ഗാസയിൽ ഇസ്രായേൽ ബോംബാക്രമണം നടക്കുന്നതിനിടയിൽ, ഐക്യരാഷ്ട്രസഭയുടെ പൊതുസഭയിൽ കൊണ്ടുവന്ന അടിയന്തരവും സ്ഥിരവുമായ വെടിനിർത്തലിനെക്കുറിച്ചും, ബന്ദികളെ നേരത്തെ മോചിപ്പിക്കുന്നതിനെക്കുറിച്ചും പ്രമേയത്തില്‍ വോട്ട് ചെയ്യുന്നതിൽ നിന്ന് ഇന്ത്യ വിട്ടുനിന്നു.
ഐക്യരാഷ്ട്ര സഭ: ഗാസയിൽ തുടരുന്ന അക്രമങ്ങൾക്കിടയിൽ, ഐക്യരാഷ്ട്രസഭയുടെ പൊതുസഭയിൽ അടിയന്തരവും സ്ഥിരവും നിരുപാധികവുമായ വെടിനിർത്തൽ ആവശ്യപ്പെടുന്ന ഒരു സുപ്രധാന പ്രമേയം അവതരിപ്പിച്ചു. സ്പെയിൻ അവതരിപ്പിച്ച പ്രമേയത്തിൽ 193 അംഗരാജ്യങ്ങളിൽ 149 എണ്ണം പിന്തുണച്ചു. 12 രാജ്യങ്ങൾ ഇതിനെ എതിർത്തപ്പോൾ 19 രാജ്യങ്ങൾ വോട്ടെടുപ്പിൽ പങ്കെടുത്തില്ല. വോട്ടെടുപ്പിൽ നിന്ന് വിട്ടുനിന്ന ഈ 19 രാജ്യങ്ങളിൽ ഇന്ത്യയും ഉൾപ്പെടുന്നു.
ഗാസയിലെ ഇസ്രായേലി ആക്രമണങ്ങളിൽ ആയിരക്കണക്കിന് സാധാരണക്കാർക്കാണ് ജീവൻ നഷ്ടപ്പെട്ടത്. സ്ഥിതി അങ്ങേയറ്റം ആശങ്കാജനകമായി മാറിയിരിക്കുന്ന സാഹചര്യത്തിലാണ് ഐക്യരാഷ്ട്രസഭയിൽ ഈ നിർദ്ദേശം കൊണ്ടുവന്നത്. അതിൽ വെടിനിർത്തലിന് പുറമേ, ബന്ദികളെ നേരത്തെ മോചിപ്പിക്കുന്നതിനുള്ള അഭ്യർത്ഥനയും ഉന്നയിച്ചിരുന്നു. മുമ്പ് സുരക്ഷാ കൗൺസിലിൽ അത്തരമൊരു നിർദ്ദേശം യുഎസ് വീറ്റോ ചെയ്ത സമയത്താണ് ഈ നിർദ്ദേശം വന്നത്.
ഗാസയിലെ വഷളായിക്കൊണ്ടിരിക്കുന്ന മാനുഷിക സാഹചര്യത്തിൽ ഇന്ത്യക്ക് വളരെയധികം ആശങ്കയുണ്ടെന്ന് ഐക്യരാഷ്ട്രസഭയിലെ ഇന്ത്യയുടെ സ്ഥിരം പ്രതിനിധി പർവതനേനി ഹരീഷ് പറഞ്ഞു. സംഭാഷണത്തിലൂടെയും നയതന്ത്രത്തിലൂടെയും മാത്രമേ ഈ സങ്കീർണ്ണമായ പ്രശ്നത്തിന് പരിഹാരം കണ്ടെത്താൻ കഴിയൂ എന്ന് ഇന്ത്യ വിശ്വസിക്കുന്നതിനാൽ, മുമ്പ് ഇത്തരം പ്രമേയങ്ങളിൽ വോട്ടു ചെയ്യുന്നതിൽ നിന്ന് ഇന്ത്യ വിട്ടുനിന്നിരുന്നുവെന്ന് അദ്ദേഹം പറഞ്ഞു. അതുകൊണ്ടാണ് ഇത്തവണയും ഇന്ത്യ വോട്ടെടുപ്പിൽ പങ്കെടുക്കാതിരുന്നത്.
ഗാസയിലെ സാധാരണക്കാരെ കൊല്ലുന്നതിനെ ഇന്ത്യ ശക്തമായി അപലപിക്കുകയും മാനുഷിക സഹായത്തിന്റെ രൂപത്തിൽ ഗാസയിലെ ജനങ്ങൾക്ക് തുടർച്ചയായി സഹായം നൽകുന്നുണ്ടെന്ന് അറിയിക്കുകയും ചെയ്തു. ഉഭയകക്ഷിപരമായോ ഐക്യരാഷ്ട്രസഭ വഴിയോ ദുരിതാശ്വാസ വസ്തുക്കൾ അയച്ചിട്ടുണ്ടെന്നും ഭാവിയിലും അത് തുടരുമെന്നും ഇന്ത്യ വ്യക്തമാക്കി.
ഇന്ത്യയുടെ ഈ തീരുമാനം അന്താരാഷ്ട്ര വേദികളിലും തന്ത്രപരമായ വൃത്തങ്ങളിലും ചർച്ച ചെയ്യപ്പെട്ടു. ഒരു വശത്ത്, മാനവികതയെയും സമാധാനത്തെയും അനുകൂലിക്കുന്ന ഒരു രാജ്യമായി ഇന്ത്യ സ്വയം അവതരിപ്പിക്കുകയും, അതേക്കുറിച്ച് ഇടതടവില്ലാതെ പ്രസ്താവനകളിറക്കുകയും, മറുവശത്ത് നയതന്ത്ര അകലം പോലുള്ള നിര്‍ദ്ദേശങ്ങള്‍ മുന്നോട്ടു വെച്ച് സ്വയം പ്രതിരോധം തീര്‍ക്കുന്ന ഇന്ത്യയുടെ നിലപാടിനെ സംശയദൃഷ്ടിയോടെയാണ് ചില രാജ്യങ്ങള്‍ വീക്ഷിക്കുന്നതെന്ന് വിദഗ്ധര്‍ അഭിപ്രായപ്പെട്ടു.
