തിരുവനന്തപുരം: സംസ്ഥാനത്ത് നിലവിലുള്ള വൈദ്യുതി പ്രതിസന്ധി ഒരാഴ്ചയ്ക്കുള്ളിൽ പൂർണമായും നിയന്ത്രണവിധേയമാകുമെന്ന പ്രതീക്ഷ പ്രകടിപ്പിച്ച് മുഖ്യമന്ത്രി. വൈദ്യുതി ഉപഭോഗത്തിലുണ്ടായ വലിയ വർധനയും മഴക്കുറവുമാണ് ഇപ്പോഴത്തെ പ്രതിസന്ധിക്ക് പ്രധാന കാരണങ്ങളെന്ന് അദ്ദേഹം വ്യക്തമാക്കി. കഴിഞ്ഞ സെപ്റ്റംബറിനെ അപേക്ഷിച്ച് നിലവിൽ 925 മെഗാവാട്ടിന്റെ അധിക വൈദ്യുതി ഉപഭോഗമാണ് സംസ്ഥാനത്ത് രേഖപ്പെടുത്തുന്നത്.
കേരളത്തിൽ ഏകദേശം 2,500 മെഗാവാട്ട് സൗരോർജം ഉത്പാദിപ്പിക്കുന്നുണ്ടെങ്കിലും ആവശ്യമായ ബാറ്ററി സ്റ്റോറേജ് സംവിധാനങ്ങളുടെ അഭാവം വെല്ലുവിളിയാണ്. ഇതുമൂലം ഉത്പാദിപ്പിക്കുന്ന സൗരോർജം പ്രധാനമായും പകൽ സമയത്ത് മാത്രമാണ് പ്രയോജനപ്പെടുത്താൻ കഴിയുന്നത്. പ്രതിസന്ധി മറികടക്കുന്നതിനായി എട്ട് സംസ്ഥാനങ്ങളുമായി ബന്ധപ്പെട്ട് വൈദ്യുതി വാങ്ങാനുള്ള ശ്രമങ്ങൾ സർക്കാർ തുടരുകയാണെന്നും മുഖ്യമന്ത്രി അറിയിച്ചു.
ഒഡീഷയിൽ നിന്നും ന്യൂക്ലിയർ പവർ കോർപറേഷനിൽ നിന്നും 150 മെഗാവാട്ട് വീതം വൈദ്യുതി ലഭ്യമാക്കിയിട്ടുണ്ട്. ന്യൂക്ലിയർ പവർ കോർപറേഷന്റെ മൊത്തം ഉത്പാദനത്തിന്റെ 85 ശതമാനം സംസ്ഥാനങ്ങൾക്ക് നൽകേണ്ടതാണ്. ശേഷിക്കുന്ന 15 ശതമാനത്തിൽനിന്നുള്ള ഏകദേശം 280 മെഗാവാട്ടിൽ 150 മെഗാവാട്ടാണ് കേരളം യൂണിറ്റിന് 4.65 രൂപ നിരക്കിൽ വാങ്ങിയത്. ഇതിനായി പ്രത്യേക സംഘം മുംബൈയിലെത്തി ചർച്ച നടത്തിയതായും മുഖ്യമന്ത്രി പറഞ്ഞു.
അതേസമയം, മറ്റ് സ്രോതസുകളിൽനിന്ന് വൈദ്യുതി വാങ്ങുന്നതിനുള്ള ചെലവ് വളരെ കൂടുതലാണ്. എൻ.ടി.പി.സി യൂണിറ്റിന് 30 രൂപയും തമിഴ്നാട് 38 രൂപയുമാണ് ആവശ്യപ്പെട്ടത്. ഹിമാചൽ പ്രദേശ് പകൽ 130 മെഗാവാട്ടും രാത്രി 80 മെഗാവാട്ടും നൽകാൻ സന്നദ്ധത അറിയിച്ചെങ്കിലും യൂണിറ്റിന് 13 രൂപയ്ക്ക് മുകളിലാണ് നിരക്ക് ആവശ്യപ്പെട്ടത്.
റെഗുലേറ്ററി കമ്മിഷൻ നിശ്ചയിച്ചിരിക്കുന്ന പരമാവധി നിരക്ക് യൂണിറ്റിന് 10 രൂപയായതിനാൽ അതിന് മുകളിലുള്ള വിലയ്ക്ക് വൈദ്യുതി വാങ്ങില്ലെന്ന് മുഖ്യമന്ത്രി വ്യക്തമാക്കി. കഴിഞ്ഞ 25 വർഷമായി സംസ്ഥാനത്ത് പുതിയ ദീർഘകാല വൈദ്യുതി വാങ്ങൽ കരാറുകൾ ഉണ്ടായിട്ടില്ലെന്നും യൂണിറ്റിന് 4.29 രൂപ നിരക്കിലുണ്ടായിരുന്ന ഒരു കരാർ റദ്ദാക്കപ്പെട്ടതായും അദ്ദേഹം പറഞ്ഞു. ഈ സാഹചര്യത്തിൽ പുതിയ ദീർഘകാല കരാറുകൾക്കായി സർക്കാർ ശ്രമം ആരംഭിച്ചിട്ടുണ്ട്.
എൽ നിനോ പ്രതിഭാസത്തിന്റെ പശ്ചാത്തലത്തിൽ അടുത്ത മൺസൂൺ വരെ കടുത്ത ചൂട് തുടരാനുള്ള സാധ്യത കണക്കിലെടുത്ത് ഒക്ടോബർ ഒന്ന് മുതൽ പുതിയ വൈദ്യുതി പദ്ധതി നടപ്പാക്കും. പമ്പ്ഡ് സ്റ്റോറേജ് പദ്ധതികൾ ഉൾപ്പെടുന്ന പുതിയ വൈദ്യുതി നയവും ഉടൻ പ്രഖ്യാപിക്കുമെന്ന് മുഖ്യമന്ത്രി അറിയിച്ചു.
കെ.എസ്.ഇ.ബിയെ സ്വകാര്യവത്കരിക്കാനുള്ള നീക്കമില്ലെന്നും മുഖ്യമന്ത്രി വ്യക്തമാക്കി. അതേസമയം, പുനരുപയോഗ ഊർജ മേഖലയുടെ വികസനത്തിന് സ്വകാര്യ നിക്ഷേപം സ്വാഗതം ചെയ്യുമെന്നും അദ്ദേഹം പറഞ്ഞു.
