നേറ്റോ സൈനിക സഖ്യം കൂടുതൽ വിപുലീകരിക്കുന്നതിനെതിരെ റഷ്യ മുന്നറിയിപ്പ് ആവർത്തിച്ചു. സഖ്യം “ഏറ്റുമുട്ടാനുള്ള ഒരു ഉപകരണം” ആയി തുടരുന്നുവെന്ന് ആരോപിച്ചു. സ്വീഡന്റെയും ഫിൻലൻഡിന്റെയും സൈനിക സഖ്യത്തിൽ ചേരാനുള്ള പദ്ധതി യൂറോപ്പിൽ സ്ഥിരത കൊണ്ടുവരില്ലെന്ന് മോസ്കോയിൽ ഒരു പത്രസമ്മേളനത്തിൽ സംസാരിക്കവെ ക്രെംലിൻ വക്താവ് ദിമിത്രി പെസ്കോവ് പറഞ്ഞു.
നേറ്റോയെ “ഏറ്റുമുട്ടലിലേക്ക് സജ്ജമാക്കിയിരിക്കുന്ന ഒരു ഉപകരണമാക്കി, അതിന്റെ കൂടുതൽ വിപുലീകരണം നടത്തിയാല്‍ യൂറോപ്യൻ ഭൂഖണ്ഡത്തിന് സ്ഥിരത കൊണ്ടുവരില്ല” എന്ന് അദ്ദേഹം പറഞ്ഞു.
രണ്ട് യൂറോപ്യൻ രാജ്യങ്ങൾ നേറ്റോയിൽ ചേരുന്നതിന്റെ സാധ്യതകൾ കഴിഞ്ഞയാഴ്ച ബ്രസൽസിൽ സഖ്യത്തിലെ ഉന്നത നയതന്ത്രജ്ഞർ തമ്മിൽ ചർച്ച ചെയ്തതായി യുഎസ് സ്റ്റേറ്റ് ഡിപ്പാർട്ട്‌മെന്റ് മുതിർന്ന ഉദ്യോഗസ്ഥൻ പറഞ്ഞതിന് പിന്നാലെയാണ്
ദിമിത്രി പെസ്കോവിന്റെ പരാമർശം.
ഫിൻ‌ലൻഡും സ്വീഡനുമാണ് ഉടൻ സഖ്യത്തിൽ ചേരാൻ ഒരുങ്ങുന്നത്. ഫിൻലൻഡിന്റെ അപേക്ഷ ജൂണിൽ പ്രതീക്ഷിക്കുന്നു, സ്വീഡൻ പിന്തുടരുമെന്ന് പ്രതീക്ഷിക്കുന്നു.
ഉക്രെയ്നിലെ റഷ്യയുടെ സൈനിക നടപടിക്ക് മറുപടിയായി സൈനിക സഖ്യത്തിന്റെ വിപുലീകരണത്തെ വാഷിംഗ്ടൺ ന്യായീകരിച്ചതാണ് ഇരു രാജ്യങ്ങൾക്കുമിടയിൽ രൂക്ഷമായ പ്രതിസന്ധിയിലേക്ക് നയിച്ചത്.
മോസ്കോയെ ഒറ്റപ്പെടുത്താനുള്ള ശ്രമങ്ങൾ പരാജയപ്പെടുമെന്ന് പുടിൻ ചൊവ്വാഴ്ച പാശ്ചാത്യ രാജ്യങ്ങൾക്ക് മുന്നറിയിപ്പ് നൽകി. സോവിയറ്റ് ബഹിരാകാശ പദ്ധതിയുടെ വിജയം, കഠിനമായ സാഹചര്യങ്ങളിൽ റഷ്യയ്ക്ക് അതിശയകരമായ കുതിച്ചുചാട്ടം കൈവരിക്കാൻ കഴിയുമെന്നത് തെളിവായി പുടിന്‍ ചൂണ്ടിക്കാട്ടി.
ക്രെംലിനിനെതിരായ പാശ്ചാത്യ ആരോപണങ്ങൾ പ്രതിധ്വനിച്ചുകൊണ്ട് യുകെ, ഉക്രെയ്നിലെ മരിയുപോളിൽ റഷ്യൻ സൈന്യം തങ്ങളുടെ ഓപ്പറേഷനിൽ രാസായുധങ്ങൾ ഉപയോഗിച്ചതായി ആരോപിച്ചു.
ഉക്രെയ്‌നെതിരെ മോസ്കോ ഏതെങ്കിലും രാസായുധം പ്രയോഗിച്ചാൽ എന്തു ചെയ്യണമെന്ന എല്ലാ ഓപ്ഷനുകളും തങ്ങളുടെ പക്കലുണ്ടെന്ന് ബ്രിട്ടീഷ് സായുധ സേനാ മന്ത്രി ജെയിംസ് ഹീപ്പി ചൊവ്വാഴ്ച മുന്നറിയിപ്പു നല്‍കി. “തീര്‍ച്ചയായും രാസായുധങ്ങളുടെ ഉപയോഗത്തിന് ഒരു പ്രതികരണം ലഭിക്കും, ആ പ്രതികരണം എന്തായിരിക്കുമെന്നതിനുള്ള എല്ലാ ഓപ്ഷനുകളും ഞങ്ങളുടെ മേശപ്പുറത്തുണ്ട്,” ഹീപ്പി മാധ്യമങ്ങളോട് പറഞ്ഞു.
