തിരുവനന്തപുരം: വി ഡി സതീശൻ കേരള മുഖ്യമന്ത്രിയായി തിരഞ്ഞെടുക്കപ്പെട്ടതോടെ മന്ത്രിസഭാ രൂപീകരണ ചർച്ചകൾ കോൺഗ്രസിൽ സജീവമായി. തിങ്കളാഴ്ച നടക്കുന്ന സത്യപ്രതിജ്ഞാ ചടങ്ങിൽ മുഖ്യമന്ത്രിയോടൊപ്പം എല്ലാ മന്ത്രിമാരും സത്യപ്രതിജ്ഞ ചെയ്യുമോ എന്ന കാര്യത്തിൽ ഇതുവരെ അന്തിമ തീരുമാനമായിട്ടില്ല. 21 അംഗ മന്ത്രിസഭയിൽ മുഖ്യമന്ത്രി ഉൾപ്പെടെ 11 മന്ത്രിമാരും സ്പീക്കർ സ്ഥാനവും കോൺഗ്രസിന് ലഭിക്കുമെന്നാണ് റിപ്പോര്ട്ട്.
മുതിർന്ന നേതാക്കളുമായി കൂടിയാലോചിച്ച ശേഷം മന്ത്രിമാരുടെ പട്ടിക തീരുമാനിക്കുമെന്ന് നിയുക്ത മുഖ്യമന്ത്രി വി ഡി സതീശൻ വ്യക്തമാക്കിയിട്ടുണ്ട്. അതേസമയം, മുഖ്യമന്ത്രി സ്ഥാനത്തേക്കുള്ള മത്സരത്തിന്റെ അവസാന ഘട്ടത്തിൽ മാറ്റിനിർത്തപ്പെട്ട എഐസിസി ജനറൽ സെക്രട്ടറി കെ സി വേണുഗോപാൽ തന്റെ അനുയായികൾക്ക് മന്ത്രിസ്ഥാനം നൽകണമെന്ന് ആവശ്യപ്പെട്ട് രംഗത്തുണ്ടെന്ന റിപ്പോർട്ടുമുണ്ട്.
അതേസമയം, മുഖ്യമന്ത്രി സ്ഥാനം ലക്ഷ്യമിട്ട് അവസാനം പിന്തള്ളപ്പെട്ട രമേശ് ചെന്നിത്തല മന്ത്രിസഭയിൽ ചേരുമോ എന്ന കാര്യത്തിൽ അനിശ്ചിതത്വം തുടരുന്നു. നിയമസഭാ പാർട്ടി യോഗത്തിൽ നിന്ന് അദ്ദേഹം വിട്ടുനിന്നത് അദ്ദേഹത്തിന്റെ അതൃപ്തിയുടെ സൂചനയാണെന്നാണ് രാഷ്ട്രീയ വൃത്തങ്ങൾ വിലയിരുത്തുന്നത്.
കെപിസിസി പ്രസിഡൻ്റ് സണ്ണി ജോസഫും മുതിർന്ന നേതാക്കളായ തിരുവഞ്ചൂർ രാധാകൃഷ്ണനും കെ മുരളീധരനും മന്ത്രിസ്ഥാനം ഉറപ്പിച്ചു. എൻ ശക്തൻ, പി സി വിഷ്ണുനാഥ്, ബിന്ദു കൃഷ്ണ, എം ലിജു, ചാണ്ടി ഉമ്മൻ, വി ടി ബലറാം, എ പി അനിൽകുമാർ, ടി സിദ്ദിഖ്, കെ ജയന്ത് എന്നിവരുടെ പേരുകളാണ് പരിഗണനയിലുള്ളത്. ഇവരിൽ ഒരാളായിരിക്കും സ്പീക്കർ.
ലീഗിൽ നിന്ന് പി കെ കുഞ്ഞാലിക്കുട്ടി, പി കെ ബഷീർ, എൻ ഷംസുദ്ദീൻ, മഞ്ഞളാംകുഴി അലി, കെ എം ഷാജി, പാറക്കൽ അബ്ദുള്ള, വി ഇ അബ്ദുൾ ഗഫൂർ, എ കെ എം അഷ്റഫ്, ആബിദ് ഹുസൈൻ തങ്ങൾ തുടങ്ങിയവരുടെ പേരുകൾ പരിഗണിക്കുന്നുണ്ട്.
കേരള കോൺഗ്രസ് രണ്ട് മന്ത്രിമാരെ ആവശ്യപ്പെടുമെങ്കിലും, ഒരു മന്ത്രി സ്ഥാനവും ഡെപ്യൂട്ടി സ്പീക്കർ അല്ലെങ്കിൽ ചീഫ് വിപ്പ് സ്ഥാനവും സാധ്യതയുണ്ട്. മോൻസ് ജോസഫ്, തോമസ് ഉണ്ണിയാടൻ, അപ്പു ജോൺ ജോസഫ് എന്നിവർക്ക് സാധ്യതയുണ്ട്. ആർഎസ്പിയിൽ നിന്ന് ഷിബു ബേബി ജോൺ, കേരള കോൺഗ്രസ് (ജേക്കബ്) യിലെ അനൂപ് ജേക്കബ് എന്നിവർ മന്ത്രിമാരാകും. മറ്റ് പാർട്ടികളിൽ നിന്ന് സി പി ജോൺ, മാണി സി കാപ്പൻ എന്നിവർ മന്ത്രിമാരാകാൻ സാധ്യതയുണ്ട്.
