പത്തനംതിട്ട: ആചാരങ്ങള്‍ പാലിച്ച് ശബരിമല സന്ദര്‍ശിക്കുന്ന ആദ്യ രാഷ്ട്രപതിയായ ദ്രൗപദി മുര്‍മു പമ്പയില്‍ നിന്ന് ഇരുമുടി കെട്ട് ചുമന്ന് കാല്‍നടയായി മല കയറും. പ്രധാനമന്ത്രിയായിരിക്കെ ഇന്ദിരാഗാന്ധി ശബരിമലയില്‍ കയറാനുള്ള ആഗ്രഹം പ്രകടിപ്പിച്ചിരുന്നു. നേരിട്ട് ഇറങ്ങുന്നതിനായി സന്നിധാനത്ത് ഹെലിപാഡ് നിര്‍മ്മിക്കാന്‍ സുരക്ഷാ വകുപ്പ് പദ്ധതിയിട്ടിരുന്നെങ്കിലും എതിര്‍പ്പിനെ തുടര്‍ന്ന് ആ ആശയം പിന്‍വലിച്ചു.
66 വയസ്സിനു മുകളിൽ പ്രായമുള്ള പ്രസിഡന്റ് ദ്രൗപതി മുർമു കുമരകത്ത് നിന്ന് ഹെലിക്കോപ്റ്ററില്‍ നിലയ്ക്കലിൽ ഇറങ്ങി കാറിൽ പമ്പയിലെത്തി ഇരുമുടി കെട്ട് ഒരുക്കും. ദേവസ്വം ഗസ്റ്റ് ഹൗസിലോ സന്നിധാനത്തെ ശബരി ഗസ്റ്റ് ഹൗസിലോ ആയിരിക്കും താമസിക്കുക. ദർശന സമയം ഇതുവരെ തീരുമാനിച്ചിട്ടില്ല.
ഈ മാസം 18, 19 തീയതികളിൽ ശബരിമലയിൽ എത്തുമെന്ന് ജില്ലാ കളക്ടർക്കും പോലീസിനും രാഷ്ട്രപതിയുടെ ഓഫീസിൽ നിന്ന് അറിയിപ്പ് ലഭിച്ചിട്ടുണ്ട്. ഇടവ മാസ പൂജയ്ക്കായി ഈ മാസം 14 ന് ക്ഷേത്രനട തുറക്കും. 19 ന് രാത്രി 10 മണിക്ക് അടയ്ക്കും. മറ്റ് തീർത്ഥാടകർക്കുള്ള അസൗകര്യം കുറയ്ക്കുന്നതിനാണ് രാഷ്ട്രപതി അവസാന രണ്ട് ദിവസങ്ങൾ തിരഞ്ഞെടുത്തിരിക്കുന്നത്. ഈ രണ്ട് ദിവസങ്ങളിൽ തീർത്ഥാടകർക്ക് വെർച്വൽ ക്യൂ അനുവദിക്കുന്നതിന് നിയന്ത്രണങ്ങൾ ഉണ്ടാകും. മറ്റ് ദിവസങ്ങളിൽ തടസ്സമുണ്ടാകില്ല.
നീലിമല, അപ്പാച്ചിമേട് വഴിയുള്ള പരമ്പരാഗത പാതയും സ്വാമി അയ്യപ്പൻ റോഡും കേന്ദ്ര സുരക്ഷാ ഏജൻസികൾ പരിശോധിച്ചു. ഡോളി, എമർജൻസി വാൻ ഉൾപ്പെടെയുള്ള സൗകര്യങ്ങൾ ഒരുക്കും. രാഷ്ട്രപതി ശബരിമലയിൽ എത്തുന്ന വഴി പിന്നീട് വെളിപ്പെടുത്തും.
തീർത്ഥാടന കാലത്തെപ്പോലെ, വിവിധ സ്ഥലങ്ങളിൽ ഓക്സിജൻ, കാർഡിയാക് സൗകര്യങ്ങളുള്ള അടിയന്തര മെഡിക്കൽ മുറികളും വിശ്രമ കേന്ദ്രങ്ങളും സജ്ജമാക്കും. ജില്ലാ മെഡിക്കൽ ഓഫീസർ ഉൾപ്പെടെയുള്ള ഉദ്യോഗസ്ഥരുടെ യോഗം ഇന്ന് ഉച്ചയ്ക്ക് 12 മണിക്ക് കളക്ടറേറ്റിൽ ജില്ലാ കളക്ടറുടെ അധ്യക്ഷതയിൽ നടക്കും. പോലീസ്, ദേവസ്വം ഉദ്യോഗസ്ഥരുടെ യോഗവും വിളിച്ചിട്ടുണ്ട്.
