മത്സരയോട്ടത്തിനെതിരായ ലഘുലേഖ വിതരണത്തിനിടെ ബസ് ജീവനക്കാരുടെ പ്രതിഷേധം; തൃശ്ശൂർ–വാടാനപ്പള്ളി സംസ്ഥാനപാതയിൽ ഗതാഗതം സ്തംഭിച്ചു
അരിമ്പൂർ: ചേറ്റുപുഴയിൽ സ്വകാര്യ ബസ് തട്ടിവീണ സ്കൂട്ടർ യാത്രക്കാരി ബസിന്റെ ചക്രം കയറി മരിച്ച സംഭവത്തിന്റെ പശ്ചാത്തലത്തിൽ മത്സരയോട്ടത്തിനെതിരേ ഡി.വൈ.എഫ്.ഐ. നടത്തിയ ലഘുലേഖ വിതരണത്തിനിടെ കുന്നത്തങ്ങാടി സെന്ററിൽ സംഘർഷാവസ്ഥ. പ്രതിഷേധവുമായി ബസ് ജീവനക്കാർ രംഗത്തെത്തുകയും പിന്നാലെ സ്വകാര്യ ബസുകൾ മിന്നൽപ്പണിമുടക്ക് നടത്തുകയും ചെയ്തതോടെ തൃശ്ശൂർ–വാടാനപ്പള്ളി സംസ്ഥാനപാതയിൽ ഗതാഗതം താറുമാറായി. വിവിധ മേഖലകളിലേക്കുള്ള നൂറുകണക്കിന് യാത്രക്കാരാണ് അപ്രതീക്ഷിത സർവീസ് തടസ്സത്തിൽ വലഞ്ഞത്.
തിങ്കളാഴ്ച രാവിലെ പത്തോടെയാണ് സംഭവങ്ങളുടെ തുടക്കം. ചേറ്റുപുഴയിലെ അപകടത്തിന്റെ പശ്ചാത്തലത്തിൽ യാത്രക്കാരുടെയും മറ്റു വാഹനയാത്രക്കാരുടെയും ജീവന് ഭീഷണിയാകുന്ന മത്സരയോട്ടവും അമിതവേഗവും അവസാനിപ്പിക്കണമെന്ന ആവശ്യവുമായി ഡി.വൈ.എഫ്.ഐ. മണലൂർ ബ്ലോക്ക് കമ്മിറ്റിയുടെ നേതൃത്വത്തിൽ കുന്നത്തങ്ങാടി സെന്ററിൽ സ്വകാര്യ ബസ് ജീവനക്കാർക്ക് ലഘുലേഖ വിതരണം നടത്തുകയായിരുന്നു.
ലഘുലേഖ വിതരണം പുരോഗമിക്കുന്നതിനിടെ ഒരു സ്വകാര്യ ബസിലെ ജീവനക്കാരൻ പ്രതിഷേധിച്ച് ബസ് റോഡിൽ നിർത്തിയിട്ടു. പിന്നാലെയെത്തിയ മറ്റു സ്വകാര്യ ബസുകളും സർവീസ് നിർത്തി റോഡിൽ നിരന്നതോടെ സംസ്ഥാനപാതയിൽ ഗതാഗതക്കുരുക്ക് രൂക്ഷമായി. തുടർന്ന് കൂടുതൽ ബസുകൾ സർവീസ് നിർത്തിയതോടെ സ്ഥിതി മിന്നൽപ്പണിമുടക്കിലേക്ക് നീങ്ങി.
