വാഷിംഗ്ടൺ: മുൻ യുഎസ് പ്രസിഡന്റ് ഡൊണാൾഡ് ട്രംപിന്റെ ട്വിറ്റർ അക്കൗണ്ട് പുനഃസ്ഥാപിച്ചു. അദ്ദേഹത്തിന്റെ ട്വിറ്റര്‍ അക്കൗണ്ട് പുനഃസ്ഥാപിക്കുമെന്ന് ഇലോൺ മസ്‌ക് പ്രഖ്യാപിച്ചതിനു പിന്നാലെയാണ് ഇന്ന് (ഞായറാഴ്ച) ട്രംപ് വീണ്ടും ട്വിറ്ററില്‍ പ്രത്യക്ഷപ്പെട്ടത്.
അക്രമത്തിന് പ്രേരിപ്പിച്ചതിന് മുൻ പ്രസിഡന്റിനെതിരായ 22 മാസത്തെ സസ്‌പെൻഷൻ നീക്കുന്നതായി ഇലോൺ മസ്‌ക് പ്രഖ്യാപിച്ച് മിനിറ്റുകൾക്കുള്ളില്‍ ട്രംപിന്റെ ഒരിക്കൽ ബ്ലോക്ക് ചെയ്‌ത ട്വിറ്റർ അക്കൗണ്ട് വീണ്ടും പ്രത്യക്ഷപ്പെട്ടു.
നേരത്തെ അക്രമത്തിന് പ്രേരിപ്പിച്ചതിന്റെ പേരിൽ ആജീവനാന്ത വിലക്കിന് വിധേയനായ ട്രംപിന്റെ അക്കൗണ്ട് പുനഃസ്ഥാപിക്കണമോ എന്നതിനെക്കുറിച്ച് വോട്ടു ചെയ്യാൻ മൈക്രോബ്ലോഗിംഗ് വെബ്‌സൈറ്റിന്റെ ഉപയോക്താക്കളോട് ആവശ്യപ്പെട്ട് ട്വിറ്റർ സിഇഒ മസ്‌ക് ഒരു വോട്ടെടുപ്പ് നടത്തിയിരുന്നു.
സർവേ പ്രകാരം, 15 ദശലക്ഷത്തിലധികം ട്വിറ്റർ ഉപയോക്താക്കൾ വോട്ടെടുപ്പിൽ പങ്കെടുത്തു. അതില്‍ 51.8 ശതമാനം പേർ പുനഃസ്ഥാപിക്കുന്നതിന് അനുകൂലമായി വോട്ട് ചെയ്തു.
2024-ൽ വൈറ്റ് ഹൗസിലേക്കുള്ള തിരിച്ചുവരവ് പ്രഖ്യാപിച്ച ട്രംപ്, മസ്‌കിനെ പുകഴ്ത്തുകയും തനിക്ക് എപ്പോഴും അദ്ദേഹത്തെ ഇഷ്ടമാണെന്ന് പറയുകയും ചെയ്തു. എന്നാൽ, ട്വിറ്റർ ബോട്ടുകൾ, വ്യാജ അക്കൗണ്ടുകൾ എന്നിവയാൽ കഷ്ടപ്പെടുന്നുണ്ടെന്നും അത് അഭിമുഖീകരിച്ച പ്രശ്‌നങ്ങൾ അവിശ്വസനീയമാണെന്നും ട്രംപ് പറഞ്ഞു.
2020-ൽ, യുഎസ് പ്രസിഡന്റ് തിരഞ്ഞെടുപ്പിനെത്തുടർന്ന് ജനുവരി 6 ന് ക്യാപിറ്റോൾ ഹില്ലിൽ നടന്ന കലാപത്തിന്റെ പശ്ചാത്തലത്തിൽ ട്രംപിന്റെ അക്കൗണ്ട് താൽക്കാലികമായി നിർത്തിവച്ചിരുന്നു, ഇത് മുൻ യുഎസ് പ്രസിഡന്റിന് നിയമപരമായ പ്രശ്‌നങ്ങളുണ്ടാക്കി.
ട്വിറ്റര്‍ പ്ലാറ്റ്‌ഫോമിന്റെ നിയമങ്ങൾ ലംഘിച്ചതിന് മുമ്പ് അനിശ്ചിതകാല നിരോധനത്തിന് വിധേയമായ അക്കൗണ്ടുകൾ വെള്ളിയാഴ്ച മസ്‌ക് പുനഃസ്ഥാപിക്കാൻ തുടങ്ങിയിരുന്നു. രചയിതാവ് ജോർദാൻ പീറ്റേഴ്‌സണും ഹാസ്യനടൻ കാത്തി ഗ്രിഫിനും അക്കൗണ്ടുകൾ പുനഃസ്ഥാപിച്ച ആദ്യ വ്യക്തികളില്‍ ഉൾപ്പെടുന്നു.
പുതിയ ട്വിറ്റർ നയം സംസാര സ്വാതന്ത്ര്യമാണ്, പക്ഷേ നെഗറ്റീവ്/വിദ്വേഷ ട്വീറ്റുകൾ പരമാവധി ഡീബൂസ്റ്റ് ചെയ്യുകയും ഡീമോണിറ്റൈസ് ചെയ്യുകയും ചെയ്യുമെന്ന് മസ്‌ക് നേരത്തെ ഒരു ട്വീറ്റിൽ പറഞ്ഞിരുന്നു.
