കുവൈത്ത്: കുവൈത്തിൽ പഠിക്കുന്ന വിദ്യാർഥികളെയും അവരുടെ രക്ഷിതാക്കളെയും നേരിട്ട് ബാധിക്കുന്ന സുപ്രധാന തീരുമാനം പുറത്തുവന്നു. അറബിക് ഭാഷാ പാഠ്യപദ്ധതിയും പാക്കിസ്താനി പാഠ്യപദ്ധതിയും പിന്തുടരുന്ന സ്വകാര്യ സ്കൂളുകൾക്ക് ട്യൂഷൻ ഫീസ് വർധിപ്പിക്കാൻ കുവൈത്ത് വിദ്യാഭ്യാസ മന്ത്രാലയം അനുമതി നൽകി. നിലവിലെ അധ്യയന വർഷം മുതൽ തന്നെ പുതിയ തീരുമാനം പ്രാബല്യത്തിൽ വന്നിട്ടുണ്ട്.
ദീർഘകാലമായി ഫീസ് വർധന മരവിപ്പിച്ചിരുന്ന സാഹചര്യത്തിൽ സ്വകാര്യ വിദ്യാഭ്യാസ മേഖലയിലെ ശ്രദ്ധേയമായ മാറ്റമായാണ് ഈ തീരുമാനം വിലയിരുത്തപ്പെടുന്നത്. കുവൈത്തിൽ താമസിക്കുന്ന സ്വദേശികളെയും പ്രവാസികളെയും തീരുമാനം നേരിട്ട് ബാധിക്കും. കുട്ടികളുടെ വിദ്യാഭ്യാസച്ചെലവുകൾ പുതിയ ഫീസ് ഘടനയ്ക്ക് അനുസരിച്ച് ക്രമീകരിക്കേണ്ട സാഹചര്യം രക്ഷിതാക്കൾക്കുണ്ടാകും.
വിദ്യാഭ്യാസ മന്ത്രാലയം പുറത്തിറക്കിയ പുതിയ മാർഗനിർദേശങ്ങൾ പ്രകാരം, പ്രതിവർഷം 250 കുവൈത്തി ദിനാർ (KD) മുതൽ 450 ദിനാർ വരെ ഫീസ് ഈടാക്കുന്ന സ്കൂളുകൾക്ക് നിലവിലെ ഫീസിൽ പരമാവധി 15 ശതമാനം വരെ വർധന വരുത്താം.
അതേസമയം, പ്രതിവർഷ ഫീസ് 451 കുവൈത്തി ദിനാറോ അതിലധികമോ ഉള്ള സ്കൂളുകൾക്ക് പരമാവധി 10 ശതമാനം വരെ ഫീസ് വർധിപ്പിക്കാനാണ് അനുമതി.
എന്നാൽ, അനുവദിച്ചിരിക്കുന്ന ഈ ഫീസ് വർധന സ്കൂളുകൾക്ക് ഒരിക്കൽ മാത്രമേ നടപ്പാക്കാൻ കഴിയൂ. വർധിപ്പിച്ച ഫീസിന് അനുസൃതമായി വിദ്യാർഥികൾക്ക് മികച്ച സൗകര്യങ്ങളും സേവനങ്ങളും നൽകേണ്ട ഉത്തരവാദിത്വവും സ്കൂളുകൾക്കുണ്ടെന്ന് മാർഗനിർദേശങ്ങളിൽ വ്യക്തമാക്കുന്നു.
ഫീസ് അടയ്ക്കുന്ന രീതിയിലും സർക്കാർ പ്രധാന മാറ്റം കൊണ്ടുവന്നിട്ടുണ്ട്. രക്ഷിതാക്കളിൽ നിന്ന് മുഴുവൻ വാർഷിക ഫീസും ഒറ്റത്തവണയായി ഈടാക്കുന്നതിന് പകരം മൂന്ന് തുല്യ ഗഡുക്കളായി ഫീസ് സ്വീകരിക്കണം.
ആദ്യ ഗഡു രജിസ്ട്രേഷൻ ഫീസിനൊപ്പം വിദ്യാർഥി സ്കൂളിൽ എത്തുന്ന ആദ്യ ആഴ്ചയിൽ അടയ്ക്കണം. രണ്ടാം ഗഡു രണ്ടാം ടേമിന്റെ ആദ്യ ആഴ്ചയിലാണ് നൽകേണ്ടത്. പാകിസ്ഥാനി സ്കൂളുകളിൽ മൂന്നാം ഗഡു മൂന്നാം ടേമിന്റെ ആദ്യ ആഴ്ചയിൽ അടയ്ക്കണം.
ഗഡുക്കളുടെ എണ്ണം, ഓരോ ഗഡുവിന്റെയും തുക, പണം അടയ്ക്കേണ്ട നിശ്ചിത തീയതികൾ എന്നിവയിൽ സ്കൂളുകൾക്ക് സ്വന്തം തീരുമാനപ്രകാരം മാറ്റം വരുത്താൻ അനുവാദമില്ലെന്നും മന്ത്രാലയം കർശനമായി നിർദേശിച്ചിട്ടുണ്ട്.
