പാക്കിസ്താന് സന്ദർശന വേളയിൽ ലോകബാങ്ക് പ്രസിഡന്റ് അജയ് ബംഗയ്ക്ക് ഖുഷാബിലെ അദ്ദേഹത്തിന്റെ പൂർവ്വിക വസതിയില് ഗംഭീര സ്വീകരണം നൽകി. ബാൻഡ് സംഗീതത്തിന്റെയും സിനിമാ ഗാനങ്ങളുടെയും അകമ്പടിയോടെ നടന്ന പരിപാടിയുടെ വീഡിയോകൾ വൈറലായതോടെ സോഷ്യൽ മീഡിയയിൽ സമ്മിശ്ര പ്രതികരണങ്ങളാണ് ഉണ്ടായത്.
അന്താരാഷ്ട്ര കടത്തിന്റെ പേരിൽ പാക്കിസ്താന് പലപ്പോഴും വാർത്തകളിൽ ഇടം നേടാറുണ്ട്. ലോക ബാങ്കിൽ നിന്നും മറ്റ് സ്ഥാപനങ്ങളിൽ നിന്നുമുള്ള വലിയ വായ്പകളുടെ പേരിൽ നിരവധി തവണ വിമർശനങ്ങൾ നേരിടേണ്ടി വന്നിട്ടുമുണ്ട്. അതേസമയം, ലോകബാങ്ക് പ്രസിഡന്റ് അജയ് ബംഗ ഇപ്പോൾ പാക്കിസ്താന് സന്ദർശിക്കുകയാണ്. അദ്ദേഹത്തെ സ്വാഗതം ചെയ്യുന്നതിന്റെയും, അതിൽ ഒരു സിനിമാ ഗാനം ആലപിക്കുന്നതിന്റെയും വീഡിയോകൾ സോഷ്യൽ മീഡിയയിൽ അതിവേഗം പ്രചരിക്കുന്നു. ജനങ്ങള് ഈ വിഷയത്തിൽ അഭിപ്രായങ്ങൾ പങ്കുവയ്ക്കുന്നുണ്ട്, ഇതിനോട് പ്രതികരിക്കുന്നവരിൽ വലിയൊരു വിഭാഗം പാക്കിസ്താന് പൗരന്മാരാണെന്നത് ശ്രദ്ധേയമാണ്.
അജയ്പാൽ സിംഗ് ബംഗ ഇന്ത്യൻ വംശജനാണ്. പിതാവ് ഹർഭജൻ സിംഗ് ബംഗ ഇന്ത്യൻ ആർമിയിൽ ഉദ്യോഗസ്ഥനായിരുന്നു. വിഭജനത്തിന് മുമ്പ്, അദ്ദേഹത്തിന്റെ കുടുംബം പാക്കിസ്താനിലെ പഞ്ചാബ് പ്രവിശ്യയിലെ ഒരു നഗരമായ ഖുഷാബിലാണ് താമസിച്ചിരുന്നത്. ഈ കുടുംബബന്ധമാണ് അജയ് ബംഗയെ ഖുഷാബിലെ “ഗാലി സിഖാൻ വാലി” പ്രദേശം സന്ദർശിക്കാൻ പ്രേരിപ്പിച്ചത്, ഒരിക്കൽ അദ്ദേഹത്തിന്റെ പൂർവ്വിക ഭവനം അവിടെയായിരുന്നു. സർഗോധയ്ക്കും മിയാൻവാലിക്കും ഇടയിൽ ഝലം നദിയുടെ തീരത്താണ് ഖുഷാബ് സ്ഥിതി ചെയ്യുന്നതെന്നും “സൈനികരുടെ നഗരം” എന്നും ഇത് അറിയപ്പെടുന്നുവെന്നും പറയപ്പെടുന്നു.
റിപ്പോർട്ടുകൾ പ്രകാരം, ബംഗയെ വളരെ ആദരവോടെയാണ് സ്വീകരിച്ചത്. അദ്ദേഹത്തിന്റെ പഴയ വീടുമായി ബന്ധപ്പെട്ട രേഖകളുടെ ഒരു പകർപ്പ് ഒരു സ്മാരകമായി അദ്ദേഹത്തിന് സമ്മാനിച്ചു. അദ്ദേഹത്തിനു നല്കിയ സ്വീകരണമാണ് ഇപ്പോള് ചർച്ചാവിഷയമായിരിക്കുന്നത്. അദ്ദേഹത്തിന്റെ വാഹനവ്യൂഹത്തിന് മുന്നിൽ കുതിരവണ്ടികളും “മേരാ പിയാ ഘർ ആയ” എന്ന ഗാനം ആലപിക്കുന്ന ഒരു ബാൻഡ് സംഘവും ഉണ്ടായിരുന്നു. അദ്ദേഹത്തെ സ്വാഗതം ചെയ്യുന്ന പോസ്റ്ററുകളും സന്ദേശങ്ങളും നഗരമതിലുകളിൽ പതിച്ചിരുന്നു.
വീഡിയോ പുറത്തുവന്നതോടെ സോഷ്യൽ മീഡിയയിൽ ചർച്ചയും ആരംഭിച്ചു. ചിലർ ഇതിനെ അനാവശ്യമെന്ന് വിളിച്ചപ്പോള്, മറ്റുള്ളവരാകട്ടേ ഇതിനെ ബഹുമാനത്തിന്റെ പാരമ്പര്യം എന്ന് വിളിച്ചു. രസകരമെന്നു പറയട്ടെ, നിരവധി പാക്കിസ്താന് ഉപയോക്താക്കൾ വിമർശിച്ചവരിൽ ഉൾപ്പെടുന്നു. ഒരു അന്താരാഷ്ട്ര സംഘടനയുടെ തലവന് ഇത്തരമൊരു പ്രത്യേക പ്രോട്ടോക്കോൾ നൽകേണ്ടതിന്റെ ആവശ്യകതയെ ചിലർ ചോദ്യം ചെയ്തു, മറ്റുള്ളവർ ഇതിനെ അമിതമായ മുഖസ്തുതി എന്ന് വിളിച്ചു. ചില ഉപയോക്താക്കൾ നർമ്മം കലർന്ന അഭിപ്രായങ്ങൾ നൽകി, മറ്റുള്ളവർ ഗുരുതരമായ ചോദ്യങ്ങൾ ഉന്നയിച്ചു. മൊത്തത്തിൽ, ഈ വിഷയം സോഷ്യൽ മീഡിയയിൽ ചർച്ചാ വിഷയമായും ട്രോളിംഗിലും മാറി.
2023 ജൂൺ 2 നാണ് അജയ് ബംഗ ലോകബാങ്കിന്റെ പ്രസിഡന്റായി സ്ഥാനമേറ്റത്. അഞ്ച് വർഷത്തേക്കാണ് അദ്ദേഹത്തിന്റെ കാലാവധി. സ്ഥാപനത്തെ കൂടുതൽ ഫലപ്രദവും വികസനത്തിൽ ശ്രദ്ധ കേന്ദ്രീകരിക്കുന്നതുമാണ് അദ്ദേഹത്തിന്റെ ലക്ഷ്യം. ഇന്ത്യയിൽ ജനിച്ചു വളർന്ന ബംഗയ്ക്ക് അന്താരാഷ്ട്ര ധനകാര്യത്തിൽ വിപുലമായ പരിചയമുണ്ട്. പാക്കിസ്താന് സന്ദർശനം അദ്ദേഹത്തിന്റെ കുടുംബ ചരിത്രവുമായുള്ള വൈകാരിക ബന്ധമായും കണക്കാക്കപ്പെടുന്നു.
