പ്രസിഡന്റ് ഡൊണാൾഡ് ട്രംപിനെയും തോക്ക് അവകാശങ്ങളെയും ചൊല്ലി ടെക്സാസിൽ നടന്ന ചൂടേറിയ ചർച്ച കൊലപാതകത്തില് കലാശിച്ചു. പിതാവ് തന്റെ 23 വയസ്സുള്ള മകളെ വെടി വെച്ച് കൊലപ്പെടുത്തി. മകള് സംഭവസ്ഥലത്ത് തന്നെ മരിച്ചു. 2025 ജനുവരിയില് നടന്ന സംഭവത്തിനെ ചുരുളഴിഞ്ഞത് ബ്രിട്ടനിൽ ഒരു കൊറോണറുടെ ഇൻക്വസ്റ്റിനെത്തുടർന്നാണ്. കേസ് ഇപ്പോൾ വീണ്ടും വാർത്തകളിൽ ഇടം നേടിയിരിക്കുകയാണ്.
ബ്രിട്ടീഷ് നിവാസിയായ ലൂസി ഹാരിസൺ ടെക്സസിൽ തന്റെ പിതാവ് ക്രിസ് ഹാരിസണെ സന്ദർശിക്കുകയായിരുന്നു. 2025 ജനുവരി 10 ന് ഡാളസിന് സമീപം നെഞ്ചിൽ വെടിയേറ്റതിനെ തുടർന്ന് അവർ മരിച്ചു. ഒരു വർഷത്തിലേറെ കഴിഞ്ഞ് ബ്രിട്ടനിൽ ഒരു കൊറോണറുടെ ഇൻക്വസ്റ്റ് ആരംഭിച്ചപ്പോഴാണ് കേസ് വെളിച്ചത്തുവന്നത്.
ലൂസി ഹാരിസണിന്റെ മരണം കഴിഞ്ഞ് ഒരു വർഷത്തിലേറെയായി, ബ്രിട്ടനിൽ ഒരു ഔപചാരിക ഇൻക്വസ്റ്റ് ആരംഭിച്ചു. നിയമപ്രകാരം, വിദേശത്ത് ഒരു ബ്രിട്ടീഷ് പൗരന്റെ പെട്ടെന്നുള്ള മരണത്തിന് കൊറോണറുടെ ഇൻക്വസ്റ്റ് നടത്തും. ചെഷയർ കൊറോണർ കോടതിയിലാണ് വാദം കേട്ടത്.
കോടതി രേഖകൾ പ്രകാരം, ലൂസി ഹാരിസൺ തന്റെ കാമുകൻ സാം ലിറ്റ്ലറിനൊപ്പം അവധിക്കാലമാഘോഷിക്കാന് അമേരിക്കയിലെ ടെക്സാസിലുള്ള തന്റെ പിതാവിനെ സന്ദർശിക്കുകയായിരുന്നു. മദ്യത്തിന്റെയും തോക്കിന്റെ ഉടമസ്ഥതയുടെയും പേരിൽ ലൂസിയും പിതാവും ഇടയ്ക്കിടെ തർക്കിച്ചിരുന്നതായി സാം ലിറ്റ്ലർ കോടതിയെ അറിയിച്ചു.
സംഭവദിവസം രാവിലെ, ദമ്പതികൾ ബ്രിട്ടനിലേക്ക് മടങ്ങാൻ തയ്യാറെടുക്കുമ്പോൾ, ട്രംപിനെക്കുറിച്ച് ലൂസിയും അവളുടെ പിതാവും തമ്മിൽ ചൂടേറിയ തർക്കം ആരംഭിച്ചു. “ക്രിസും ലൂസിയും തമ്മിൽ വലിയ തർക്കമുണ്ടായി, അത് ലൂസിയെ ദേഷ്യത്തോടെ മുകളിലേക്ക് ഓടാൻ പ്രേരിപ്പിച്ചു” എന്ന് ലിറ്റ്ലർ പറഞ്ഞു.
വിമാനത്താവളത്തിലേക്ക് പോകുന്നതിന് അര മണിക്കൂർ മുമ്പ്, ലൂസിയുടെ കൈപിടിച്ച് തന്റെ കിടപ്പുമുറിയിലേക്ക് കൊണ്ടുപോയതായി ക്രിസ് ഹാരിസൺ കോടതിയെ അറിയിച്ചു.
വെടിയൊച്ച കേട്ടപ്പോൾ താൻ താഴെയുണ്ടായിരുന്നതായി ലിറ്റ്ലർ പറഞ്ഞു.
“മുറിയിലേക്ക് ഓടിക്കയറിയത് ഞാൻ ഓർക്കുന്നു, ലൂസി ബാത്ത്റൂമിന്റെ വാതിലിനടുത്ത് തറയിൽ കിടക്കുകയായിരുന്നു, ക്രിസ് അലറുകയും എന്തോ അസംബന്ധം പറയുകയും ചെയ്യുന്നുണ്ടായിരുന്നു,” ലിറ്റ്ലര് ഇൻക്വസ്റ്റിൽ പറഞ്ഞു.
51 കാരനായ ക്രിസ് ഹാരിസൺ ഇൻക്വസ്റ്റിൽ നേരിട്ട് ഹാജരായില്ല, മറിച്ച് ഒരു രേഖാമൂലമുള്ള പ്രസ്താവന സമർപ്പിച്ചു. സംഭവം നടന്ന ദിവസം താൻ വീണ്ടും മദ്യപാനത്തിലേക്ക് വഴുതിവീണുവെന്നും ഏതാണ്ട് ഒരു കുപ്പി മുഴുവൻ വൈന് കുടിച്ചുവെന്നും അദ്ദേഹം പറഞ്ഞു.
തോക്ക് കുറ്റകൃത്യങ്ങളെക്കുറിച്ചുള്ള ഒരു വാർത്താ റിപ്പോർട്ട് താനും മകളും കാണുകയായിരുന്നുവെന്ന് അദ്ദേഹം തന്റെ പ്രസ്താവനയിൽ പറഞ്ഞു. തന്റെ തോക്ക് കാണാന് ആഗ്രഹിക്കുന്നുണ്ടോ എന്ന് ലൂസിയോട് ചോദിച്ചു. ഒരു ഗ്ലോക്ക് 9 എംഎം പിസ്റ്റൾ കാണിക്കാൻ അയാൾ ലൂസിയെ തന്റെ കിടപ്പുമുറിയിലേക്ക് കൊണ്ടുപോയി.
“അവളെ കാണിക്കാൻ ഞാൻ തോക്ക് ഉയർത്തിയപ്പോൾ പെട്ടെന്ന് ഒരു വലിയ സ്ഫോടന ശബ്ദം കേട്ടു. എന്താണ് സംഭവിച്ചതെന്ന് എനിക്ക് മനസ്സിലായില്ല. ലൂസി ഉടനെ താഴെ വീണു,” അദ്ദേഹം തന്റെ പ്രസ്താവനയിൽ പറഞ്ഞു.
ക്രിസ് ഹാരിസൺ മുമ്പ് മദ്യാസക്തിക്ക് ചികിത്സ നേടിയിട്ടുണ്ടെന്നും കോടതിയിൽ പറഞ്ഞു.