ഫീസ് അടയ്ക്കുന്നതിൽ കാലതാമസം ഉണ്ടായാലും കുട്ടികളുടെ പഠനം തടസ്സപ്പെടാതിരിക്കാനുള്ള കർശന വ്യവസ്ഥകളും വിദ്യാഭ്യാസ മന്ത്രാലയം ഏർപ്പെടുത്തിയിട്ടുണ്ട്.
ഫീസ് യഥാസമയം അടച്ചില്ലെന്ന കാരണത്താൽ ഒരു വിദ്യാർഥിയെയും ക്ലാസിൽ പങ്കെടുക്കുന്നതിൽ നിന്ന് സ്കൂളുകൾക്ക് വിലക്കാനാകില്ല. അതുപോലെ ഫീസ് കുടിശ്ശികയുടെ പേരിൽ വിദ്യാർഥികളെ മധ്യവർഷ പരീക്ഷകളിലോ അന്തിമ പരീക്ഷകളിലോ പങ്കെടുക്കുന്നതിൽ നിന്ന് തടയാനും പാടില്ല.
ഫീസ് കുടിശ്ശികയുണ്ടെന്ന കാരണത്താൽ വിദ്യാർഥികളുടെ പരീക്ഷാഫലം തടഞ്ഞുവയ്ക്കാനും സ്കൂളുകൾക്ക് അനുമതിയില്ല.
ഒരു വിദ്യാർഥി പരീക്ഷയിൽ പരാജയപ്പെടുകയോ വീണ്ടും പരീക്ഷ എഴുതേണ്ട സാഹചര്യം ഉണ്ടാകുകയോ ചെയ്താൽ, അതുസംബന്ധിച്ച വിവരം സ്കൂൾ എസ്എംഎസ്, ഇ-മെയിൽ അല്ലെങ്കിൽ തപാൽ മുഖേന രക്ഷിതാക്കളെ അറിയിക്കണം.
അധ്യയന വർഷം ആരംഭിച്ചതിന് ശേഷം ഒരു വിദ്യാർഥി മറ്റൊരു സ്കൂളിലേക്ക് മാറുകയാണെങ്കിൽ ഫീസ് ഈടാക്കുന്നതിലും പ്രത്യേക വ്യവസ്ഥകൾ ബാധകമാകും.
നിലവിലുള്ള ചട്ടങ്ങൾ പ്രകാരം, ആദ്യ ഗഡുവിന്റെ അവസാന തീയതി കഴിഞ്ഞ ശേഷമാണ് വിദ്യാർഥി സ്കൂൾ മാറുന്നതെങ്കിൽ പഴയ സ്കൂളിന് വാർഷിക ഫീസിന്റെ പകുതി ഈടാക്കാൻ അവകാശമുണ്ടാകും. രണ്ടാം ഗഡുവിന്റെ അവസാന തീയതിയും കഴിഞ്ഞ ശേഷമാണ് സ്കൂൾ മാറുന്നതെങ്കിൽ പഴയ സ്കൂളിന് മുഴുവൻ വർഷത്തെയും ഫീസ് ഈടാക്കാം.
അതേസമയം, വിദ്യാർഥി പഴയ സ്കൂളിൽ പഠിച്ച കാലയളവിന് പുതിയ സ്കൂൾ വീണ്ടും ഫീസ് ഈടാക്കാൻ പാടില്ല.
പുതിയ നയത്തിന്റെ ഭാഗമായി എല്ലാ സ്കൂളുകളും തങ്ങളുടെ അംഗീകൃത ഫീസ് പട്ടിക സ്വകാര്യ വിദ്യാഭ്യാസ ജനറൽ അഡ്മിനിസ്ട്രേഷന്റെ ഫിനാൻഷ്യൽ ആൻഡ് അഡ്മിനിസ്ട്രേറ്റീവ് അഫയേഴ്സ് ഡിപ്പാർട്ട്മെന്റിന് (Financial & Administrative Affairs Department of the General Administration of Private Education) സമർപ്പിക്കണം.
ഈ ഫീസ് പട്ടിക സ്കൂളുകളുടെ ഔദ്യോഗിക വെബ്സൈറ്റിലോ സ്കൂൾ നോട്ടീസ് ബോർഡിലോ പ്രസിദ്ധീകരിക്കുന്നതും നിർബന്ധമാണ്. രക്ഷിതാക്കൾക്ക് അംഗീകൃത ഫീസ് സംബന്ധിച്ച് വ്യക്തമായ വിവരം ലഭ്യമാക്കുകയാണ് ഇതിലൂടെ ലക്ഷ്യമിടുന്നത്.
നേരത്തെ 2025-ലെ മന്ത്രിതല പ്രമേയം നമ്പർ 375 പ്രകാരം കുവൈത്തിലെ ഇന്ത്യൻ CBSE സ്കൂളുകൾക്കും 10 മുതൽ 15 ശതമാനം വരെ ഫീസ് വർധിപ്പിക്കാൻ സമാനമായ അനുമതി നൽകിയിരുന്നു.