പ്രതിഷേധത്തിനിടെ ഡി.വൈ.എഫ്.ഐ. പ്രവർത്തകരും ബസ് ജീവനക്കാരും തമ്മിൽ വാക്കേറ്റമുണ്ടായി. ചില ബസ് ജീവനക്കാർ പ്രവർത്തകരുടെ അടുത്തേക്ക് പാഞ്ഞടുക്കുകയും വെല്ലുവിളിക്കുകയും ചെയ്തതായി ഡി.വൈ.എഫ്.ഐ. ആരോപിച്ചു. ഇതോടെ സ്ഥലത്ത് സംഘർഷാവസ്ഥ ഉടലെടുത്തു. പ്രവർത്തകരോട് മോശമായി പെരുമാറിയെന്നാരോപിച്ച് ഒരു ബസ് ജീവനക്കാരനെതിരേ പോലീസിൽ പരാതിയും നൽകി.
സ്ഥിതി രൂക്ഷമായതോടെ അന്തിക്കാട് സി.ഐ. മിഥുന്റെ നേതൃത്വത്തിലുള്ള പോലീസ് സംഘം സ്ഥലത്തെത്തി. ഇരുവിഭാഗങ്ങളെയും പിന്തിരിപ്പിച്ച പോലീസ് റോഡിൽ നിർത്തിയിട്ട ബസുകൾ മാറ്റി ഗതാഗതം പുനഃസ്ഥാപിക്കാനുള്ള ശ്രമം ആരംഭിച്ചു. രാവിലെ പതിനൊന്നരയോടെ ബസുകൾ റോഡിൽനിന്ന് മാറ്റിയെങ്കിലും സ്വകാര്യ ബസ് സർവീസുകൾ പൂർണതോതിൽ പുനരാരംഭിപ്പിക്കാനുള്ള പോലീസിന്റെ ശ്രമം ഉടൻ ഫലം കണ്ടില്ല.
മുന്നറിയിപ്പില്ലാതെ സ്വകാര്യ ബസുകൾ സർവീസ് നിർത്തിയതോടെ കാഞ്ഞാണി, വാടാനപ്പള്ളി, ചേറ്റുവ, ഗുരുവായൂർ, ചാവക്കാട്, ഏനാമാക്കൽ, അന്തിക്കാട്, പെരിങ്ങോട്ടുകര, തൃപ്രയാർ, തൃശ്ശൂർ തുടങ്ങിയ മേഖലകളിലേക്കുള്ള യാത്രക്കാരാണ് ഏറെ ബുദ്ധിമുട്ടിലായത്.
ജോലിക്കും പഠനത്തിനും ആശുപത്രി ആവശ്യങ്ങൾക്കും മറ്റ് അത്യാവശ്യ കാര്യങ്ങൾക്കുമായി യാത്ര ചെയ്തിരുന്നവർ ഉൾപ്പെടെ നൂറുകണക്കിന് ആളുകൾക്ക് വഴിയിൽ കാത്തുനിൽക്കേണ്ടിവന്നു. പലരും മറ്റു യാത്രാമാർഗങ്ങൾ തേടേണ്ട സാഹചര്യവും ഉണ്ടായി.
സമാധാനപരമായി നടത്തിയ ലഘുലേഖ വിതരണത്തിനെതിരേ ഇഷാനിയ ബസിലെ ജീവനക്കാർ സ്വീകരിച്ച നിലപാടാണ് പിന്നീട് മിന്നൽപ്പണിമുടക്കിലേക്ക് കാര്യങ്ങൾ എത്തിച്ചതെന്ന് ചില യാത്രക്കാർ ആരോപിച്ചു. ബസ് ജീവനക്കാരും പ്രതിഷേധക്കാരും തമ്മിലുള്ള തർക്കത്തിന്റെ ദുരിതം ഒടുവിൽ സാധാരണ യാത്രക്കാരാണ് അനുഭവിക്കേണ്ടിവന്നതെന്നും അവർ ചൂണ്ടിക്കാട്ടി.
‘മത്സരയോട്ടം അവസാനിപ്പിക്കണം’” ഡി.വൈ.എഫ്.ഐ.
