ഇറാനും ഇസ്രായേലും തമ്മിലുള്ള ഇതിനകം തന്നെ സംഘർഷഭരിതമായ ബന്ധത്തെ തൂക്കിലേറ്റൽ കൂടുതൽ വഷളാക്കിയേക്കാം. വർഷങ്ങളായി ഇരു രാജ്യങ്ങളും തമ്മിൽ പരസ്പര അവിശ്വാസം നിലനിൽക്കുന്നുണ്ട്, ചാരവൃത്തിയും ആക്രമണ പദ്ധതിയും ആരോപിച്ച് അവർ പരസ്പരം നിരന്തരം ആരോപണങ്ങൾ ഉന്നയിക്കുന്നു.
ഇസ്രായേൽ രഹസ്യാന്വേഷണ ഏജൻസിയായ മൊസാദിനു വേണ്ടി ചാരപ്പണി നടത്തിയെന്നും, ഒരു ഉന്നത സൈനിക ഉദ്യോഗസ്ഥന്റെ കൊലപാതകത്തിൽ പങ്കുണ്ടെന്നും ആരോപിച്ച് ഇറാൻ ബുധനാഴ്ച ഒരാളെ തൂക്കിലേറ്റി. 2020 ൽ ഇറാനിയൻ അധികൃതർ അറസ്റ്റ് ചെയ്ത മൊഹ്‌സാൻ ലങ്കാർനെഷിനെയാണ് തൂക്കിലേറ്റിയത്. റിപ്പോർട്ട് പ്രകാരം, 2020 ൽ മൊസാദിൽ റിക്രൂട്ട് ചെയ്യപ്പെട്ട മൊഹ്‌സാൻ ജോർജിയയിലും നേപ്പാളിലും ഇസ്രായേൽ ഏജന്റുമാരുമായി പ്രവര്‍ത്തിച്ചിട്ടുണ്ട്.
മൊസാദിന് സാങ്കേതിക വിവരങ്ങൾ നൽകിയതിനും 2022 ൽ ടെഹ്‌റാനിൽ മുതിർന്ന റെവല്യൂഷണറി ഗാർഡ് ഓഫീസർ കേണൽ ഹസ്സൻ സയ്യിദ് ഖൊദായിയെ കൊലപ്പെടുത്താൻ സഹായിച്ചതിനുമാണ് മൊഹ്‌സനെതിരെ കുറ്റം ചുമത്തിയത്. ബൈക്കിലെത്തിയ രണ്ട് അക്രമികൾ പട്ടാപ്പകൽ ഖൊദായിയെ വീടിന് പുറത്ത് വെടിവച്ചു കൊന്നു. തുടക്കത്തിൽ, പ്രാദേശിക മാധ്യമങ്ങൾ അദ്ദേഹത്തെ “ക്ഷേത്രത്തിന്റെ സംരക്ഷകൻ” എന്നാണ് വിശേഷിപ്പിച്ചത്. ഖുദ്‌സ് ഫോഴ്‌സിന് കീഴിൽ വിദേശത്ത് തീവ്രവാദ സംഘടനകൾക്കെതിരെ പോരാടുന്ന ഇറാനിയൻ സൈനികർക്കാണ് ഈ പദവി നൽകുന്നത്.
ഇതിനുപുറമെ, ഇസ്ഫഹാൻ നഗരത്തിൽ നിരവധി രഹസ്യ ഒളിത്താവളങ്ങൾ വാടകയ്‌ക്കെടുത്തതിനും 2023 ജനുവരിയിൽ ഒരു സൈനിക കേന്ദ്രത്തിൽ നടന്ന ഡ്രോൺ ആക്രമണത്തിന് സഹായിച്ചതിനും മൊഹ്‌സനെതിരെ കുറ്റം ചുമത്തിയിരുന്നു. ഈ ആക്രമണം ഇസ്രായേൽ ആസൂത്രണം ചെയ്തതാണെന്നും ആക്രമണത്തിന് ആവശ്യമായ ലോജിസ്റ്റിക്സ് മൊഹ്‌സെൻ ഒരുക്കിയിരുന്നുവെന്നും ഇറാൻ പറയുന്നു.
രഹസ്യ നടപടികൾക്കും കഠിനമായ വിധികൾക്കും പേരുകേട്ട ഇറാനിലെ ഉയർന്ന സുരക്ഷയുള്ള വിപ്ലവ കോടതിയിലാണ് കേസ് പരിഗണിച്ചത്. ഈ കോടതിയിൽ മൊഹ്സാന് പരിമിതമായ നിയമസഹായം മാത്രമേ ലഭിച്ചുള്ളൂ, മാധ്യമങ്ങൾക്കും വാദം കേൾക്കലിൽ പങ്കെടുക്കാൻ അനുവാദമുണ്ടായിരുന്നില്ല. മൊഹ്‌സാൻ കോടതിയിൽ തനിക്കെതിരായ കുറ്റങ്ങൾ സമ്മതിച്ചു, തുടർന്ന് വധശിക്ഷയ്ക്ക് വിധിക്കുകയും ഒടുവിൽ തൂക്കിലേറ്റുകയും ചെയ്തു. ഇറാനും ഇസ്രായേലും തമ്മിലുള്ള രഹസ്യ സംഘർഷത്തെ ഈ കാര്യം വീണ്ടും വെളിച്ചത്തു കൊണ്ടുവന്നിരിക്കുകയാണ്.
