ദോഹ (ഖത്തര്): പശ്ചിമേഷ്യയിൽ സമാധാനവും സ്ഥിരതയും കൊണ്ടുവരുന്നതിനുള്ള യഥാർത്ഥ മധ്യസ്ഥനായി ഖത്തറാണ് പ്രവർത്തിക്കുന്നതെന്ന് യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റ പ്രശംസിച്ചു. അമേരിക്കയും ഇറാനും തമ്മിലുള്ള സംഘർഷം രൂക്ഷമാവുകയും യുദ്ധത്തിന്റെ വക്കിലെത്തുകയും ചെയ്ത സമയത്താണ് അദ്ദേഹത്തിന്റെ പ്രശംസ.
2026 ഏപ്രിൽ 15-ന് അന്റോണിയോ കോസ്റ്റ ഖത്തർ സന്ദർശിക്കുകയും അതിന്റെ നയതന്ത്രത്തെ പ്രശംസിക്കുകയും ചെയ്തു. മേഖലയിൽ സമാധാനം സ്ഥാപിക്കുന്നതിന് ഖത്തർ ആവശ്യമായ മധ്യസ്ഥത വഹിച്ചിട്ടുണ്ടെന്ന് അദ്ദേഹം പ്രസ്താവിച്ചു. ഏപ്രിൽ 14-ന് അദ്ദേഹം അബുദാബി സന്ദർശിക്കുകയും അവിടെ ഇറാന്റെ ആക്രമണങ്ങൾക്കെതിരെ ഗൾഫ് രാജ്യങ്ങളുമായി ഐക്യദാർഢ്യം പ്രഖ്യാപിക്കുകയും ചെയ്തു. സമാധാനത്തിനായുള്ള സംഭാഷണത്തിനും നയതന്ത്രത്തിനും യൂറോപ്യൻ യൂണിയൻ പൂർണ്ണ പിന്തുണ നൽകുന്നുണ്ടെന്ന് അദ്ദേഹം വ്യക്തമാക്കി.
2026 ഏപ്രിൽ 8-ന് പാക്കിസ്താന്റെ സഹായത്തോടെ അമേരിക്കയും ഇറാനും തമ്മിൽ ഒരു സമാധാന കരാറിലെത്താന് ശ്രമിച്ചിരുന്നെങ്കിലും അത് പരാജയപ്പെട്ടു. ഇരുപക്ഷവും അത് ലംഘിച്ചു. പ്രസിഡന്റ് ഡൊണാൾഡ് ട്രംപ് ഇപ്പോൾ ഇറാനിയൻ തുറമുഖങ്ങളുടെ നാവിക ഉപരോധം പ്രഖ്യാപിച്ചു. ഉപരോധം തുടരുന്ന സാഹചര്യത്തില് തുറമുഖത്തോടടുക്കുന്ന ഏതൊരു ഇറാനിയൻ കപ്പലും ഉടനടി നശിപ്പിക്കുമെന്ന് അദ്ദേഹം മുന്നറിയിപ്പ് നൽകി.
ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൾ റഹ്മാൻ അൽ താനി ഇറാന്റെ ഉപ വിദേശകാര്യ മന്ത്രിയുമായി ഫോണിൽ സംസാരിച്ചു. ചര്ച്ചയുടെ പാത പിന്തുടരാൻ അദ്ദേഹം യുഎസിനോടും ഇറാനോടും അഭ്യർത്ഥിച്ചു. ഹോർമുസ് കടലിടുക്ക് പോലുള്ള കടൽപ്പാതകൾ സമ്മർദ്ദത്തിനായി ഉപയോഗിക്കരുതെന്ന് ഖത്തർ മുന്നറിയിപ്പ് നൽകി.
2026 മാർച്ചിൽ, യൂറോപ്യൻ കൗൺസിൽ ഇറാന്റെ ആക്രമണങ്ങളെ അപലപിക്കുകയും സംഘർഷം കുറയ്ക്കണമെന്ന് ആവശ്യപ്പെടുകയും ചെയ്തിരുന്നു.
