മിനസോട്ട: ശനിയാഴ്ച മിനസോട്ടയിലെ ബ്രൂക്ലിൻ പാർക്കിലും ചാംപ്ലിനിലുമുള്ള രണ്ട് ഡെമോക്രാറ്റിക് പ്രതിനിധികള്‍ക്ക് വെടിയേറ്റു. രണ്ടു പേര്‍ മരിക്കുകയും മറ്റൊരാൾ ഗുരുതരാവസ്ഥയിലാവുകയും ചെയ്തു. ലക്ഷ്യം വച്ചുള്ള ആക്രമണമാണിതെന്ന് അധികൃതർ വിശേഷിപ്പിച്ചു.
ബ്രൂക്ലിൻ പാർക്കിൽ, സംസ്ഥാന പ്രതിനിധി മെലിസ ഹോർട്ട്മാനും ഭർത്താവും വെടിയേറ്റ് സംഭവസ്ഥലത്തുവെച്ചുതന്നെ മരിച്ചു. ഏതാനും മണിക്കൂറുകൾക്ക് മുമ്പ്, സംസ്ഥാന സെനറ്റർ ജോൺ ഹോഫ്മാനും ഭാര്യയും ചാംപ്ലിനിൽ വെടിയേറ്റു. ഹോഫ്മാനും ഭാര്യയും വിജയകരമായ ശസ്ത്രക്രിയയ്ക്ക് വിധേയരായി, അപകടനില തരണം ചെയ്തു. ഗവർണർ ടിം വാൾസ് ഈ സംഭവങ്ങളെ ശക്തമായി അപലപിച്ചു, അവയെ രാഷ്ട്രീയ അക്രമം എന്ന് വിളിച്ചു. ഈ ആക്രമണം ജനാധിപത്യത്തിനെതിരായ ആക്രമണമാണെന്ന് അദ്ദേഹം പറഞ്ഞു.
പോലീസ് പറയുന്നതനുസരിച്ച്, അക്രമി ഒരു പോലീസ് യൂണിഫോമിലായിരുന്നു. അക്രമിയുടെ വാഹനത്തിൽ നിന്ന് ആക്രമണത്തിന് ഇരയാക്കാന്‍ സാധ്യതയുള്ള നിരവധി കോണ്‍ഗ്രസ് അംഗങ്ങളുടെയും പൊതു ഉദ്യോഗസ്ഥരുടെയും പേരുകളടങ്ങിയ ലിസ്റ്റ് കണ്ടെത്തിയതായി ബ്രൂക്ലിൻ പാർക്ക് പോലീസ് മേധാവി പറഞ്ഞു.
അക്രമികളില്‍ ഒരാളെ പോലീസ് അറസ്റ്റ് ചെയ്തിട്ടുണ്ട്. എന്നാല്‍, അയാളുടെ ഐഡന്റിറ്റി പോലീസ് സ്ഥിരീകരിച്ചിട്ടില്ല. മറ്റൊരാൾ ഇപ്പോഴും ഒളിവിലാണ്. ബ്രൂക്ലിൻ പാർക്കിലെ എഡിൻബർഗ് ഗോൾഫ് കോഴ്‌സിന് മൂന്ന് മൈൽ ചുറ്റളവിൽ താമസിക്കുന്നവരോട് വീടിനകത്തു തന്നെ തുടരാൻ പോലീസ് നിർദ്ദേശിച്ചിട്ടുണ്ട്.
ഈ സംഭവം മിനസോട്ടയിലെ രാഷ്ട്രീയ നേതാക്കളുടെ സുരക്ഷയെക്കുറിച്ച് ഗുരുതരമായ ചോദ്യങ്ങൾ ഉയർത്തിയിട്ടുണ്ട്. പ്രാദേശിക, സംസ്ഥാന ഉദ്യോഗസ്ഥർ ഈ ആക്രമണത്തെ ശക്തമായി അപലപിക്കുകയും അക്രമിയെ അറസ്റ്റ് ചെയ്യാനുള്ള പ്രചാരണം ശക്തമാക്കുകയും ചെയ്തിട്ടുണ്ട്.
പൊതുജനങ്ങൾ ജാഗ്രത പാലിക്കണമെന്നും സംശയാസ്പദമായ എന്തെങ്കിലും പ്രവൃത്തി ശ്രദ്ധയിൽപ്പെട്ടാൽ ഉടൻ തന്നെ 911 എന്ന നമ്പറിൽ അറിയിക്കണമെന്നും ഉദ്യോഗസ്ഥർ അഭ്യർത്ഥിച്ചു.
