കൊച്ചി: നടി അൻസിബ ഹസ്സന്റെ പരാതിയിൽ കേസെടുക്കാൻ കോടതി നിർദ്ദേശിച്ചതിനെത്തുടർന്ന് കടവന്ത്ര പോലീസ് നടൻ ടിനി ടോമിനെ വീണ്ടും ചോദ്യം ചെയ്യും. നടിമാരായ നീന കുറുപ്പ്, ശ്വേത മേനോൻ എന്നിവരുടെ മൊഴികളും രേഖപ്പെടുത്തും. ടിനി ടോമിന്റെ അറസ്റ്റ് ഉൾപ്പെടെയുള്ള നടപടികളൊന്നും പോലീസ് സ്വീകരിക്കില്ല. നടിമാരുടെ മൊഴികൾ പരിശോധിച്ച ശേഷമേ തുടർനടപടികൾ സ്വീകരിക്കൂ.
അൻസിബ നൽകിയ പരാതിയിൽ ടിനി ടോമിന്റെ വർഗീയ പരാമർശത്തിനെതിരെ കേസെടുക്കാൻ എറണാകുളം ജില്ലാ സെഷൻസ് കോടതി ഇന്നലെ നിർദ്ദേശിച്ചിരുന്നു. സ്ത്രീത്വത്തെ അപമാനിച്ചതുൾപ്പെടെയുള്ള പരാതികൾ അന്വേഷിക്കാനാണ് കോടതി നിർദ്ദേശിച്ചത്. പരാതിയിൽ കേസെടുക്കാൻ തെളിവില്ലെന്നായിരുന്നു കടവന്ത്ര പോലീസിന്റെ നേരത്തെയുണ്ടായിരുന്ന നിലപാട്. ഇതിനെതിരെ അൻസിബ സമർപ്പിച്ച ഹർജിയിലാണ് കോടതി ഇടപെട്ടത്.
മലയാളം സിനിമാ കലാകാരന്മാരുടെ സംഘടനയായ ‘അമ്മ’ യുടെ എക്സിക്യൂട്ടീവ് പാനലിൽ നിന്ന് രാജിവയ്ക്കാൻ കാരണം ടിനി ടോമിന്റെ മാനസിക പീഡനമാണെന്ന് അൻസിബ പരാതിയിൽ പറയുന്നു. ടിനി ടോം തന്നെ ‘ജിഹാദി’ എന്ന് വിളിച്ചതായും മതപരിവർത്തനം ആരോപിച്ചതായും വ്യക്തിപരമായി അധിക്ഷേപിച്ചതായും അവർ പരാതിയിൽ പറയുന്നു. നീന കുറുപ്പിൽ നിന്നാണ് തനിക്ക് ഈ വിവരം ലഭിച്ചതെന്നും അൻസിബ പറഞ്ഞിരുന്നു.
എന്നാൽ, അൻസിബയുടെ പരാതി അടിസ്ഥാനരഹിതമാണെന്നും കേട്ടുകേൾവിയുടെ അടിസ്ഥാനത്തിൽ മാത്രം കേസ് രജിസ്റ്റർ ചെയ്യാൻ കഴിയില്ലെന്നും കടവന്ത്ര പോലീസ് എസിപിക്ക് റിപ്പോർട്ട് സമർപ്പിച്ചു. ടിനി ടോം, മുൻ അമ്മ ഭാരവാഹികളായ ശ്വേത മേനോൻ, ലക്ഷ്മിപ്രിയ എന്നിവർ ആരോപണങ്ങൾ നിഷേധിച്ച് മൊഴി നൽകി. ഇതോടെയാണ് അൻസിബ കോടതിയെ സമീപിച്ചത്.
