ന്യൂഡൽഹി: ദിവസങ്ങൾ നീണ്ട മാരത്തൺ ചർച്ചകൾക്കും തിരക്കേറിയ കൂടിയാലോചനകൾക്കും ശേഷം, കേരളത്തിലെ അടുത്ത മുഖ്യമന്ത്രിയെക്കുറിച്ചുള്ള അന്തിമ തീരുമാനത്തിൽ കോൺഗ്രസ് ഹൈക്കമാൻഡ് എത്തി.
ബുധനാഴ്ച വൈകുന്നേരം കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെയുടെ വസതിയിലെത്തിയ രാഹുൽ ഗാന്ധി ഏകദേശം മുക്കാൽ മണിക്കൂറോളം ചർച്ചകൾ നടത്തി നിർണായക തീരുമാനങ്ങൾ എടുത്തു. തുടർന്ന് മാധ്യമങ്ങളോട് പ്രതികരിച്ച കോൺഗ്രസ് ദേശീയ ജനറൽ സെക്രട്ടറി ജയറാം രമേശ്, മുഖ്യമന്ത്രിയെക്കുറിച്ചുള്ള ഔദ്യോഗിക പ്രഖ്യാപനം വ്യാഴാഴ്ച ഉണ്ടാകുമെന്ന് പറഞ്ഞു. കൂടുതൽ വിശദീകരിക്കാൻ തയ്യാറാകാതെ അദ്ദേഹം ഖാർഗെയുടെ വസതിയിലേക്ക് മടങ്ങി.
അതേസമയം, ഇന്ന് തിരുവനന്തപുരത്ത് അടിയന്തര കോൺഗ്രസ് നിയമസഭാ കക്ഷി യോഗം വിളിച്ചിട്ടുണ്ട്. സംസ്ഥാനത്തിന്റെ ചുമതലയുള്ള എഐസിസി ജനറൽ സെക്രട്ടറി ദീപദാസ് മുൻഷി, ഹൈക്കമാൻഡിൻറെ തീരുമാനം അടങ്ങിയ മുദ്രവച്ച കവറുമായി യോഗത്തിൽ പങ്കെടുക്കുമെന്ന് പ്രതീക്ഷിക്കുന്നു.
ഉച്ചയ്ക്ക് 1 മണിക്ക് കോൺഗ്രസ് പാർലമെന്ററി പാർട്ടി യോഗം ചേരും. ദീപ ദാസ് മുൻഷിക്കൊപ്പം രണ്ട് നിരീക്ഷകരും യോഗത്തിൽ പങ്കെടുക്കും. വിജയിച്ച എല്ലാ എംഎൽഎമാരോടും തിരുവനന്തപുരത്തേക്ക് വരാൻ പാർട്ടി നേതൃത്വം നിർദ്ദേശിച്ചിട്ടുണ്ട്. പുതിയ മുഖ്യമന്ത്രിയുടെ പേര് യോഗത്തിൽ ഔദ്യോഗികമായി പ്രഖ്യാപിക്കുമെന്നാണ് റിപ്പോർട്ട്.
തുടർന്ന് ഉച്ചയ്ക്ക് 2 മണിക്ക് യു.ഡി.എഫ് ഘടകകക്ഷികളുടെ പാർലമെന്ററി പാർട്ടി യോഗം ചേരും. നിയുക്ത മുഖ്യമന്ത്രിക്ക് പിന്തുണ അറിയിച്ചുകൊണ്ടുള്ള കത്ത് കൈമാറിയ ശേഷം സർക്കാർ രൂപീകരിക്കാനുള്ള അവകാശവാദവുമായി ഗവർണറെ കാണാനുള്ള നടപടികൾ പൂര്ത്തിയാക്കും.