യാത്രക്കാരുടെ ജീവനെടുക്കുന്ന തരത്തിലുള്ള സ്വകാര്യ ബസുകളുടെ മത്സരയോട്ടം അവസാനിപ്പിക്കണമെന്ന ആവശ്യമാണ് ലഘുലേഖ വിതരണത്തിലൂടെ ഉന്നയിച്ചതെന്ന് ഡി.വൈ.എഫ്.ഐ. നേതാക്കൾ പറഞ്ഞു. പൊതുനിരത്തുകളിൽ യാത്രക്കാരുടെയും മറ്റു വാഹനയാത്രക്കാരുടെയും സുരക്ഷ ഉറപ്പാക്കാൻ ബസ് ജീവനക്കാർ കൂടുതൽ ഉത്തരവാദിത്വത്തോടെ പെരുമാറണമെന്നും അവർ ആവശ്യപ്പെട്ടു.
ഡി.വൈ.എഫ്.ഐ. മണലൂർ ബ്ലോക്ക് സെക്രട്ടറി കെ. സച്ചിൻ, പ്രസിഡന്റ് വി.പി. പ്രേംശങ്കർ, പി.എസ്. മിഥുൻ, എ.എം. ഗായത്രി, ഗസിൽ, എം.എസ്. വൈശാഖ് എന്നിവർ പ്രതിഷേധത്തിനും ലഘുലേഖ വിതരണത്തിനും നേതൃത്വം നൽകി.
‘ബസുകളെ മാത്രം കുറ്റപ്പെടുത്തുന്നത് ശരിയല്ല’: തൊഴിലാളി സഹായസമിതി
അതേസമയം, റോഡപകടങ്ങളുടെ പേരിൽ സ്വകാര്യ ബസുകളെ മാത്രം ലക്ഷ്യമിടുന്ന സമീപനം ശരിയല്ലെന്നാണ് ബസ് തൊഴിലാളികളുടെ നിലപാട്. അപകടങ്ങൾക്ക് കാരണമാകുന്ന മറ്റു വാഹനങ്ങൾക്കെതിരെയും ഒരേ രീതിയിലുള്ള നടപടി സ്വീകരിക്കണമെന്ന് കാഞ്ഞാണി മേഖലാ ബസ് തൊഴിലാളി സഹായസമിതി ഭാരവാഹികൾ ആവശ്യപ്പെട്ടു.
റോഡുകളുടെ വീതിക്കുറവും വർധിച്ചുവരുന്ന ഗതാഗതത്തിരക്കും അപകടങ്ങൾക്ക് കാരണമാകുന്ന ഘടകങ്ങളാണെന്നും നിലവിലുള്ള റോഡുകൾ വീതി കൂട്ടി അടിസ്ഥാനസൗകര്യങ്ങൾ മെച്ചപ്പെടുത്താൻ അധികൃതർ നടപടി സ്വീകരിക്കണമെന്നും അവർ ആവശ്യപ്പെട്ടു.
കാഞ്ഞാണി മേഖലാ ബസ് തൊഴിലാളി സഹായസമിതി ട്രഷറർ അഭിലാഷ്, പ്രസിഡന്റ് ജിക്സൺ, സെക്രട്ടറി കെ.സി. റെജി എന്നിവരാണ് തൊഴിലാളികളുടെ നിലപാട് വ്യക്തമാക്കിയത്.
ചേറ്റുപുഴയിലെ ദാരുണ അപകടത്തെ തുടർന്നുയർന്ന റോഡ് സുരക്ഷാ ചർച്ചകൾക്കിടെയാണ് കുന്നത്തങ്ങാടിയിലെ പ്രതിഷേധവും തുടർന്നുണ്ടായ മിന്നൽപ്പണിമുടക്കും. ബസ് ജീവനക്കാരും പ്രതിഷേധക്കാരും തമ്മിലുള്ള തർക്കം സർവീസ് തടസ്സത്തിലേക്ക് നീങ്ങിയതോടെ അതിന്റെ ഏറ്റവും വലിയ പ്രത്യാഘാതം നേരിട്ടത് സാധാരണ യാത്രക്കാരായിരുന്നു.
