.
സിഗ്നൽ നവീകരണ പ്രവർത്തനങ്ങളുടെ ഭാഗമായി മറ്റ് എട്ട് ട്രെയിനുകൾക്കും വിവിധ സമയദൈർഘ്യത്തിലുള്ള നിയന്ത്രണങ്ങൾ ഏർപ്പെടുത്തിയിട്ടുണ്ട്.
-
16649 മംഗളൂരു–കന്യാകുമാരി പരശുറാം എക്സ്പ്രസ്: 1 മണിക്കൂർ 15 മിനിറ്റ്.
-
22642 ഷാലിമാർ–തിരുവനന്തപുരം സെൻട്രൽ സൂപ്പർഫാസ്റ്റ് എക്സ്പ്രസ്: 50 മിനിറ്റ്.
-
20924 ഗാന്ധിധാം–തിരുനെൽവേലി എക്സ്പ്രസ്: 45 മിനിറ്റ്.
-
22504 ദിബ്രുഗഡ്–കന്യാകുമാരി വിവേക് എക്സ്പ്രസ്: 25 മിനിറ്റ്.
-
12201 ലോകമാന്യ തിലക് ടെർമിനസ്–തിരുവനന്തപുരം നോർത്ത് ഗരീബ് രഥ് എക്സ്പ്രസ്: 25 മിനിറ്റ്.
-
56317 ഗുരുവായൂർ–എറണാകുളം പാസഞ്ചർ: 15 മിനിറ്റ്.
-
16346 തിരുവനന്തപുരം–ലോകമാന്യ തിലക് ടെർമിനസ് നേത്രാവതി എക്സ്പ്രസ്: 1 മണിക്കൂർ 20 മിനിറ്റ്.
-
19577 തിരുനെൽവേലി–ജാംനഗർ എക്സ്പ്രസ്: 40 മിനിറ്റ്.
യാത്രക്കാർ സമയക്രമം പരിശോധിക്കണം
കളമശ്ശേരി സ്റ്റേഷനിലെ സിഗ്നൽ സംവിധാനങ്ങളുടെ നവീകരണവുമായി ബന്ധപ്പെട്ടാണ് ഈ താൽക്കാലിക നിയന്ത്രണങ്ങൾ. വന്ദേ ഭാരത് സർവീസുകളുടെ ഭാഗിക റദ്ദാക്കലും മറ്റ് ട്രെയിനുകളുടെ സമയക്രമത്തിലെ മാറ്റങ്ങളും ദീർഘദൂര യാത്രക്കാരെയും പ്രതിദിന യാത്രക്കാരെയും ബാധിച്ചേക്കും.
പ്രത്യേകിച്ച് എറണാകുളം, ആലുവ, തൃശൂർ മേഖലകളിൽനിന്ന് യാത്ര ചെയ്യുന്നവർ ട്രെയിനുകളുടെ പുതുക്കിയ സമയക്രമവും സർവീസ് നിയന്ത്രണങ്ങളും മുൻകൂട്ടി പരിശോധിക്കുന്നത് യാത്രാതടസ്സങ്ങൾ ഒഴിവാക്കാൻ സഹായിക്കും.
യാത്രക്കാർ റെയിൽവേയുടെ ഔദ്യോഗിക അറിയിപ്പുകളും നാഷണൽ ട്രെയിൻ എൻക്വയറി സിസ്റ്റം (NTES) വഴിയുള്ള തത്സമയ വിവരങ്ങളും പരിശോധിക്കണമെന്ന് നിർദേശിക്കുന്നു.
